Masaalimu 107:1-43
107 Mmuxukhureleke Yehova, okhala wiira owo tooreera murima;Ophenta wawe woororomeleya onikhala mahiku ootheene.
2 Nto ale yoopoliwe ni Yehova ahimyeke siiso,Yaale owooponle awe mmatatani mwa awanani,
3 Yaawo aathukumannye awe mulaponi,Mpantta onikhuma nsuwa ni onikela nsuwa,Onorti ni osuuli.
4 Awo yaaneettakasa moothakoni, mapuro ahinikhaliwa;Khiyaaphwannye ephiro yaaroiha opooma, weiwo yaarowa aya okhalaka.
5 Awo yaahivoliwa etala ni ntthona;Yaahikhulumuwa anahala okhwa.
6 Okathi yaaxanka aya, yaanimukhuwelela Yehova;Owo aaniwoopola mwaha wa mixankiho saya.
7 Owo aahiwiiriha weetta ephiro yooloka,Wiira aphiye epooma yaarowa aya okhalaka.
8 Atthu amuxukhureleke Yehova, mwaha wa ophenta wawe woororomeleya,Nave mwaha wa miteko sawe sootikiniha oniwiirela awe apinaatamu.
9 Owo aahinvaha maasi mutthu aavoliwe ntthona,Nave aahinvaha eyoolya yooloka mutthu aavoliwe etala.
10 Akina yaakhala mweepiphini yuulupale,Yaari maperesu yaahaawa ni yaatthukiwe ni ekwirinti ya eyuuma.
11 Awo khiyiiwelenle nuulumo na Muluku;Ni khiyaattittiminhe miruku sa Muluku Muulupalexa.
12 Tivonto, aahihiya wiira saakhumelele mixankiho wiira yiiyevihe;Awo yaahikwattuliwa,* nto khuuvo aawenrye waakhaliherya.
13 Okathi yaaxankale aya, yaahinvekela Yehova wiira aakhaliherye;Owo aahiwoopola mmixankihoni mwaya.
14 Owo aahaakumiha mweepiphini yuulupale,Nave aahikwasa ikwirinti saya.
15 Atthu amuxukhureleke Yehova, mwaha wa ophenta wawe woororomeleya,Nave mwaha wa miteko sawe sootikiniha oniwiirela awe apinaatamu.
16 Owo oopwexa mikhora sa ekoopiri,Nave oonyaanya itaranka sa eyuuma.
17 Alolo yaahihaawa,Mwaha wa soottheka saya ni itampi saya.
18 Khiivo eyoolya yaasivela;Awo yaahanle vakhaani okhwa.*
19 Okathi yaaxanka aya, yaaninvekela Yehova wiira aakhaliherye;Owo aaniwoopola mwaha wa mixankiho saya.
20 Aaniruma masu awe, nto aanaapenuxa,Aaniwoopola wiira ahikhwe.
21 Atthu amuxukhureleke Yehova, mwaha wa ophenta wawe woororomelaya,Nave mwaha wa miteko sawe sootikiniha oniwiirela awe apinaatamu.
22 Avaheke mikuttho sa oxukhurela,Ni alaleyeke miteko sawe atteeliwe ene murima.
23 Atthu yaale aneetta ni apakiti mphareya,Yaale aniweetta anakoso mmaasini oowaatta,
24 Aaweha miteko sa Yehova,Ni miteko sawe sootikiniha mphareya.
25 Aaweha moota nuulumo nawe, nikumihenrye aya epheyo yuulupale,Khuvenxa mawimpi a mphareya.
26 Mawimpi annaaroiha osulu;Ni annaarihela eriyari ya ephareya.
Mooxankani mwaya, olipa waya murima onnimala.
27 Awo anniveveleya,* anamora ntoko namuhapaliwa,Osuwela waya wootheene, khonivareleya muteko.
28 Okathi anixanka aya, annimukhuwelela Yehova,Nto owo onniwoopola mwaha wa mixankiho saya.
29 Onnimaaliha epheyo yuulupale.Mawimpi a mphareya annimaaleleya.
30 Awo annitteeliwa murima okathi mawimpi animaaleleya aya,Nave onnaahoola epoortu* aniphavela aya.
31 Atthu amuxukhureleke Yehova, mwaha wa ophenta wawe woororomelaya,Nave mwaha wa miteko sawe sootikiniha oniwiirela awe apinaatamu.
32 Atthu awo amuttottopeleke eriyari ya atthu athukumanne,Nave amuttottopeleke eriyari ya axitokweene athukumanne.
33 Onnuumiha miro, khukhaliha othako,Nave onnuumiha mapuro aniphattuwa maasi, khukhaliha etthaya yoowuuma.
34 Onniiriha etthaya yooruwerya okhala etthaya ya maakha,Mwaha wa otakhala wa atthu anikhala memmo.
35 Onniiriha othako okhala matthiya arina malaxi,Nave onniiriha etthaya yoowuuma okhala mapuro aniphattuwa maasi.
36 Onniwiiriha atthu enaavola etala, okhalaka memmo,Wiira ateke epooma, ekhaleke-mo.
37 Annilima imatta ni annaala miri sa ewuuva,Seiyo siniruwerya mihokorokho sinceene.
38 Onnaareeliha atthu awo, anatepa waatta;Khonihiya ipooyi saya sivukuwaka.
39 Masi awo aatthikela okhala vakhaani ni ahuuliwa muru,Mwaha wa ohasuliwa, ehasara, ni ohaawa.
40 Owo onnaathanya makhulupale,Nave onniwiiriha weettakasa moothakoni, muhikhanle ephiro.
41 Masi onnaakhapelela* alipa-oohaawa, yaawo anihaaxiwa,Nave onniiriha imusi saya waatta ntoko nikoto na inama.
42 Anaxariya anniweha eyo, anatteeliwa murima;Masi ootheene ale ahikhanle anaxariya, annimaala.
43 Mutthu orina ankhili, onimuupuwelela itthu iya,Onoothokorerya oratteene miteko sa Yehova, seiyo sinooniherya ophenta wawe woororomeleya.
Inoota
^ Aahiiso, “yaahikwathula”.
^ Eheeperi, “Awo yaahaattamela mikhora sa wookhwaani”.
^ Aahiiso, “anniveveruwa”.
^ Aahiiso, “epantari”.
^ Aahiiso, “onnaapweha nipuro noorakamela osulu”, eyo piiyo, nipuro ohiniphiya mutthu.
