Masaalimu 141:1-10
Nsipo na Davidi.
141 Khoo Yehova, miyo kinniwiitthanani.
Mwaakuve, murwe mukikhaliherye.
Xontte, mukiwiriyane okathi kinoovekelaakani.
2 Mavekelo aka akhaleke oolokiheriwa saana, ntoko nsenso* munivahiwa anyu,Oxonttela waka olikaneke ni yoovaha ya ipyo, enivahiwa nuumala nsuwa okela.*
3 Khoo Yehova, mukikhaliherye okasoopa moolumo aka,Mukikhaliherye ovaha ephoole itthu kinilavula aka.
4 Muhikihiye kipakaka itthu sootakhala,Kivaraka itthu sootakhala, hoothe ni atakhali;Nnakhala kihilyeeke soolya sinaasivela.
5 Naxariya akimana, iwo waarowa okhala okiphenta,Akipwapwela, waarowa okhala ntoko ohela makhura mmuru mwaka.Nto miyo nkaarowa okhootta.
Okathi sinimukhumelela aya mixankiho, miyo nlelo kinrowa onvekelelaka yoowo.
6 Nnaamwi alipa-oophuka milattu sa atthu arowaka oriheliwa oneri,Atthu anoovahaka ephoole moolumo aka, okhala wiira moolumo awo tooreera.
7 Ntoko siisaale mutthu onipatthula awe etthaya onamwara-mwarya,Siiso-tho, makhuva ahu annimwara-mwariwa Mmahiye.*
8 Maitho aka anoowehexexani nyuwo, Pwiya Muulupalexa, Yehova.
Miyo kootthyawela wa nyuwo.
Muhikiive.
9 Mukikhapelele wiira kihimorele vantaphani akireyale aya,Ni miraakho sa atakhali.
10 Atakhali ootheene, anoomorela mmatthavini mwaya,Masi miyo kinimoopowa.
Inoota
^ Aahiiso, “erupani”.
^ Woonasa wene, onihimmwa nuumala nsuwa okela, masi vahinatthi opacerya wiila.
^ Nwehe Moolumo Ootthokiheriwa.
