Masaalimu 27:1-14
Nsipo na Davidi.
27 Yehova ti muthuko aka ni moopoli aka.
Ti pani kinrowa aka omoova?
Yehova onlikana ni empa yoolipihiwa, enikhapelela okumi aka.
Nkinrowa othukumela mwaha wa omoova mutthu.
2 Okathi atakhali anikituphela aya wiira akikhuure,Awanani aka tanikwattuliwa, anamora.
3 Hata anakhotto athukumanaka wiira akituphele,Miyo nkinrowa woova.
Hata awanani arwaaka owana ni miyo,Nlelo kinoomuroromelaka Muluku.
4 Kinninvekela Yehova etthu emosa,Nto ti yeeyo kinrowa aka ophavelaka:Okhala mpaani mwa Yehova, mahiku ootheene a okumi aka,Wiira koone oreera murima wa Yehova,Ni kitteeliwe murima, kiwehaka empa* awe.
5 Nihiku kinrowa aka oxanka, Muluku onookikhapelela mpaani mwawe;Onrowa okiipithiha opuro awe, mutentani* mwawe;Onrowa okipweha vasulu va mwala, wiira awanani aka ahikiirihe etthu yootakhala.
6 Vano, miyo kihaaxintta awanani aka anikirukurerya;Mutentani mwawe, kinoovaha mikuttho kikhuwelaka vootteeliwa murima;Kinimwiipa isipo, kimuttottopelaka Yehova.
7 Yehova, mukiiwe okathi kinikhuwela aka;Mukireerele murima ni mukaakhule.
8 Murima aka, onnuupuwela yooruma anyu enihimya wiira:
“Mwaavyeke owiitho waka”.
Khoo Yehova, kinimwaavya owiitho wanyu.
9 Muhiipithihe owiitho wanyu.
Muhimukhootte murumeyi anyu, munanariwe ene.
Ti nyuwo munikikhaliherya;Khoo Muluku aka munikoopola, muhikinyanyale ni muhikihiye.
10 Hata apaapa ni amaama akinyanyalaka,Yehova onookaakhela.
11 Xontte Yehova, mukiixuttihe ephiro anyu,Mukeettihe ephiro anyu ya xariya, mwaha wa awanani aka.
12 Muhikivahererye mmatatani mwa awanani aka,Okhala wiira aakikhumelela anamoona oowootha,Nave awo annikoopopiha okiiriha etthu yootakhala.
13 Kaarowa okhala sai,Kahaamini wiira kaamoona oreera murima wa Yehova,Nlelo kiri ene mukumi?*
14 Mmulipeleleke Yehova;Mulipe murima ni mwiilipihe.
Aayo, mmulipeleleke Yehova.
Inoota
^ Aahiiso, “etemplo”.
^ Aahiiso, “muheemani”.
^ Aahiiso, woonasa wene: “Mweekeekhai kinnaamini wiira kinimoona oreera murima wa Yehova, mulaponi mwa atthu akumi”.
