YOOSOMA 7
Omwene wa Muluku Exeeni?
1. Omwene wa Muluku Exeeni?
Xeeni Yesu orya awe Mwene oophwanelela?—MARKO 1:40-42.
Omwene wa Muluku ti ekuvernu ya wiirimu. Onorantteliha ikuvernu sotheene sa apinaatamu ni wiiriha otthuna wa Muluku wiireya wiirimu ni vathi-va. Ihapari voohimya sa Omwene wa Muluku ti sooreera tthiri. Moohipisa, Omwene wa Muluku onrowa okumiherya olamulelo wooloka wa apinaatamu. Onrowa owiiraaniha atthu otheene anikhala valaponi.—Mmusome Daniyeli 2:44; Matheyo 6:9, 10; 24:14.
Omwene wohaana okhalana mwene. Yehova oomuthanla Yesu Kristu, wira okhale Mwene a Omwene Awe.—Mmusome Wisupulula 11:15.
Nwehe eviidiyu Omwene wa Muluku Exeeni?
2. Xeeni Yesu oreerelaka okhala Mwene?
Mwaana a Muluku, onnireerela okhala Mwene mwaha wooreera murima ni olipiherya opaka itthu sooloka. (Yohani 1:14) Ohiya vo, ookhalana-tho owerya wa waakhaliherya atthu, okhala wira onrowa olamulelaka elapo oryeene wiirimu. Nuumala ohihimuwa, Yesu aahiwela wiirimu khukilaathi moono woolopwana wa Yehova, khiyawehererya. (aHéberi 10:12, 13) Wanikisa waya, Muluku aahinvaha owerya wira opacerye olamulela.—Mmusome Daniyeli 7:13, 14.
3. Nto Yesu onrowa olamulelaka naani?
Nikhuuru na atthu anihimmwa okhala “òwarya”, anrowa olamulelaka ni Yesu wiirimu. (Daniyeli 7:27) Nto atthu oowaarya apacenrye othanliwa, ti arumeyi oororomeleya a Yesu. Mpakha vano Yehova onnaathanla alopwana ni athiyana oororomeleya wira akhale atthu oowaarya. Ntoko Yesu awo annihihimuxiwa nto khiyakhala malaikha.—Mmusome Yohani 14:1-3; 1 aKorinto 15:42-44.
Nto, atthu akavi anrowa wiirimu? Yesu onnaahimya okhala “nikoto namukhani”. (Luka 12:32) Yamalela waatta waya anrowa okhala 144.000. Awo anrowa olamulelaka ni Yesu elapo yotheene.—Mmusome Wisupulula 14:1.
4. Exeeni Yaakhumelenle Nuumala Yesu opacerya olamulela?
Omwene wa Muluku opacenrye olamulela mwaakha wa 1914. * Ntoko Mwene, etthu Yesu yaapacenrye awe opaka, waari omoomola Satana ni malaikha awe khumurihela vathi. Satana oonanariwa nto onnikumiherya masooso mulaponi. (Wisupulula 12:7-10, 12) Okhuma okathi ole, oxanka wa apinaatamu wootepa wuncerereya. Ikhotto, etala, ikwerere ni itetere, sotheene iyo siniirela mpantta wa “ethonyero” yoowi voohipisa Omwene onrowa opaka mirukunuxo wa itthu siniireya vano mulaponi.—Mmusome Luka 21:7, 10, 11, 31.
5. Omwene wa Muluku onrowa opaka exeeni?
Muteko wa olaleerya Omwene wa Muluku mulaponi, onnithukumanya muttitthi wa atthu oowiiraana a maloko otheene. Atthu anceene oowiimaaliha annimwiiwelela Yesu. Omwene wa Muluku onrowa waakhapelela vaavo makhalelo ala ootakhala a mulaponi anrowa aya opwetexiwa. Nto, mutthu ti mutthu oniphavela okhala momweneni mwa Muluku, ohaana wiixutta omwiiwelela Yesu.—Mmusome Wisupulula 7:9, 14, 16, 17.
Okathi wa iyaakha ekonto emosa, Omwene onrowa omaleliha opaka ele Muluku yaalakenle awe wa apinaatamu. Elapo yotheene enrowa okhala eparayiisu. Wanimala waya, Yesu onrowa omuttikiherya Omwene owo Tiithi awe. (1 aKorinto 15:24-26) Niireke ookhala oniphavela anyu omuleela ihapari iya sa Omwene wa Muluku?—Musome Esalimo 37:10, 11, 29.
^ etti. 6 Voohimya sa moota iprofesia sa Biibiliya saahimmye aya vahinatthi sa 1914, nwehe ipaaxina 215-218 sa eliivuru Biibiliya Oniixuttiha Exeeni Tthiri?
