Masaalimu 17:1-15
Nivekelo na Davidi.
17 Khoo Yehova, mwiiwe ovekela waka, ni mukiirele exariya;Mukiiwe oratteene okathi kinikhuwela aka wiira kikhaliheriwe;Nwiriyane ovekela waka ni murima wootheene.
2 Muthanle etthu yooreera enikiphwanya mureerelo;Maitho anyu, yoone wiira kiheettela exariya.
3 Nyuwo moovarerya murima aka, mookiweha-weha ohiyu;Mooreeriha murima aka,Nto munooweha wiira nkuupuwenle opaka etthu yootakhala,Nave eyano aka, khetthenke.
4 Miyo nkiniira ntoko akina aniira aya.Kittharaka moolumo a mwaano mwanyu, kinnisyaka iphiro sa alatarau.
5 Mukihiye keetteke mphironi mwanyu,Wiira kihimore.
6 Muluku aka, miyo kinniwiihanani, okhala wiira nyuwo munookaakhula.
Mukiwiriyane oratteene.* Mwiiwe moolumo aka.
7 Nyuwo muri Moopoli a atthu anitthyawela moono anyu woolopwana,Yaatthyawaka ale anoovirikanyani,Mooniherye ophenta wanyu woororomeleya mwa enamuna yootikiniha.
8 Mukisuke ntoko niitho nanyu;*Mukiipithihe mmapuphani mwanyu.
9 Mukoopole mmatatani mwa atakhali aniphavela okituphela,Mmatatani mwa awanani aka anikirukurerya ni aniphavela okiiva.
10 Awo khanoona othunku;Annilavula voowiixinnuwiha.
11 Vano awo aanirukurerya;Anniphavelasa okathi wooreerela, wiira animoroxe.*
12 Anlikana ni kharamu oniphavela vanceene onyaanya etthu ovanre awe,Anlikana ni kharamu mwaamukhaani iipithenle etthu.
13 Xontte Yehova, nvenye, mweemele ohoolo waya ni mwaamoroxele vathi;Mukoopole mmatatani mwa atakhali ni espaata* anyu.
14 Khoo Yehova, mukoopole ni ntata nanyu,Mukoopole mmatatani mwa atthu a olumwenku ola, yaawo aniphavela itthu sa okumi yoola paahi,Yaawo munaavaha anyu itthu sinceene sooreera,Ni anaahiyerya mihakhu anaaya anceene.
15 Masi miyo kinnivara itthu sooreera,Tivo, nyuwo munrowa okireerelaka murima.
Inoota
^ Aahiiso, “Muurame ni mukiiwe”.
^ Aahiiso, “ecera ya niitho nanyu”.
^ Aahiiso, “anirihele vathi”.
^ Aahiiso, “xoowa”.
