Masaalimu 76:1-12
Para tiretoore a isipo. Nihaana otthariwaka ni ikaruma sa isipo sirina mikhoyi. Nsipo na Asaafi.
76 Muluku onnisuweliwa oYuda;Nsina nawe ti nuulupale wIsarayeli.
2 Etenta* awe eri oSaleemi,Nave owo onikhala oSiyoni.
3 Weiwo, owo onnintakasa mattheere* anipatta mooro,Ni nikula na wiixaakihana,* ni espaata,* ni ikaruma sa ekhotto. (Selahi)
4 Nyuwo munnaarya vanceene;Nyuwo ti mootepa ottittimiheya ovikana miyaako sinikhala inama.
5 Atthu oolipa murima yaahaakhiwa itthu saya.
Awo yaahikhwa;Anakhotto ootheene khiyaawenrye wiixaakiha.
6 Nyuwo Muluku a Yakobe, mwaha wa opwapwa wanyu,Nakhavalo aahikhwa vamosa ni ekhavalo awe.
7 Ti nyuwo paahi munoopiha.
Ti pani oniwerya ovilela okathi munnanariwa anyu vanceene?
8 Muri ene wiirimu, mwaahaalamula awanani anyu;Elapo ya vathi yaahoova ni yaahimaala,
9 Okathi yoole nyuwo Muluku mwaavinnye anyu wiira mwaavahe ehukhumu awanani anyu,Ni wiira nwoopole atthu ootheene oowiiyeviha* anikhala mulaponi. (Selahi)
10 Okathi atthu anipaka aya itthu ananariwe ene,Nyuwo munoottottela mureerelo okathi owo wiira mwiivuwihe.
Hata etthu yookiserya nwanani anyu onipaka awe onanariwe ene,
Nyuwo munnirumeela etthu eyo wiira mwiivuwihe.
11 Mummanele Yehova Muluku anatiri anyu, ni mwaataphule,Ootheene yaale amwaattamenle, amuruuhele etthu wiira anvahe, yoovaka.
12 Owo onimwaayeviha makhulupale oowiixinnuwiha;Nave onniwiiriha mamwene a mulaponi woova.
Inoota
^ Aahiiso, “Eheema”.
^ Aahiiso, “mareetthe”.
^ Aahiiso, “eskuutu”.
^ Aahiiso, “xoowa”.
^ Aahiiso, “oomaala”.
