Masaalimu 63:1-11
Nsipo na Davidi, nenlo iipale awe okathi aari awe moothakoni mwa oYuda.
63 Khoo Muluku, nyuwo mwa Muluku aka, nlelo kinniwaavyani.
Kinnoophavelani siisaale mutthu ovoliwe ntthona oniphavela awe maasi.
Erutthu aka yootteettheya mwaha woowi kinnoophavelani,Moothakoni moowuuma ni moothuwa, muhikhanle maasi.
2 Koowaavyani nipuro noowaarya;Kihoona ikuru sanyu, ni ovuwa wanyu.
3 Ophenta wanyu woororomeleya, ti wooreerexa ovikana okumi,Miyo kinrowa woovuwihani.
4 Kinimoottottopelani okumi aka wootheene;Kinimoovekelani kiromolaka nsina nanyu.
5 Kinnihakalala okhala wiira itthu sootheene munkivaha anyu, ti sooreera,Tivonto, kinimoottottopelani ni nsu nootteeliwa murima.
6 Kinniwuupuwelani kiri ene vakhaamani;Nave kinniwuupuwelani ohiyu eriyari.
7 Ti nyuwo munikikhaliherya,Kinnikhuwela vootteeliwa murima, kiri ene vathi va mapupha anyu.
8 Kinnoovarexexani nyuwo;Nave ntata nanyu noolopwana ninnikivarexexa.
9 Masi atthu aniphavela okiiva,Anoorowa mmahiye.
10 Awo animwiiviwa ni espaata;*Anrowa okhala eyoolya ya akhwatte.
11 Masi mwene, onootteeliwa murima mwaha wa itthu Muluku onrowa awe omwiirela.
Khula mutthu onrowa olapha mwa nsina na Muluku, onootteeliwa murima,Okhala wiira eyano ya anawoothe enoowaliwa.
Inoota
^ Aahiiso, “xoowa”.
