Masaalimu 42:1-11
Para tiretoore a isipo. Maskiili.* Nsipo na osuulu wa Kora.
42 Siisaale etthove eniphavela aya vanceene maasi,Siiso-tho, miyo kinnoophavelani vanceene, nyuwo Muluku.
2 Siisaale mutthu oniphavela awe maasi, miyo kinnoophavelani vanceene, nyuwo Muluku mukumi.
Kirwe silini wiira keemele ohoolo wanyu, nyuwo Muluku?
3 Kinninla othana ni ohiyu;Nihiku nootheene atthu annikitheya, yiiraka: “Muluku anyu ori vai?”
4 Miyo kinnuupuwela itthu iya, nave murima aka onnikiwereya vanceene,Miyo kaaneetta ni muttitthi wa atthu;Kaaneetta vakhaani-vakhaani ohoolo wa atthu awo, kirowaka empa ya Muluku,Nikhuwelaka vootteeliwa murima, ni niipaka isipo sooxukhurela,Ntoko muttitthi onipaka efesta.
5 Xeeni kixankale aka?
Xeeni kivelavenle aka?
Kinoomulipelela Muluku,Okhala wiira nlelo kinoomuttottopela ntoko Moopoli aka Muulupalexa.
6 Muluku aka, miyo kooxanka,
Tivonto kinniwuupuwelani,Mulaponi mwa oYordani ni vasulu va miyaako sa oHermoni,Vasulu va mwaako Misaari.*
7 Kinniiwa oruma wa maasi ootupa.Oruma wa maasi anyu animora.
Mawimpi anyu ootheene ootupa, aakikhupa.
8 Othana, Yehova onookooniherya ophenta wawe woororomeleya,Ohiyu, kinoomwiipela isipo,
Kinonvekela Muluku onikivaha okumi.
9 Kinoomukoha Muluku, yoowo ori mwala aka, wiira:
“Xeeni muhalaka okiliyala?
Xeeni kaarowa aka weetta kiriipiwe ene murima, mwaha wa awanani aka anikihaaxa?”
10 Awanani aka annikiruwana, akinyokhaka vanceene;Nihiku nootheene atthu annikitheya, yiiraka: “Muluku anyu ori vai?”
11 Xeeni kixankale aka?
Xeeni kivelavenle aka?
Kinoomulipelela Muluku,Okhala wiira nlelo kinoomuttottopela ntoko Moopoli aka Muulupalexa ni Muluku aka.
