Masaalimu 26:1-12
Nsipo na Davidi.
26 Yehova, mukiphukele, okhala wiira kinneetta voororomeleya;Kinnimuroromela Yehova, kihihoveryaka.
2 Xontte Yehova, mukivarerye ni mukeehererye;Mureerihe muupuwelo aka* ni murima aka.
3 Okathi wootheene kinnuupuwela okireerela wanyu murima,Nave kinneettela ekeekhai anyu.
4 Nkinaataana* ni atthu oowootha,Nave kinnaasyaka atthu yaale anivitha mukhalelo aya.
5 Kinninyokha okhala vamosa ni atthu ootakhala,Nave kinnikhootta waataana* ni atthu ootakhala.
6 Kinoonyawa, kooniheryaka ohittheka waka,Nave kinimweetta kimurukureryaka altaari anyu, Yehova,
7 Wiira kooxukhureleni voowiiwanyeya,Ni kilaleye miteko sanyu sootheene sootikiniha.
8 Yehova, okisivela empa munikhala anyu,Weiwo ori aya ovuwa wanyu.
9 Muhikipwetexe vamosa ni anatampi,Nnakhala muhikipwetexe vamosa ni atthu ootakhala.
10 Yaawo arina mweettelo woowuuliha muru,Ni ntata naya noolopwana nneemererya okunyariwa.
11 Masi miyo, kinimweettaka voororomeleya.
Mukoopole ni mukireerele murima.
12 Nnawu naka, nri nipuro noolipa;Kinoomuttottopela Yehova, eriyari ya muloko wa atthu anceene.
Inoota
^ Aahiiso, “muupuwelo aka woowiixerya”. Eheeperi, “isyo saka”.
^ Eheeperi, “okilaathi”.
^ Eheeperi, “okilaathi”.
