Masaalimu 44:1-26
Para tiretoore a isipo. Nsipo na osuulu wa Kora. Maskiili.*
44 Muluku, hiyo nihiiwa ni maaru ahu,Amuhavinre ahu aanileela,Miteko sivanre anyu mahiku aya,Mahiku a khalai.
2 Ni ntata nanyu, mwaahoomola maloko,Nave mwaahaavaha amuhavinre ahu, ilapo sa maloko awo.
Mwaahihukhumu maloko awo ni mwaahoomola.
3 Amuhavinre ahu khiyaakunxe elapo ni ispaata saya,*Nave khiyaawenrye oxintta ni ikuru saya.
Masi yaahixintta mwaha wa ntata nanyu noolopwana,Ni moono anyu ni waareerela wanyu murima,
Okhala wiira mwaanaaphenta.
4 Muluku, nyuwo mwa Mwene aka;Mmwiirihe Yakobe oxintta vanceene.
5 Ni owerya wanyu, nnoowoomola awanani ahu;Mwa nsina nanyu, nnimwaaxintta ale annivirikanya.
6 Miyo nkinroromela muura aka,Nave espaata aka kheniwerya okoopola.
7 Ti nyuwo munooponle mmatatani mwa awanani ahu,Ti nyuwo nwiirinhe ale anninyokha wuuliwa muru.
8 Nihiku nootheene, nnoomuttottopela Muluku,Nave nnoottottopela nsina nanyu mahiku ootheene. (Selahi)
9 Masi vano, munninikhootta ni munniniiriha wuuliwa muru,Nave khamunaakhaliherya anakhotto ahu.
10 Munniniiriha waatthyawa awanani ahu;Ale anninyokha, anninaakha khula etthu aniphavela aya.
11 Moonivahererya wiira nikhuuriwe ntoko ipwittipwitthi;Nave moonimwara-mwarya ilapo sootheene.
12 Munnaatumiha atthu anyu mahala;Nave musurukhu ene khamumphwanyerya etthu.
13 Munniniiriha othanyiwa ni atthu anaattamenle,Nave ninniveehiwa ni otheiwa.
14 Munniniiriha okhala muhapo para atthu a mulaponi,Atthu annittikinya miru saya yaaniwehaka.
15 Nihiku nootheene kineetta oowuuliwa muru,Owiitho waka kinnoona ehaaya yinceene,
16 Mwaha wa moolumo aya ooveeha ni ooruwana,Mwaha wa nwanani ahu oninla ikuhu.
17 Soonikhumelela itthu iya sootheene, hata vari siiso, hiyo khinooliyanleni,Nnakhala khanihononne nivarihano mpanke anyu ni hiyo.
18 Murima ahu khohapunwe;Nave inawu sahu khasihiyale weetta ephiro anyu.
19 Masi nyuwo mooniiriha oxinttiwa, opuro anikhala aya alapwa a mutakhwani;Nave mooniiriha oxanka vanceene.
20 Akhala wiira nooliyala nsina na Muluku ahu,Aahiiso nihookola matata ahu ninvekelaka Muluku ohinimusuwela ahu,
21 Niireke Muluku khaarowa osuwela?
Owo onnisuwela isiiri siri vamurimani.
22 Mwaha wa nyuwo, okathi wootheene ninnivahereriwa wiira niiviwe;Ninnooniwa okhala ntoko ipwittipwitthi sinrowa wiiviwa.
23 Xontte Yehova, nvenye! Xeeni nlelo munirupa anyu?
Nvenye! Muhinikhootte mahiku ootheene.
24 Xeeni munivitha anyu owiitho wanyu?
Xeeni muniliyala anyu ohaawa wahu ni ohasuliwa wahu?
25 Khannooneliwa vatthu, nnalikana ni ntthupi.Irutthu sahu soonyakeleliwa vathi.
26 Nvenye, murwe munikhaliherye!
Munoopole mwaha wa ophenta wanyu woororomeleya.
