Masaalimu 33:1-22
33 Nyuwo anaxariya, mukhuweleke vootteeliwa murima mwaha wa Yehova.
Ti vookhalela anaxariya omuttottopela owo.
2 Mmuxukhureleke Yehova mmoopaka viola mwaamukhaani;Mmwiipeleke isipo, mmoopaka viola muulupale orina mikhoyi 10.
3 Mmwiipeleke nsipo na niinaano;Mmoopeke oratteene viola owo, mukhuwelaka vootteeliwa murima.
4 Nuulumo na Yehova ti neekeekhai,Nave itthu sootheene onipaka awe ti soororomeleya.
5 Owo ennimusivela exariya ni onniphukela ohimuthanlaka mutthu.
Elapo yoosareya ophenta woororomeleya wa Yehova.
6 Yehova oopaka erimu ni nuulumo nawe,Ni iphumu sawe, owo oopaka itthu sootheene siri wiirimu.*
7 Owo onnithukumanya maasi a mphareya ntoko eparaaxe;Onnipweha maasi ootupa mwaarumasiya.
8 Elapo yootheene ya vathi, emooveke Yehova.
Atthu ootheene anikhala mulaponi-mmo, amuttittimiheke yoowo.
9 Owo aahilavula, nto itthu sootheene saahikhumelela;Owo aahiruma, itthu sootheene sikhala siiso.
10 Yehova ohaamaliha apalano a* maloko;Owo ohaahonona apalano a* atthu.
11 Masi etthu Yehova othanlale awe,* enrowa okhalaka mahiku ootheene;Itthu sinuupuwela awe vamurimani vawe, sinookhalaka para maloko ootheene, mpakha ohoolo.
12 Nloko noohakalala, ti nenle Muluku aya ori Yehova,Atthu yaawo aathanlale awe wiira akhale awawe.
13 Ori ene wiirimu, Yehova onniweha vathi-va;Owo onnaaweha apinaatamu ootheene.
14 Ori ene nipuro onikhala awe,Owo onnaaweha apinaatamu vathi-va.
15 Ti yoowo onipaka mirima sa atthu ootheene;Onivarerya miteko saya sootheene.
16 Khuuvo mwene onoopowa mwaha wa okhalana anakhotto anceene;Mutthu oowerya khonoopowa mwaha wa owerya wawe wuulupale.
17 Muhiroromele ekhavalo wiira mwaxintte okhottoni, eyo pooti woowokani.Ikuru saya sinceene khasinroromeliha wiira sinimoopola.
18 Moone! Yehova onnaaweha-weha ale animoova,Yaale anilipelela ophenta wawe woororomeleya,
19 Wiira owoopole mookhwaani,Ni owiirihe okhala akumi okathi wa etala.
20 Hiyo nimmulipelela Yehova.
Owo tonnikhaliherya ni tori nikula nahu na wiixaakihana.*
21 Hiyo ninnitteeliwa murima mwaha wa yoowo,Okhala wiira ninniroromela nsina nawe noowaarya.
22 Khoo Yehova, ophenta wanyu woororomeleya okhale ni hiyo,Noowehereryakani nyuwo.
Inoota
^ Eheeperi, “anakhotto ootheene”.
^ Aahiiso, “oomaliha miruku sa”.
^ Aahiiso, “oohonona miyuupuwelo sa”.
^ Aahiiso, “miruku sawe”.
^ Aahiiso, “eskuutu ahu”.
