1, 2. Xeeni ebuusula eryaaya ekaruma yootepa otthuneya, nto xeeni olikanyihiwaka ni yowuupuxerya ya murima?

MARINYERO onnimweettiha pakiti awe mphareya mowaatta-mo mawimpi; mutthu mukina onneetta moothakoni opuro ohikhanle maasi ni ohinikhaliwa; mutthu mukina oneettiha eviyau onivira musulu moowaatta meeku. Munnisuwela etthu enaakhaliherya atthu ala wira aphiye nipuro ninrowa aya? Khuta mmosa mwa atthu awo, aahikhalane ebuusula aamukumanana mixankiho suulupale, vootepexa akhala wira khorina ikaruma sikina sa etekonologia ya vano.

² Ebuusula ti ekaruma enlikana ni eroroce yeeyo erina kwiya orina aaso onithoonya onikela kuusi. Akhala wira ennivara muteko saana, ebuusula vamosa ni maapha ooloka, enoowerya waakhaliherya atthu ophiya nipuro ninrowa aya. Nto, ekaruma ela pooti olikanyihiwa ni etthu yootthuneya nivahiwa ahu ni Yehova, eyo  piiyo, yowuupuxerya ya murima. (Yakobo 1:17) Nahaavahiwe yowuupuxerya ela ya murima, hiyo naamurimeela. Nto navarela muteko saana, eyo enonikhaliherya ophwanya ni weettela ephiro yekeekhai. Vano, nrowe nthokorerye ele enitaphulela aya yowuupuxerya ya murima ni moota enivara aya muteko. Nuumala-vo, ninrowa othokorerya myaha iya: (1) Moota wookhalana yowuupuxerya ya murima yooloka, (2) nthowa naya vanitthuneya aya othokorerya yowuupuxerya ya murima ya atthu akina, ni (3) moota yowuupuxerya ya murima enikumiherya aya mareeliho.

3. Exeeni enitaphulela aya nuulumo na eGriki noowi ‘yowuupuxerya ya murima’, ni muteko xeeni a vameekhaaya enivara aya wa apinaatamu?

³ Nuulumo na eGriki noowi ‘yowuupuxerya ya murima’, mBiibiliyani nintaphulela “osuwela wooyaraniwa, aahiiso wiisuwela mutthu mwaneene”. Moovirikana ni soopattuxiwa sikina, hiyo nookhalana owerya ovahiwa ahu ni Muluku onnikhaliherya wiisuwela. Mwa ntakiheryo, hiyo ninniwerya weemela khuupuwela saana wira nipake soothanla sooloka. Erumeelaka ntoko namoona aahiiso etthu enniphukela, yowuupuxerya ya murima ahu pooti otokosa miteko sahu, muupuwelo, ni soothanla sahu. Enoowerya onikhaliherya wira nipake soothanla sooloka aahiiso osyaka itthu soohiloka. Nto muhoolo mwaha enoowerya onlipiha mwaha woopaka soothanla sooloka, aahiiso onipwapwela mwaha woopaka soothanla soohiloka.

4, 5. (a) Ninsuwela sai wira Adamu ni Eva yaahikhalana yowuupuxerya ya murima, ni exeeni yaakhumelenle mwaha wa ohiiwelela nlamulo na Muluku? (b) Matakiheryo xeeni anooniherya wira khalai ohinatthi okathi wa eKristau, arumeyi oororomeleya yaahirumeela saana yowuupuxerya ya murima aya?

⁴ Mulopwana ni muthiyana oopacerya yaahivahiwa yowuupuxerya ya murima. Adamu ni Eva yahooniherya wira yaahikhalana yowuupuxerya ya murima. Hiyo ninnisuwela eyo mwaha woowi awo yaahuuliwa muru nuumala ottheka. (Maphattuwelo 3:7, 8) Vooriipiha-vo murima, yowuupuxerya ya murima aya yooxankiheya, khiyaakhalihenrye. Moolakelela, awo yahivonyola  malamulo a Muluku. Nto moolakelela awo yaahithanla omurukunuwela Yehova Muluku. Okhala wira yaapattuxiwe oohittheka, awo yaanisuwela etthu yooreerela opaka wira ahimurukunuwele Muluku.

⁵ Voovirikana ni Adamu ni Eva, apinaatamu anceene anniiwelela yowuupuxerya ya murima aya. Mwa ntakiheryo, Yobi mulopwana oororomeleya aahimmye so: ‘Kinothipelela ohimya wira nkitthenke, nkinihiya. Ankhili aka khankùlumela mwaha w’etthu p’itthu’. * (Yobi 27:6) Tthiri Yobi aari mulopwana a miruku. Aahiimananiha otthara yowuupuxerya ya murima awe, nto eyo yaneettiha miteko ni soothanla sawe. Tivonto, moohakalala aahimmye awe wira yowuupuxerya ya murima awe khiyaamuulumenle, omunyohola wala onvaha mulattu. Nwehe ovirikana okhanle mwa Yobi ni Davidi mmoota yaarumenle aya yowuupuxerya ya murima aya. Nuumala Davidi opaka etthu yahaamuttittiminhe Sawuli mwene aathanliwe ni Yehova, ‘oholo waya, murima awe wahimuripa’. (1 Samuweli 24:6) Oriipiwa wawe murima waahimwiiriha Davidi, opaka etthu yaamukumihenrye mureerelo, nto muhoolo mwaya owo aahikhala mutthu oottittimiheya.

6. Etthu xeeni enooniherya wira apinaatamu otheene aakhalana yowuupuxerya ya murima?

⁶ Niireke arumeyi a Yehova paahi tarina yowuupuxerya ya murima? Nkahaya muthokorerye moolumo oowuupuxeriwa a murummwa Paulo, oowi: ‘Amalapo khansuwela ikano sa Moise, vano, yettelaka sorera ntoko sinupuwelaya murim’aya, ankhili aya t’ikano saya, nnamwi ehikhalanne ikano sa Moise. Mwettelo aya onnoniherya wira ikano silempwale mmurimani mwaya. Ankhili aya ti namon’aya; tthiri, yirá sorera, murim’aya onnattela, yirá sonanara, murim’aya onnaripa’. (aRoma 2:14, 15) Hata atthu yaale  ahinsuwela-tho malamulo a Yehova, ikwaha sikina yowuupuxerya ya murima aya pooti owiiriha opaka itthu moovarihana ni malamulo a Muluku.

7. Nthowa xeeni yowuupuxerya ya murima ikwaha sikina ehineetta aya saana?

⁷ Ikwaha sikina, yowuupuxerya ya murima pooti ohivara muteko saana. Mwaha wa xeeni? Akhala wira ebuusula enaattamiheriwa eyuuma, nto kwiya a ebuusula eyo pooti othoonyaka nipuro nikina, ohiya onikela kuusi. Nto, akhala wira enirumeeliwa ni maapha oohiloka, ebuusula eyo enoowerya ohivareleya muteko saana. Vamosaru, akhala wira sookhala soophavela sinceene soohiloka vamurimani vahu, yowuupuxerya ya murima ahu enoowerya oniroiha ephiro yoohiloka. Nave, akhala wira yowuupuxerya ya murima ahu khenitthara Nuulumo na Muluku, hiyo pooti ohisuwela ovirikana waya ele eri yooloka ni ele eri yoohiloka. Tthiri, wira yowuupuxerya ya murima ahu evareke muteko saana, hiyo nihaana weettihiwaka ni munepa wootteela wa Yehova. Paulo aalempe so: ‘yowuupuxerya ya murima aka enneettihiwa ni munepa wootteela, ennikhikhalela onamoona’. (aRoma 9:1, NM) Vano, ninrowa osuwelexa sai wira yowuupuxerya ya murima ahu eneettihiwa ni munepa wootteela wa Yehova? Wira eyo eweryaneye yowuupuxerya ya murima ehaana wiixuttihiwa.

8. (a) Murima oniwerya sai opahula yowuupuxerya ya murima ahu, nto etthu xeeni ekhanle ahu oothokorerya nihinatthi opaka soothanla? (b) Xeeni muKristau ohikhanle awe oororomelaka murima awe paahi? (Nwehe enoota.)

⁸ Munirumeela sai yowuupuxerya ya murima okathi onipaka anyu soothanla? Akina annoona okweya otthara ele eniphavela murima aya, nto khiyapaka soothanla attharihelaka ele enaasivela paahi. Woonasa wene anuupuwela so: “Miyo nkinoona otthekeya waya etthu ela”. Murima ahu onoowerya oniwoka, mpakha opahula yowuupuxerya ya murima yooloka. Biibiliya onihimya so: “T’ani onwerya otokosa murima wa mutthu? Khivo etthu yotakhala envikana murima wowotha. Murim’owo khunttharuwa”. (Yeremiya 17:9) Tivonto, ele eniphavela murima ahu, ehikhaleke  ti etthu enoona ahu okhala yootepexa otthuneya. Nto wanipacerya nihaana othokoreryaka ele enrowa omuhakalaliha Yehova Muluku. *

9. Omoova Muluku ontaphulelani, nto omoova wahu Muluku onivarihana sai ni yowuupuxerya ya murima ahu?

⁹ Akhala wira soothanla sinipaka ahu sineettihiwa ni yowuupuxerya ya murima enivarihana ni Biibiliya, eyo enimooniheryaka wira ninnimoova Muluku, ohiya otthara itthu sinnisivela. Nkawehani ntakiheryo nla noovareleya muteko. Nehemiya yoowo aari guvernatoro oororomeleya, aahikhalana edireito ya waavekela mpoosito atthu oYerusalemu. Hata vari siiso, khaavekenle. Nthowa xeeni? Owo khaaphavela hata vakhaani wooniwa ni Yehova okhala mutthu aapuherya atthu a Muluku. Owo aahimmye so: “Masi miyo nkinìre siso, mana kanimova Muluku”. (Nehemiya 5:15) Omoova Muluku wekeekhai, eyo piiyo, woova ni murima wotheene ophavelaka ohimunyoonyiha Tiithi ahu a wiirimu, ti etthu eri yootepexa otthuneya. Omoova Muluku mwa enamuna eyo, onooniiriha ophavela otokosa Nuulumo na Muluku wira nipake soothanla sooloka.

10, 11. Malakiheryo xeeni a Biibiliya aniwerya onikhaliherya voohimya sa soowurya sinihapala, nto ninrowa ophwanya sai malakiheryo awo a Muluku?

¹⁰ Mwa ntakiheryo, nkahaya muthokorerye mwaha wa soowurya sinihapala, wala eviinyu. Okathi wootthekula, khuta mmosa ohaana opaka yoothanla awe, aikohaka akhala wira onoowurya wala khoniwura. Wanipacerya, mekhihuru nihaana wuupuwelela so. Malakiheryo xeeni a Biibiliya anivareleya muteko mwaha ola? Masi, Biibiliya khonikhoottiha owurya woreerela. Biibiliya onninvuwiha Yehova mwaha woonivaha eviinyu. (Esalimo 104:14, 15)  Masi, onnikhoottiha ohapaliwa ni otthekula woonyakula mwaha woowurya. (Luka 21:34; aRoma 13:13) Ohiya-vo, Biibiliya onninyokha ohapaliwa ntoko sisaale sininyokha awe soottheka sikina suulupale, ntoko orupihana woohiloka. *​—1 aKorinto 6:9, 10.

¹¹ Tivonto wira yowuupuxerya ya murima ya muKristau ekhale yooloka ehaana wiixuttihiwa ni olakiheriwa atthariwaka malakiheryo a Biibiliya. Vano, okathi onilattuliwa ahu orowa ofestani, nto khiyaphavela othanla owurya wala ohiwurya, nihaana wiikohaka so: ‘Enamuna xeeni ya efesta enilokiheriwa? Niireke waaniheryasa enrowa okhala yowaakanyereya, yoonyakuliwa mwaha woowurya? Itthu xeeni soohiloka simphavela murima aka? Kiireke murima aka onnitepa ophavela owurya, nto kahiwurye khuhiyakhala saana, wala kiniwurya wira kooneke okhweya ovara itthu sikina? Kiireke kinniwerya wiikhoottiherya wira kihiwurye vanceene? Okathi onivarerya ahu malakiheryo a Biibiliya vamosa ni makoho anikhumelela, nnimwiira saana opaka nivekelo wira Yehova onivahe miruku. (Musome Esalimo 139:23, 24.) Opaka eyo onitaphulela onvekela Yehova wira onilakiherye orweela mwa munepa awe wootteela. Nave-tho, eyo enimwiiriha yowuupuxerya ya murima ahu olimalela malakiheryo a Muluku. Masi ehaavo-tho etthu ekina ekhanle ahu owuupuwela nihinatthi othanla opaka etthu.

12, 13. Xeeni yowuupuxerya ya murima ya maKristau vanivirikana aya, nto nooneleke sai ovirikana iwo?

¹² Ikwaha sikina nyuwo pooti otikinihiwa vaavo vaniweha anyu wira yowuupuxerya ya murima ya maKristau ennivirikana. Mutthu mmosa pooti woonaka yoolema emosa okhala yootthekeya; masi mukina khuhiyoona otthekeya waya. Mwa ntakiheryo: owurya eviinyu okathi wootthekula; mutthu mmosa pooti woonaka okhala voohitthekeya owurya eviinyu ni apatthani vakhaani okathi onitthekula aya makaaripi; akina pooti woonaka okhala voohireerela. Exeeni eniwiiriha atthu okhalanaka muupuwelo  woovirikana, nto nooneleke sai ovirikana iwo okathi onipaka ahu soothanla?

¹³ Aakhala mathowa manceene aniwiiriha atthu opaka soothanla soovirikana. Soolema ni makhalelo a khula mutthu sinnivirikana. Mwa ntakiheryo, atthu akina anuupuwela mixankiho saaphwannye khalai mwaha woowurya eviinyu, nto khiyoona ovila omala-maliha muxankiho aya. (1 Mamwene 8:38, 39) Nto mwaha wa eyo, yowuupuxerya ya murima aya enniwiiriha woovelela owurya eviinyu. Okathi onirwa awe vatthokoni vanyu mutthu ntoko owo, yowuupuxerya awe ya murima pooti omwiiriha okhootta owurya eviinyu. Niireke eyo yaarowa wonyoonyihani? Niireke mwarowa omuthipelela? Nnaari. Pooti musuwelaka aahiiso muhisuwelaka mathowa aya animwiiriha okhootta, masi omphenta wanyu munna owo onoowiirihani ohimuthipelela.

14, 15. Mmwaha xeeni maKristau a eseekulu yoopacerya waavirikana aya yowuupuxerya ya murima, nto Paulo aatumerenrye exeeni?

¹⁴ Murummwa Paulo aahoona wira ikwaha sikina yowuupuxerya ya murima yaanivirikana vanceene eriyari ya maKristau a eseekulu yoopacerya. Okathi ole, maKristau makina yaanixankiheya mwaha wa soolya sikina saavahiwa mukuttho amuluku eethiru. (1 aKorinto 10:25) Yowuupuxerya ya murima ya Paulo khiyaamwiiriha okhootta soolya iyo saatumihiwa omerkaado. Paulo aahisuwela wira amuluku eethiru khahiyo etthu; ni khaniwerya okhalana yoolya aya, okhala wira yoolya eyo enikhuma wa Yehova yoowo ori topattunxe. Masi, Paulo aahisuwela wira atthu akina khiyuupuwela siiso. Woona sawe akina yaanakokhorela amuluku eethiru ahinatthi okela eKristau. Nto khuta etthu yaavarihana ni waakokhorela amuluku eethiru, yaari yoothanyeya wa awo. Vano, Paulo aarowa ophuka sai mwaha ole?

¹⁵ Paulo aahimmye so: “Hiyo, ninlipiherya wamini, nihana wakhaliherya ale ahinlipiherya mwaha [wotteettheya] waya: nihiphaveleke sininsivela. Kristu mwanene khaphavenle samusivela”. (aRoma 15:1, 3) Paulo aahithokorerya mwaha owo khuhimya wira nihaana ophavelaka waasiveliha akina nimutakihaka Kristu. Ohoolo waya, Paulo aahimmye wira khaarowa-tho okhuura enama wira ohikhumulihe epwittipwitthi yafaita yeeyo Kristu omwarexenle  awe ephome.​—Mmusome 1 aKorinto 8:13; 10:23, 24, 31-33.

16. Nthowa xeeni atthu yaale yowuupuxerya ya murima aya enaakhoottiherya opaka itthu sikina, ahikhanle aya owaalamulaka akina?

¹⁶ Nave-tho, atthu yaale yowuupuxerya ya murima aya enaakhoottiherya opaka itthu sikina, ahaalamuleke akina, yaakhanyereryaka wira yooneke myaha sotheene ntoko awo sinoonela aya. (Mmusome aRoma 14:10.) Tthiri, wira nirumeele saana yowuupuxerya ya murima ahu, nihaana wiiphukelaka hiyo aneene, ohiya waaphukela atthu akina. Muupuweleke masu a Yesu, oowi: “Muhalamuleke akhw’inyu, siso Muluku khanrowa wolamulani”. (Matheyo 7:1) Atthu otheene mmulokoni ahaana osyaka onyakulihana mmyaha seiye khuta mutthu onittharihela awe yowuupuxerya ya murima awe. Hiyo nihaana ophavelaka inamuna sa wooniherya ophenta ni wiiraana, nilipihanaka ohiya otteettheihana.​—aRoma 14:19.

17. Yowuupuxerya ya murima ya atthu anceene eri sai olelo-va?

¹⁷ Murummwa Pedru aalempe so: ‘Mukhalaneke yowuupuxerya ya murima yooloka’. (1 Pedru 3:16, NM) Ti voreera okhalana yowuupuxerya ya murima eneemereriwa ni Yehova Muluku. Eyo ennivirikana ni yowuupuxerya ya murima ya anamunceene olelo va. Olavulaka sa atthu awo, Paulo aahimyale so: ‘yowuupuxerya ya murima aya yootthittiwa ni eyuuma’. (1 Timótheyo 4:2, NM) Eyuuma yooviha enipaha erutthu, enniiriha erutthu okhalana murala nto khuhiyoona owereya. Tthiri, yowuupuxerya ya murima ya atthu akina khenivara muteko, niire so, erina murala ni khenoona owereya, khenlopola, khenaakiherya, aahiiso wuuliwa muru wala ovaha nthowa nuumala opaka etthu yoohiloka. Olelo-va, anamunceene khanivaha efaita okathi yowuupuxerya ya murima aya vanihimya aya wira aapaka etthu yoohiloka.

18, 19. (a) Efaita xeeni erina aya wiivaha nthowa wala wuuliwa muru mwaha wa yoottheka? (b) Nipakeke exeeni akhala wira noriipiwa murima mwaha wa soottheka sa khalai sittharunwe ahu?

 ¹⁸ Tthiri enamuna emosa yowuupuxerya ya murima ennileela aya wira noottheka, ori okathi yoole onixanka ahu nuumala opaka etthu yoohiloka. Vaavo muupuwelo owo vanimwiiriha awe ole otthenke ottharuwa, eyo enomwiiriha mutthu owo oleveleliwa soottheka sawe hata siri suulupalexa. Mwa ntakiheryo, Mwene Davidi aahikhalana mulattu mwaha wa soottheka saapanke awe, masi aahileveleliwa vanceene mwaha wa ottharuwa wawe ni murima wotheene. Othanya wawe itthu soohiloka saapanke awe ni wiilipiherya wawe weettela malamulo a Yehova okhuma okathi ole, waahimwiiriha Davidi woona wira Yehova ‘tòrera murima ni òlevelela’. (Esalimo 51:3-21; 86:5) Vano, sai akhala wira muupuwelo wa wiivaha nthowa ni wuuliwa muru onnithipelela nuumala hiyo ottharuwa ni oleveleliwa?

¹⁹ Ikwaha sikina yowuupuxerya ya murima pooti omphukela wala omuxankiha ole otthenke hata ovinre ene okathi munceene nuumala mutthu ole ottharuwa ni oleveleliwa. Akhala wira ti siiso, hiyo nihaana okupaliki wira Yehova ti muulupalexa ovikana muupuwelo wotheene wa apinaatamu. Hiyo nihaana omwaamini, weemererya ophenta ni olevelela wawe, ntoko siisaale vanaatumererya ahu atthu akina opaka eyo. (Mmusome 1 Yohani 3:19, 20.) Yowuupuxerya ya murima yooloka ennikumiherya murettele, omaaleleya, ni ohakalala wuulupale, itthu seiyo siri soovila ophwanya elapo ela. Atthu yaale yaatthenke khalai, vano ari oohakalala, nto aakhalana yowuupuxerya ya murima yooloka vaavo vanimurumeela aya Yehova Muluku.​—1 aKorinto 6:11.

20, 21. (a) Eliivuru ela epakiwe wira yookhaliheryeni opaka exeeni? (b) MaKristau arina otaphuwa xeeni, nave anrowa orumeela sai?

²⁰ Eliivuru ela epakiwe wira ewiirihekeni okhala mutthu ohakalala, ni okhalana yowuupuxerya ya murima yooloka mahiku ala ootakhala aneettihiwa ni Satana. Masi eliivuru ela kheniromola khula nlamulo wala khula malakiheryo ari mBiibiliyani, woonasa wene akhanle anyu owuupuwela ni ovarihela muteko wa mixankiho sa khula nihiku. Ohiya-vo, mmyaha sinivekela orumeela yowuupuxerya ya murima anyu, muhuupuweleke wira khula etthu muhaana oleelihiwa yooreerela opaka. Eliivuru ela epakiwe wira  yookhaliheryani wiixuttiha ni weettiherya saana yowuupuxerya ya murima anyu, orweela wa osuwela ovarihela muteko Nuulumo na Muluku, khuta nihiku. Moovirikana ni Nlamulo na Moise, “ikano sa Kristu” sinaatumererya ale aneettela, wira asuweleke orumeela saana yowuupuxerya ya murima aya vamosa ni malakiheryo a Biibiliya, ohiya otthara paahi malamulo oolempwa. (aGalasia 6:2) Tivonto Yehova ohaavaha maKristau otaphuwa wuulupale wira apakeke soothanla. Masi, Nuulumo nawe ninnuupuxerya wira nihikhala-khale nirumeelaka otaphuwa iwo wira ‘nikhunele sotakhala’. (1 Pedru 2:16) Ohiya-vo, otaphuwa iwo onninivaha eparakha yowooniherya omphenta wahu Yehova.

²¹ Ovekela wira muupuwelele saana oreera waya weettela malakiheryo a Biibiliya ni opaka soothanla sooloka, onowiirihani ovikaniha weetta ephiro yeeyo epacenrye anyu okathi yoole omusuwenle anyu Yehova. Mwiira siiso, “ankhili” anyu anrowa wiixuttihiwa orweela mwa ‘walimaleliha’ opaka soothanla sooloka. (aHéberi 5:14) Yowuupuxerya ya murima anyu exuttihiwe ni Biibiliya, enrowa woophwanyihani mireerelo sinci khula nihiku. Ntoko ebuusula enimulakiherya mutthu oneetta mukwaha, vano yowuupuxerya ya murima anyu enrowa wookhaliheryani opaka soothanla sinimuhakalaliha Tiithi anyu a wiirimu. Ela teri enamuna enrowa wookhaliheryani ovikaniha okhala moophentani mwa Muluku.