Masaalimu 88:1-18
Nsipo na osuulu wa Kora. Para tiretoore a isipo. Nsipo nniipiwa mooranttelana, otthariwaka mahalaathi.* Maskiili* a Hemani, a oZerahi.
88 Khoo Yehova, Muluku onikoopola,Othana kinnookhuwelelani,Nave ohiyu kinnoorwa wa nyuwo.
2 Ovekela waka ophiye wa nyuwo,Mutheteye niyaru nanyu,* mwiiwe okhuwela waka wiira mukikhaliherye.
3 Okumi aka, woosareya mixankiho,Nave onnaattamela Mmahiye.*
4 Atthu anikoona ntoko mutthu ohanle okhwa;Kiri ntoko mutthu ohirina ikuru,
5 Yoowo mmuhiyale anyu eriyari ya alipa-ookhwa.Kiri ntoko mirutthu siriheliwe mmahiye,Seiyo muhinuupuwela anyu,Nnakhala sihinikhaliherya anyu.
6 Mookirihela nlitti noowiixa vanceene,Mapuro ooriipa, nlitti nuulupale.
7 Onanariwa wanyu onnikilemela,Nyuwo munnikihaaxa ni mawimpi anyu ootupa. (Selahi)
8 Moowiiriha atthu kaasuwela aka okirakamela;Nave mookiiriha othanyiwa naawo.
Miyo kootthukweya ni nkiniwerya otthyawa.
9 Maitho aka aahooceya mwaha wooxanka.
Yehova, kinniwiitthanani nihiku nootheene;Kinnivenxa matata aka, koovekelakani.
10 Niireke munnaapakela miiriirya alipa-ookhwa?
Niireke alipa-ookhwa anoowerya ovenya wiira yoottottopeleni? (Selahi)
11 Niireke ophenta wanyu woororomeleya onoolaleiwa mmahiye?Nave ororomeleya wanyu onoolaleiwa opuro yoowo?*
12 Niireke miiriirya sanyu sinoosuweliwa mapuro ooriipela,Aahiiso exariya anyu enoosuweliwa mapuro a atthu aliyaliwe?
13 Khoo Yehova, miyo nlelo kinnikhuwela kivekelaka wiira mukikhaliherye,Khula voosiisu, ovekela waka onnoophwanyani.
14 Khoo Yehova, xeeni munikikhootta anyu?
Xeeni munikiipithiha anyu owiitho wanyu?
15 Okhuma omiravo aka,Kinnixanka ni kinihala okhwa;Kookhulumuwa mwaha wa itthu sootakhala munihiya anyu sikikhumelelaka.
16 Miyo kookhulumuwa mwaha wa onanariwa wanyu vanceene;Mookoopopiha vanceene.
17 Nihiku nootheene, sinnikirukurerya ntoko maasi;Sinnikirukurerya mipantta sootheene.*
18 Mookirakameliha ni apatthani aka ni ale kaattamanne aka;Vano epiphi teri mpatthani aka.
Inoota
^ Nwehe Moolumo Ootthokiheriwa.
^ Nwehe Moolumo Ootthokiheriwa.
^ Aahiiso, “Muurame ni mukiwiriyane”.
^ Nwehe Moolumo Ootthokiheriwa.
^ Aahiiso, “opuro yoowo mirutthu sinintta aya”.
^ Aahiiso, woonasa wene: “ekwaha emosa”.
