Wiisuupulula 13:1-18
13 Nto eyo* yaaheemela vamihaavani sa ophareya.
Nave kaahiweha enama yoowali ekhumaka mphareya, yeeyo yaarina manyaka 10 ni miru 7, ni khula nnyaka naahikhalana ekhara* emosa. Masi khula muru waahikhalana nsina nanveeha Muluku.
2 Vano, enama yoowali yaawenhe aka yaalikana ni havara. Masi metto saya saalikana ni mwaamunama oniihaniwa ursu, ni eyano aya yaalikana ni eyano ya kharamu. Nto enowa yuulupale, yaahivaha enama eyo yoowali owerya waya, ni ehice aya, ni okhulupale aya.
3 Vano, kaahoona wira muru aya mmosa waahivulalihiwa vanceene. Nnaamwi naari nikhwatta naakhanle oowiiva, naahivola. Nto atthu a elapo yotheene yaanitthara enama eyo yoowali, atikinihiwe ene.
4 Atthu awo yaanikokhorela enowa yuulupale, okhala wira eyo yaahivaha okhulupale enama yoowali. Nave, yaanikokhorela enama yoowali, ni moolumo ala: “Ti pani onlikana ni enama yoowali, ni taani oniwerya owana ni eyo?”
5 Enama yoowali yaahaakhela owerya wira yiittottopeke ni elavuleke itthu sootakhala sininveeha Muluku. Nave yaahaakhela owerya wira epakeke eniphavela aya, miyeeri 42.
6 Vano, yaahihula eyano aya enanveeha Muluku, ni oveeha nsina nawe ni opuro onikhala awe, ni waaveeha ale anikhala wiirimu.
7 Enama eyo yaaheemereriwa owana ekhotto ni ale oororomeleya* ni waaxintta. Nave yaahivahiwa owerya wa olamulela mahimo otheene, ni makhuli otheene, ni mattaava otheene, ni maloko otheene.
8 Atthu otheene anikhala elapo ya vathi, anrowa okokhorela enama eyo. Okhuma okathi opattuxiwa aya olumwenku,* atthu awo masina aya khalempwale murooluni mwa okumi ya Mwaapwittipwitthi, yoowo iiviwe.
9 Ole orina maaru oowiiwa, iiweke.
10 Akhala wira mutthu ohaana otthukweliwa mukhatteya, weeso onootthukweliwa mukhatteya. Akhala wira mutthu onrowa wiiva ni xoowa,* weeso onimwiiviwa ni xoowa.* Tivo, ale oororomeleya* ahaana ovilela ni okhalana waamini.
11 Nuumala-vo, kaahiweha enama yoowali ekhumaka mulaponi, eyo yaahikhalana manyaka manli yaalikana ni manyaka a mwaapwittipwitthi. Masi yaahipacerya olavula ntoko enowa yuulupale.
12 Enama eyo yoowali, ennooniherya owerya waya wotheene ohoolo wa enama ele yoowali yoopacerya. Nave enniiriha elapo ni atthu anikhala mulaponi okokhorela enama yoowali yoopacerya, yeeyo yaavolihiwe nikhwatta naya naakhanle oowiiva.
13 Nave, ennipaka ithoonyeryo suulupale, ni enniiriha mooro okhuma wiirimu okhuruwelaka vathi, wooniwaka ni atthu.
14 Enama eyo yoowali ennaahapuxa ale anikhala mulaponi, mwaha wa ithoonyeryo yeemereriwe aya opaka ni enama yoowali yoopacerya. Nave, ennaahimeerya ale anikhala mulaponi wira apake elatarato ya enama yoowali yoopacerya, yeeyo yaavulalihiwe ni xoowa,* masi khuvola.
15 Enama yoowali ya nenli, yaahivahiwa owerya wa ovaha okumi* elatarato ya enama yoowali yoopacerya. Nto, elatarato ya enama ele yoowali, yaaniwerya olavula ni oruma wiiviwa otheene ale yahaakokhorela enama eyo yoowali.
16 Enama eyo yoowali, ennaakhanyereriha atthu otheene, acikhaani ni aalupale, athaaciri ni amasikhini, ale ootaphuwa ni ipottha, wira eheliwe ekanyeryo ntata naya noolopwana aahiiso vayuuci vaya,
17 ni wira ohikhale mutthu oniwerya othuma aahiiso otumiha etthu, ohikhanle yoole oheliwe ekanyeryo, eyo piiyo, nsina na enama yoowali aahiiso nummuru ninthoonyerya nsina naya.
18 Ole orina ankhili, iirele ikontha nummuru na enama yoowali, okhala wira nummuru nlo ti na pinaatamu. Nummuru nene ti 666. Ale paahi arina ankhili, tanrowa wiiwexexa etthu ela.
Inoota
^ Eyo piiyo, enowa yuulupale.
^ Aahiiso, “ekhara ya omwene”.
^ Ekereku, “ale oowaarya”.
^ Anihimmwa anamwane a Adamu ni Eva.
^ Aahiiso, “espaata”; Aahiiso, woonasa wene: “Akhala wira mutthu ohaana wiiviwa ni xoowa”.
^ Aahiiso, “espaata”.
^ Ekereku, “ale oowaarya”.
^ Aahiiso, “espaata”.
^ Ekereku, “iphumu”.
