Mahiku a Seesari Augusto, mwene muulupale a oRoma, aahiruma orepeliwa atthu otheene. Tivonto, Yosefe ni Maria yaahaana orowa mpantta wa okuusini oYerusalemu, muttetthe wa oBethelehemu, epooma yaayariwe aya.

Atthu yaahisareya oBethelehemu wira arepeliwe. Tivonto, opuro waahanle ohikhaliwe naari nsisi naawaleliwa aya abuuru ni inama sikina. Nto Yesu aayariwe opuro yoole. Maria aahimukhuneela ni ikuwo khumwaatalela munikulani, opuro waaheliwa yoolya ya inama.

Vanikhala ntoko wira Muluku taamwiirinhe Seesari Augusto oruma orepeliwa atthu. Nthowa xeeni? Nthowa noowi, yooruma ele yaahiiriha Yesu oyariwa oBethelehemu epooma ya Mwene Davidi, yoowo aari muhavinre a Yesu. Soolempwa saahihimya vahinatthi wira epooma ele, taarowa awe oyariwa Mwene aaleiheriwe.​—Mikeya 5:1.

Tthiri ole waari ohiyu wootepa otthuneya! Maana amakampusi yaawo yaari mmathalani yaahoona waarya. Waarya iwe waathoonyerya ovuwa wa Yehova! Nlaikha nimosa naahahimeerya amakampusi wira: “Muhòvé! Koruhenleni ehapari yorera, enrowa wahakalaliha valupale atthu othene. Olelo, muttetthe wa Davidi, moyareliwa mòpoli, okhanle Kristu Pwiya. Ethonyeryo envahiwanyu t’ila: munomphwanya mwana akhuneliwene n’ikuwo, àtaleliwene munikulani”. Niinaanoru, yaahikhumelela malaikha manceene yiiraka: “Avuwihiwe Muluku wirimu: ni vathí-va evahiwe murettele atthu onaphentawe”.​—Luka 2:10-14.

Nuumala malaikha okhuma, amakampusi yaahileelana yaaworu wira: “Naso nrowé oBethelehemu, nawehe itthu sikhumelenle, seiyo Apwiya ansuwelihalyaya”. (Luka 2:15) Mowaakuveya, amakampusi ale yaahirowa khumphwanya Yesu oyariwe ene niinaano ntoko malaikha yaahimmye aya. Vaavo amakampusi yaalavula aya ele nlaikha naalenle aya, atthu otheene yaawiriyana, yaahitikinihiwa. Nto itthu sotheene saahimmwa, Maria aanisuka vamurimani vawe.

Olelo-va, atthu anceene anikupali wira Yesu aayariwe 25 a Dezembro. Masi muttetthe wa oBethelehemu, mweeri wa Dezembro ennirupa epula, nave okathi wooriirya. Nto okathi mukina, ennimora eneevi. Okhala wira Dezembro eyiita, khivaaweryaneya amakampusi okhala mmathalani alyihaka inama saya. Nave-tho, khivaaweryaneya mwene ooRoma oruma wira atthu yaale yahaasiveliwa ni yena, yeette mukwaha wa mahiku manceene eyiita, arowaka orepeliwa. Tthiri, vannooneya wira Yesu aayariwe mweeri wa Outubro.