Masaalimu 90:1-17
Nivekelo na Moise, murumeyi a Muluku eekeekhai.
90 Yehova, nyuwo mwa ntthyawelo nahu* okhuma khalai.
2 Muhinatthi opattuxa miyaako,Aahiiso muhinatthi opattuxa olumwenku wootheene ni elapo ya vathi,Nyuwo mwa Muluku okhuma khalai, mpakha okathi ohinimala.
3 Nyuwo munnimwiiriha mutthu otthikela vatthayani;Munnihimya wiira: “Nyuwo apinaatamu, mutthikele vatthayani”.
4 Para nyuwo, iyaakha 1.000, siri ntoko nihiku nimosa,* ninvira moowaakuveya;Siri ntoko iwoora vakhaani.*
5 Nyuwo munnaamala-maliha;Awo ari ntoko ikhove;
Voosiisu, ankhala ntoko malaxi aniphuwa.
6 Voosiisu, malaxi awo anniphuwa, anakhala masya,Masi makaaripi, awo anninyaala ni annuuma.
7 Onanariwa wanyu onninimirya,Nave onanariwa wanyu onninoopopiha.
8 Nyuwo munnipweha itampi sahu, ohoolo wanyu;*Isiiri sahu sinnimwaleeliwa ni waarya wa owiitho wanyu.
9 Mwaha wa onanariwa wanyu, mahiku ahu annimala;Hiyo ninnookhwa niinaano-ru, ntoko wiittha iphumu.
10 Okumi ahu onikhala iyaakha 70,Aahiiso iyaakha 80, vakhala wiira mutthu owo toolipa.
Hata vari siiso, iyo ti soosareya mixankiho ni itthu sooriipiha murima;Iyaakha iyo sinnivira voowaakuveya, nto hiyo ninnimala.
11 Ti pani oniwerya osuwela owerya orina aya onanariwa wanyu?
Woova onireerela ahu owooniheryani, ti wuulupale ntoko onanariwa wanyu.
12 Muniixuttihe moota wooweettiha oratteene okumi ahu,*Wiira nikhalane murima orina ankhili.
13 Xontte Yehova, mutthikele onireerela murima! Munrowa onanariwa mpakha silini?
Nwoonele othunku arumeyi anyu.
14 Voosiisu, munooniherye ophenta wanyu woororomeleya,Wiira hiyo niipeke voohakalala ni nitteeliweke murima mahiku ootheene.
15 Munitteelihe murima, ntoko mahiku munihaaxale anyu,Iyaakha nihaawale ahu.
16 Arumeyi anyu, awehe miteko sanyu,Nave anaaya, awehe ovuwa wanyu.
17 Oreera murima wa Yehova Muluku ahu, okhale ni hiyo;Mwiirihe weetta saana, miteko sa matata ahu.
Aayo, mwiirihe weetta saana miteko sa matata ahu.
Inoota
^ Aahiiso, “nipuro nahu nookhala”.
^ Eheeperi, “nsana”.
^ Aahiiso, “Iwoora vakhaani sa ohiyu”.
^ Aahiiso, “Nyuwo munnisuwela itampi sahu”.
^ Aahiiso, “moota wookontari mahiku ahu”.
