Masaalimu 35:1-28
Nsipo na Davidi.
35 Xontte Yehova, mukaakiherye atthu ale anikilupattha;Nwane ni ale aniwana ni miyo.
2 Mukuxe nikula nanyu na wiixaakihana naamukhaani* ni nuulupale,Murwe mukaakihe.
3 Mweemexe nivaka nanyu ni mmweemexe maxatto anyu, mwawane ni ale anikoomola;
Mukihimeerye wiira: “Ti miyo kiniwoopolani”.
4 Yuuliwe muru ale aniphavela okiiva.
Ale aniphavela okipwetexa, atthikele ottuli, yuuliwe ene muru.
5 Awo alikaneke ni ikavava sinivavihiwa ni epheyo;Nlaikha na Yehova niwoomole.
6 Ephiro aya ekhale yooriipela ni yoothererya,Okathi nlaikha na Yehova ninrowa aya owoomolaka.
7 Awo annireya ntthavi wiira akiwayihe vahikhanle mulattu;Aakithipela nlitti vahikhanle nthowa.
8 Emukhumelele ehasara vootutuxerya;Ntthavi oreyale awe, ninwaye yoowo;Omorele ntthavi nenlo ni opwetexiwe.
9 Masi miyo kinootteeliwaka murima mwaha wa Yehova;Kinootteeliwaka murima mwaha wa itthu onipaka awe wiira okoopole.
10 Kinoohimya ni murima aka wootheene wiira:
“Yehova, ti pani onlikana ni nyuwo?
Nyuwo munnimoopola mutthu ovelavenle, mmatatani mwa atthu oowerya,Munniwoopola atthu ooxanka ni oohaawa, mmatatani mwa ale aniwiiyerya”.
11 Anamoona oowootha annikhumelela,Anakootherya itthu kihinsuwela aka.
12 Itthu sooreera kiniira aka, awo anikiliva ni sootakhala,Anakiiriha oriipiwa murima.
13 Masi okathi yaawereiwa aya, miyo kaaniwara esaakho;Kaaniiyeviha kitthukwaka, nave mavekelo aka yaanikitthikela ahaakhuliwe.
14 Kaaneetta kinlaka, kinakhala ntoko kaamunlela mpatthani aka aahiiso munnaka;Kaanuurama kiriipiwe ene murima, kikhalaka ntoko mutthu oniwunlela amamawe.
15 Masi okathi kaaxankale aka, awo yaahitteeliwa murima ni yaahithukumana vamosa;Yaahithukumana wiira yiipithe ni akituphele;Awo yaahikinyaanya ni khiyaahiyale okootherya itthu.
16 Atakhali annikitheya ni okinyoholela,*Awo annilumanyiha maino aya mwaha woowi aananariwa ni miyo.
17 Yehova, munrowa okiwehaka paahi mpakha silini?
Mukoopole mmatatani mwa ale anikituphela,Moopole okumi aka mmakarikhwani* mwa axaana a akharamu.
18 Nto, kinimooxukhurelani eriyari ya muloko wa atthu anceene;Kinimoottottopelani eriyari ya muttitthi wa atthu.
19 Muhaahiye ale ari awanani aka vahikhanle mulattu, ahakalalaka mwaha wa oxanka waka;Muhaahiye ale anikinyokha vahikhanle mulattu, akitheyaka.
20 Awo khanilavula moolumo a murettele,Masi, animpaka palano yoothaka, wiira yaavirikanye atthu a murettele.
21 Annihula eyano aya wiira akootherye,Yiiraka: “Ahee! Ahee! Nonweha ni maitho ahu”.
22 Khoo Yehova, nyuwo mooweha. Muhimaale.
Nyuwo Yehova, muhikirakamele.
23 Nvenye, murwe mukaakihe,Xontte Yehova, Muluku aka, mphuke mulattu aka ni exariya.
24 Khoo Yehova, Muluku aka, mukiphukele muttharaka exariya anyu,Muhimweemererye mutthu, ohakalalaka mwaha wa oxanka waka.
25 Ahikhala-khale ahimeeryanaka wiira: “Ekaa, noophwanya naaphavela ahu”!
Nnakhala ahihimye-tho wiira: “Nompwetexa”.
26 Yuuliwe muru ni aveeheye, ootheene ale anitteeliwa murima,Mwaha wa maxakha anikiphwanya.
Ale aniivuwiha mwaha wa miyo, yuuliwe muru ni anyoonyiheye.
27 Masi atteeliweke murima ale enaasivela exariya aka;Okathi wootheene ahimyeke wiira:
“Ovuwihiwe Yehova, yoowo onoona oreera okathi murumeyi awe onikhalana awe murettele”.
28 Kinimwaaleelaka atthu* exariya anyu,Nave kinimoottottopelakani mahiku ootheene.
Inoota
^ Eskuutu yaamukhaani, ikwaha sinceene, yaakuxiwa ni alipa yaavonya mareetthe.
^ Aahiiso, woonasa wene: “Atakhali anninyohola mwaha wa eyoolya vakhaani”.
^ Aahiiso, “mmakharuni”.
^ Aahiiso, “kinimuupuwelelaka”.
