Masaalimu 34:1-22
Nsipo na Davidi, nenno iipale awe okathi aikhalinhe awe ntoko namukhwa-anepa* ohoolo wa Abimeleque, yoowo aamoomonle, onarowa.
א [aalefe]
34 Okathi wootheene, kinoomuttottopela Yehova;Nkinrowa ohiya omuttottopela yoowo.
ב [beete]
2 Kinoolavula itthu suulupale sinimuhimya Yehova;Atthu oowiiyeviha animwiiwa ni anootteeliwa murima.
ג [kiimele]
3 Nyuwo ni miyo, ninvuwihe Yehova;Nivuwihe nsina nawe hoothe.
ד [taalete]
4 Kaahimukoha Yehova, nto owo aahikaakhula.
Ookoopola mwa itthu sootheene saakoopiha.
ה [he]
5 Ale anwenhe yoowo, aahakalala;Awo khanrowa wuuliwa muru.
ז [saine]
6 Mutthu ola oohaawa ohiitthana, nto Yehova ohiiwa.
Owo oomoopola mixankiho sawe sootheene.
ח [heete]
7 Nlaikha na Yehova ninnaakhapelela atthu ootheene animoova Muluku,Nave owo onniwoopola.
ט [teete]
8 Mweererye, moone wiira Yehova tooreera murima;Oohakalala tuule onitthyawela wa yoowo.
י [iyoote]
9 Ootheene nyuwo muri atthu awe, mmooveke Yehova,Okhala wiira ale animoova, khenaathowa etthu.
כ [kaafe]
10 Hata axaana a kharamu a ikuru, annivoliwa etala,Masi ale animwaavya Yehova, khasinrowa waathowa itthu sooreera.
ל [laamete]
11 Nyuwo anaaka, murwe, mukiwiriyane;Kinoowiixuttihani omoova Yehova.
מ [meeme]
12 Ti pani a nyuwo oniphavela ohakalalaka mookumini mwawe?Nave oniphavela okhala mahiku manceene ohakalalaka?
נ [nuune]
13 Weeso mukasoopeke nlumi nanyu, wiira nihilavule itthu sootakhala,Ni eyano anyu, wiira ehootheke.
ס [saameke]
14 Musyakeke itthu sootakhala, nvareke itthu sooreera.Mphaveleke murettele ni mweetteleke yoowo.
ע [iyoote]
15 Maitho a Yehova annaaweha anaxariya,Maaru awe annaawiriyana yaakhuwelaka, avekelaka okhaliheriwa.
פ [pe]
16 Masi Yehova onnaanyokha ale aniira itthu sootakhala,Onoowiiriha atthu awo oliyaliwa mulaponi.
צ [saade]
17 Awo yaahikhuwela, nto Yehova aahiwiiwa;Owo aahiwoopola atthu awo mixankiho saya sootheene.
ק [kaafe]
18 Yehova ori vakhiviru va atthu ariipiwe murima;Owo onniwoopola ale akhulumunwe.
ר [reexe]
19 Mixankiho sa naxariya khasireere waatta,Masi Yehova onnimwaakiherya sootheene.
ש [xiimi]
20 Muluku onnikhapelela makhuva awe ootheene;Khanivo ninteyale, nnakhala nimosa.
ת [taawu]
21 Mutakhali onimwiiviwa ni ehasara;Ale animunyokha naxariya, anoolamuliwa.
22 Yehova onnoopola okumi wa arumeyi awe;Khuuvo onitthyawela wa yoowo, onrowa olamuliwa.
Inoota
^ Aahiiso, “namukhwa-onepa”.
