Yohani 21:1-25
21 Nuumala-vo, Yesu aahiixooniherya-tho wa* awiixutti awe, ephareya ya oGalileya.* Ti siiso, Yesu aixoonihenrye awe.
2 Yaahithukumana vamosa, Simoni Pedru, Tome (yoowo aihaniwa Maphapo), Natanayeli a oKana wa oGalileya, anamwane a Zebedeyo, ni awiixutti akina anli.
3 Vano Simoni Pedru, aahaaleela akhwaawe wira: “Miyo kinrowa ototha ihopa”. Awo yaahimuhimeerya wira: “Ni hiyo nnimoottharani”. Awosa yaahivenya, khuwela mukalawani. Masi ohiyu ole, khiyaavanre etthu.
4 Vahalaka oxa, Yesu aaheemela ophareya, masi awiixutti khiyaasuwela wira aari Yesu.
5 Nto Yesu aahaakoha oriki: “Anaaka, mookhalana etthu enilyiwa?”* Awo yaahaakhula wira: “Nnaari!”
6 Owo aahaahimeerya wira: “Murihele ntthavi moono woolopwana wa ekalawa, nto munoophwanya etthu”. Awo yaahirihela, masi khiyaawerya opurula ntthavi, okhala wira naahisarya ihopa.
7 Siiso, mwiixutti ole aaphentiwa ni Yesu aahimuhimeerya Pedru wira: “Ti Pwiya!” Vano, Simoni Pedru vaiwale awe wira aari Pwiya, aahiwara nlaya nawe na ota vasulu, okhala wira khaawanre saana. Nto aahituphela mphareya.
8 Awiixutti akina, yaawo yaahanle mukalawani yaamukhaani, yaahimutthara apurulaka ntthavi naasanrye ihopa, maana awo yaahirakamela etthaya, etthu yoowiiraka imeeturu 100 paahi.
9 Nuuphiya vatthayani, awo yaahiweha mooro opattihiwe ene, ni ihopa siri ene vaikho. Nave-tho yaahikhala ephaawu.
10 Yesu aahaahimeerya wira: “Muruuhe ihopa vakhaani sivanre anyu niinaano-va”.
11 Vano, Simoni Pedru aahikela mukalawani, khipurulela ntthavi ota, nisanrye ene ihopa suulupale. Nnaamwi saakhanle ihopa 153, ntthavi nle khinaakhereyale.
12 Yesu aahiwiirela: “Murwe mulyeeke”. Khuuvo mwiixutti mmosa aawenrye omukoha wira: “Nyuwo mwa pani?”, maana yaanisuwela wira aari Pwiya.
13 Vano Yesu aahiwaattamela, aahikuxa ephaawu, aavaha. Nave-tho aahaavaha ihopa.
14 Ela yaari ekwaha ya neeraru Yesu aakhumelenle awe awiixutti awe, nuumala ohihimuxiwa mookhwaani.
15 Nuumala olya, Yesu aahimukoha Simoni Pedru, oriki: “Nyuwo Simoni, mwaana a Yohani, munnikiphenta ovikana iya?” Owo aahimwaakhula Yesu wira: “Aayo Pwiya, nyuwo moosuwela wira miyo kinnoophentani vanceene”. Nto Yesu aahimuleela Pedru wira: “Mulyiheke ipwittipwitthi saka”.
16 Yesu aahimukoha-tho ekwaha ya nenli, oriki: “Nyuwo Simoni, mwaana a Yohani, munnikiphenta?” Owo aahaakhula wira: “Aayo Pwiya, nyuwo moosuwela wira miyo kinnoophentani vanceene”. Nto Yesu aahimuleela Pedru wira: “Mukukhuleke ipwittipwitthi saka”.
17 Yesu aahimukoha-tho ekwaha ya neeraru, oriki: “Nyuwo Simoni, mwaana a Yohani, munnikiphenta vanceene?” Pedru aahiriipiwa murima, okhala wira Yesu aahimukoha ekwaha ya neeraru, oriki: “Munnikiphenta vanceene?” Tivo, Pedru aahimwaakhula, wira: “Pwiya, nyuwo munnisuwela itthu sotheene. Nyuwo moosuwela wira kinnoophentani vanceene”. Yesu aahimuleela Pedru wira: “Mulyiheke ipwittipwitthi saka.
18 Tthiri, kinooleelani ekeekhai wira, okathi mwaari anyu mmiravo, nyuwo mwaaniwerya wiiwariha mmensinyu, munarowa khula opuro mwaaphavela anyu. Masi, muuluvala vale, munrowa wookolaka matata anyu, nto mutthu mukina oowarihekeni ni oweettihekeni, ooroihakani opuro muhiniphavela anyu”.
19 Yesu aahihimya itthu iya, ophavelaka wooniherya enamuna ya okhwa wa Pedru, yaarowa onvuwiha Muluku. Nuumala ohimya siiso, aahimuleela Pedru wira: “Mukitthareke voohihiyererya”.
20 Pedru aahirukunuwa, khumoona mwiixutti aaphentiwa ni Yesu, aattharaka. Mwiixutti owo, ti yoole aamwaattamenle Yesu, okathi yaalya aya yoolya ya ohiyu, onamukoha wira: “Pwiya, ti pani owo onrowa woovarihani?”
21 Tivo, nuumala Pedru onweha mwiixutti owo, aahimukoha Yesu, iiraka: “Pwiya, exeeni enrowa omwiiraneela mulopwana ola?”
22 Yesu aahimwaakhula wira: “Kaphavela wira ola okhale mpakha miyo orwa, exeeni enooxankihani? Nyuwo mukitthareke voohihiyererya”.
23 Tivonto, moolumo ale yaahuulaana eriyari ya awiixutti a Yesu, wira mwiixutti ole khaarowa okhwa. Masi, eyo khahiyo ti etthu Yesu aahimmye awe. Ohiya-vo, owo aahimmye so: “Kaphavela wira ola okhale mpakha miyo orwa, exeeni enooxankihani?”
24 Mwiixutti owo, ti yoole okhalenle onamoona ni olempe itthu iya. Nave hiyo noosuwela wira onamoona awe ti weekeekhai.
25 Tthiri, nlelo sihaavo itthu sinceene Yesu siirale awe. Nto vaakhanle wira itthu sotheene soolempwa, kinoona wira elapo yotheene khiyaarowa okhalana opuro oniphiyerya osuka iroolu sotheene saarowa olempwa.
Inoota
^ Aahiiso, “aahaakhumelela-tho”.
^ Aahiiso, “ephareya ya oTiberiyade”. Munwehe Yohani 6:1.
^ Aahiiso, “ehopa?”
