Masaalimu 77:1-20
Para tiretoore a isipo. Nsipo ninlavula sa Yetutumi.* Nsipo na Asaafi.
77 Kinoomukhuwelela Muluku ni nsu naka;Kinoomukhuwelela Muluku, nto owo onookiwiriyana.
2 Nihiku kinixanka aka, kinnimwaavya Yehova.
Ohiyu, kinnimookolela matata aka voohihiyererya.*
Khuuvo onwerya okimaaliha.
3 Okathi kinimuupuwela aka Muluku, kinnuupulela;Kinnixanka, nave ikuru sinnikimalela. (Selahi)
4 Khamunikeemererya owala maitho aka;Kinnivela-vela, nave nkiniwerya olavula.
5 Kinnuupuwela mahiku a khalai,Iyaakha sivinre khalaixa.
6 Ohiyu, kinnuupuwela nsipo naka;Kinnuupuwelela vamurimani vaka;Kinniphavela osuwela vanceene.
7 Niireke wiira Yehova onoonikhootta mahiku ootheene?
Niireke khonrowa-tho onireerela murima?
8 Niireke wiira ophenta wawe woororomeleya woomala?
Niireke etthu oleihenrye awe khenrowa-tho wiiraneya?
9 Niireke Muluku ooliyala wooniherya oreera wawe murima?Aahiiso onanariwa wawe woomaliha omoriwa wawe ikharari? (Selahi)
10 Miyo kinimakela ohimya wiira: “Etthu enikixankiha* tiila:
Muluku Muulupalexa ooturuka moota aanithokorerya awe”.
11 Kinimuupuwela miteko sanyu, nyuwo Yah;*Kinimuupuwela miteko sanyu sootikiniha sa khalai.
12 Kinimuupuwelelaka miteko sanyu sootheene,Kinimuupuwelelaka itthu munivara anyu.
13 Nyuwo Muluku, iphiro sanyu ti soowaarya.
Niireke ookhala muluku ori muulupale ntoko nyuwo?
14 Nyuwo mwa Muluku eekeekhai, munipaka itthu sootikiniha.
Moowooniherya atthu ikuru sanyu.
15 Ni owerya* wanyu, moowoopola atthu anyu,Anamwane a Yakobe ni a Yosefe. (Selahi)
16 Nyuwo Muluku, maasi yaahoowehani;Maasi yaahoowehani ni yaahitupa.
Maasi oowiixerya yaahipacerya otupa.
17 Meeku yaahirupihela epula vathi.
Erimu yeeyo yaasareyale meeku, yaahikukutteya,Nave etari anyu yaahiphiya mapuro ootheene ntoko mattheere.*
18 Okukutteya wanyu waalikana ni oruma wa maroota a ikaaro saapuruliwa ni ikhavalo;Overunya wa etari waanimwaleela elapo;Elapo yaahittikinyeya ni yaahitetereya.
19 Ephiro anyu yaavira mphareya,Mphito anyu waavira eriyari ya maasi manceene;Masi khuuvo aawerya otthara opuro mwaanyakela anyu.
20 Mwaaniweettiha atthu anyu ntoko nikoto na inama,Akhapeleliwaka ni Moise ni Aroni.
Inoota
^ Nwehe Moolumo Ootthokiheriwa.
^ Eheeperi, “orweela nantiirya”.
^ Aahiiso, “enikihoma”.
^ “Yah” ti enamuna yookhuveya ya nsina na Yehova.
^ Eheeperi, “moono”.
^ Aahiiso, “mareetthe”.
