Masaalimu 92:1-15
Nsipo para nihiku na esaabadu.
92 Ti vooreera wooxukhurelani nyuwo Yehova,Ni wiipa isipo kittottopelaka nsina nanyu, nyuwo Muluku Muulupalexa,
2 Wiira voosiisu, kilaleyeke ophenta wanyu woororomeleya,Nave ohiyu, kilaleyeke ororomeleya wanyu,
3 Kittharaka ni ekaruma ya isipo erina mikhoyi 10,Ni oruma wa viola.
4 Yehova, munnikitteeliha murima mwaha wa miteko sanyu;Miyo kinnikhuwela kitteeliwe ene murima, mwaha wa miteko sanyu.
5 Khoo Yehova, miteko sanyu ti suulupale!
Ankhili anyu khareere waatta!
6 Khuuvo mulolo oniwerya osuwela itthu iyo;Nave khuuvo mulolo okhanle oowiiwexexa etthu ela:
7 Atakhali yaaphuwaka ntoko malaxi,Nave itthu saaweettelaka saana atakhali ootheene,Awo aniirela opwetexiwa.
8 Masi nyuwo Yehova, ti muri mukhulupale waavikana atthu ootheene.
9 Yehova, nyuwo munnaaweha awanani anyu,Mweekeekhai, awanani anyu anrowa opwetexiwa;Atthu ootheene ootakhala, anomwara-mwariwa.
10 Masi munookikhaliha oolipa ntoko epooyi ya mutakhwani;Kinimoottiha erutthu aka, ni makhura ooreera.
11 Maitho aka animwaaweha awanani aka axinttiwaka;Maaru aka, anoowiiwa atakhali anikithupela, axinttiwaka.
12 Masi anaxariya itthu sinooweettela saana ntoko mukole woowiima,Nave animunnuwa ntoko mwiri wa oLiibano, oniihaniwa eseeturu.
13 Awo yaaliwe vate va empa ya Yehova;Awo anniima vate va empa ya Muluku ahu.
14 Hata yuuluvanle ene,* awo animwiimaka mihokorokho;Anrowa okhalaka oolipa* ni a ikuru,
15 Alaleyaka wiira Yehova ta xariya.
Owo ti Mwala aka, ni khoniira etthu yoohikhala ya xariya.
