Masaalimu 38:1-22
Nsipo na Davidi, noowuupuxerya.
38 Khoo Yehova, muhikipwapwele munanariwe ene,Nnakhala muhikittaruxe munanariwe ene vanceene.
2 Mattheere* anyu aakihoma,Nave ntata nanyu ninnikilemela.
3 Erutthu aka yootheene ennikiwereya,* okhala wiira moonanariwa ni miyo.
Nkirina murettele mweerutthuni mwaka, mwaha wa etampi aka.
4 Itampi saka sihuukeleya vamuru vaka;Ntoko muritti woolemela, nkiniwerya oteexa.
5 Makhwatta aka anninkha ni annikhuma oru,Mwaha wa ololo aka.
6 Kooxanka ni kooriipiwa murima vanceene;Nihiku nootheene, kinneetta kiriipiwe ene murima.
7 Mweerutthuni mwaka, munookiviha;Erutthu aka yootheene, ennikiwereya.
8 Kinnihaawa vanceene, kihinoona owereya, nave nkirina-tho ikuru;Murima aka onnikiwereya ni onnikiiriha othukumela vanceene.
9 Yehova, nyuwo munnisuwela itthu sootheene kiniphavela aka,Nave munnikiiwa okathi kinuupulela aka.
10 Murima aka onnikitthimaka, ikuru sookimalela,Nave waarya wa maitho aka, woomala.
11 Apatthani aka ni ale kineettana aka, annikisyaka mwaha wa makhwatta aka,Ale kinaasuwela aka oratteene, aneemela ottaiwene.
12 Ale aniphavela okiiva, annikireya miraakho;Ale aniphavela okikumiherya ehasara, annuulumelela okiiva;Nihiku nootheene, awo annipaka palano wiira akiwoke.
13 Masi ntoko mutthu ohiniiwa, miyo nkiniiwa;Ntoko mutthu ohinilavula, miyo nkinihula eyano aka.
14 Kiri ntoko mutthu ohiniiwa,Yoowo eyano awe ehiniwerya ohimya etthu wiira iixaakihe.
15 Yehova, miyo kihoolipelelani nyuwo,Nto nyuwo, Yehova Muluku aka, mookaakhula.
16 Miyo koohimya wiira: “Awo ahihakalale mwaha wa miyo,Aahiiso ahikihaaxe katherekuwa vale”.
17 Kaahanle vakhaani omora,Nave okathi wootheene kaanoona owereya.
18 Koohimya yoottheka aka;Miyo kaanixanka mwaha wa etampi aka.
19 Awanani aka toolipa ni oowerya,*Atthu anikinyokha vahikhanle mulattu, khareere.
20 Etthu yooreera kiwiirenle aka, aakittikiherya ni etthu yootakhala;Awo anneererya okikhoottiherya opaka itthu sooreera.
21 Khoo Yehova, muhikinyanyale!
Khoo Muluku, muhikirakamele!
22 Mwaakuve, mukikhaliherye,Xontte Yehova, moopoli aka.
Inoota
^ Aahiiso, “mareetthe”.
^ Eheeperi, “Khiivo epantta ya erutthu aka eri saana”.
^ Aahiiso, woonasa wene: “Khareere awanani aka anikinyokha vahikhanle mulattu”.
