Masaalimu 121:1-8
Nsipo na Atthu Aniwela.
121 Kinnivenxa maitho aka, kiwehaka omwaako, kinahimya wiira:
“Ti pani onrowa okikhaliherya?”
2 Miyo kinikhaliheriwa ni Yehova,Mpattuxa a erimu ni a elapo ya vathi.
3 Owo khonikhala-khala oohiyakani wiira mutherekuwe.
Ole onookhapelelani, khasininvola ikhove.
4 Moone! Ole onimukhapelela Isarayeli,Khonikhala-khala simurweelaka ikhove nnakhala khonirupa.
5 Yehova tonookhapelelani.
Yehova ti muuttutthi anyu, yoowo ori moono anyu woolopwana.
6 Othana, nsuwa khaninrowa woowereyani,Nnakhala mweeri ohiyu.
7 Yehova onoowaakiheryani itthu sootheene sootakhala.
Owo onookhapelela okumi anyu.
8 Yehova onimookhapelelani mwa itthu sootheene munivara anyu,Okhuma olelo-va mpakha mahiku ootheene.
