Luka 12:1-59
-
Eferemento ya afarisi (1-3)
-
Mmooveke Muluku, ohiya atthu (4-7)
-
Weemererya okhala oowiiraana ni Kristu (8-12)
-
Nlikanyiho na thaaciri mulolo (13-21)
-
Muhiye oxanka (22-34)
-
Nikoto naamukhaani (32)
-
-
Okhala oowehaweha (35-40)
-
Murumeyi oororomeleya ni murumeyi oohiroromeleya (41-48)
-
Nkiruuhale murettele, masi kiruuhale ohiiwanana (49-53)
-
Oreerela waya osuwela ithoonyeryo sa okathi (54-56)
-
Ophuka milattu (57-59)
12 Okathi owo, muttitthi wa atthu ikonto-ikonto sene, waahithukumana, onaphunyana. Vano, Yesu aapacenrye toko waaleela awiixutti awe wira: “Mwiikasoope saana ni eferemento ya afarisi, eyo piiyo, wootha.
2 Tthiri, khiivo etthu yiipithihiwe saana, ehinrowa wooniheriwa, nave khiivo esiiri ehinrowa osuweliwa.
3 Tivo, etthu enilavula anyu wiiphiini, enrowa wiiwanyeya nipuro noowaatta atthu. Nave, etthu enilavula anyu muri ene okwartu, enoolaleiwa vampani.
4 Nave-tho, kinooleelani nyuwo, apatthani aka, wira muhiwooveke ale aniwerya owiivani, nuumala-vo ahinawerya-tho opaka etthu ekina.
5 Masi kinoowooniheryani ole mukhanle anyu oomoova: Mmooveke Ole oniira amwiiva mutthu, onawerya omurihela oGehena.* Aayo, kinoohimeeryani wira mmooveke Yoowo.
6 Kiira iphera thanu sinnitumihiwa musurukhu miili orina efaita vakhaani?* Masi, Muluku khonliyala hata ephera emosa.
7 Nave, ikharari sotheene sa mmuruni mwanyu, sookontariwa. Muhoove, nyuwo mookhalana efaita yuulupale ovikana iphera sinceene.
8 “Ole onihimya ohoolo wa atthu wira mwiixutti aka, nave-tho miyo kinoohimya ohoolo wa malaikha a Muluku wira mwiixutti aka.
9 Masi ole onikikhootta ohoolo wa atthu, nave miyo kinoomukhootta ohoolo wa malaikha a Muluku.
10 Ole oninveeha Mwaana a mutthu, onooleveleliwa. Masi ole oniveeha munepa woowaarya, khonleveleliwa.
11 Okathi muniroihiwa anyu opuro athukumanne atthu anceene* aahiiso wa makhulupale a kuvernu ni anamalamulela, muhixanke ni etthu yoolavula ni moota munrowa anyu wiixaakiha,
12 okhala wira munepa woowaarya onoowiixuttihani ewoora yeeyo, itthu sinreerela ohimya”.
13 Vano mutthu mmosa aari eriyari ya muttitthi, aahinvekela Yesu wira: “Mwiixuttihi, mmuleele munnaka wira okikawele muhakhu ohiyeriwe ahu”.
14 Yesu aahimuhimeerya wira: “Mulopwana, ti pani okikhalinhe mphuki aahiiso mulipa-ookawa muhakhu ohiyeriwe anyu?”
15 Vano Yesu aahihimeerya muttitthi wa atthu wira: “Mwiikasoope ni musyake ohiphiyeriwa, maana hata mutthu orina ene itthu sinceene, itthu iyo khasininvaha okumi”.
16 Nuumala-vo, Yesu aahaaleela nlikanyiho nimosa, oriki: “Mulopwana mmosa oothaaciri, aahiruwerya vanceene.
17 Owo aahipacerya wuupuwela so: ‘Nkirina nipuro noosuka yoolya aka, nto kiireke sai?’
18 Vano, aahihimya wira: ‘Kinrowa wira so: Kinrowa waapwexa arumasiya aka, kaateke aalupale. Nto kinrowa osuka memmo ipyo saka ni mireerelo saka sotheene.
19 Nuumala-vo, kinimwiixiirela: “Nyuwo mookhalana mireerelo sinceene sisukiwe, seiyo siniphiyerya iyaakha sinceene. Mmumuleke, mulyeeke, nwuryeke, ni mpuheke”’.
20 Masi Muluku, onoomuhimeerya wira: ‘Nyuwo mulolo, ohiyu yoola munimookhwa.* Vano, ti pani onrowa ohalana mireerelo sanyu?’
21 Eyo ti etthu eniiraneya ni mutthu oniithukumanyerya muhakhu, masi ohinakhala thaaciri vamaithoni va Muluku”.
22 Nto Yesu aahaaleela awiixutti awe wira: “Tivo kinooleelakani wira, muhiye oxanka mwaha wa ikumi sanyu, muupuwelaka etthu yoolya, aahiiso etthu yoowara.
23 Okumi wookhalana efaita yuulupale ovikana yoolya, nave erutthu ovikana yoowara.
24 Nkaaweheeni anakhuku: Awo khanaala, nnakhala khanihepha, hata kharina ntatha nnakhala arumasiya. Hata vari siiso, Muluku onnaaphwanyiha yoolya. Ankhi nyuwo, niireke khamurina efaita waavikana axipalame?*
25 Ti pani a nyuwo oniwerya orakamiha vakhaani okumi awe mwaha wa oxankiheya?
26 Vano, vakhala wira khamuniwerya opaka etthu yaamukhaani siisa, xeeni munixanka anyu ni itthu sikina?
27 Nkawehani moota ifilori sa mmatta* sininnuwa aya: Iyo khasinvara muteko, nnakhala khasintthava ikuwo. Masi, kinooleelani wira hata mwene Salomoni, ni ovuwa wawe wotheene, khonaware ntoko ifilori iya.
28 Vano, vakhala wira Muluku onniwariha siisa malaxi a mmatta, yaawo anikhala olelo, meelo khupahiwa, niireke khonrowa otepa woowarihani nyuwo, atthu oowaamini vakhaani?
29 Tivo, muhiye oxanka mwaha wa etthu munrowa anyu olya ni owurya, nave muhiye oxanka vanceene.
30 Tthiri, iya ti itthu siniphavelexiwa ni atthu a mulaponi. Masi, Tiithi inyu, onnisuwela wira itthu iya sotheene sinnoothowani.
31 Ohiya-vo, khula okathi, muheleke opuro woopacerya Omwene wa Muluku. Vano, itthu iya munimuncereriwa.
32 “Muhoove, nyuwo nikoto naamukhaani, okhala wira Tiithi inyu, vaamusivela woovahani Omwene.
33 Mutumihe mireerelo sanyu, nto musurukhu ene mwaavahe alipa-oohaawa.* Mwiipakeleke mirupa sa musurukhu sihinthaala, eyo piiyo, mihakhu sa wiirimu sihinimala, weiwo alatarau ahiniphiya aya, nnakhala sihinilyiwa aya ni oweexe.
34 Tthiri, vaavo siri mihakhu sanyu, vaavo-tho ti sinrowa aya okhala mirima sanyu.
35 “Nware ikuwo sanyu sa muteko ni mukhale oolikana. Mpattihe ixamaniiya sanyu.
36 Muhaana okhala ntoko arumeyi animulipelela pwiya aya, onitthika ofestani ya ekasamento.* Nto okathi oniphiya awe, onamana mukhora, awo anoowerya waakuva omuhulela.
37 Arumeyi oohakalala, taale pwiya aya onrowa awe waaphwanya awehawehaka! Kinooleelani ekeekhai wira, pwiya owo onoowara ikuwo sa muteko sa murumeyi ni onimwaaruma okilaathi, ahameele vameesa. Nto owo onimoorwa okhale naawo, aarumeeleke.
38 Vano, hata pwiya aya orwaaka ohiyu,* aahiiso ohiyu eriyari,* aaphwanya awehawehaka, awo toohakalala!
39 Musuwele etthu ela: Mwaneene etthoko aasuwenle ewoora onrwa awe latarau, khaamuhiya latarau okelaka mpaani mwawe.
40 Nyuwo-tho, mukhale oolikana ene, okhala wira Mwaana a mutthu onirwa ewoora muhinuupuwela anyu”.
41 Vano Pedru aahimukoha Yesu, oriki: “Pwiya, nlikanyiho nla, munnileela hiyo paahi, wala munaaleela atthu otheene?”
42 Nto Pwiya aahaakhula wira: “Ti pani tthiri ori murumeyi* oororomeleya, orina ankhili,* yoowo pwiya awe omuthanlale awe oweettiha arumeyi awe otheene,* wira aavaheke yoolya voohihiyererya, okathi wooreerela?
43 Oohakalala ti murumeyi yoole oniira pwiya awe aarwaaka, onamphwanya ovaraka muteko!
44 Mweekeekhai, kinooleelani wira, pwiya owo onoomuthanla murumeyi owo wira eettiheke muhakhu awe wotheene.
45 Masi vakhala wira murumeyi owo onoohimya vamurimani vawe wira: ‘Pwiya aka onnipisa orwa’, onapacerya waamanakasa arumeyi akhwaawe, ni onalya ni owurya mpakha ohapaliwa,
46 pwiya a murumeyi owo, onimoorwa nihiku ohinlipelela awe, ni ewoora ohinsuwela awe. Nto onoomuhaaxa vanceene, onoomurihela opuro wa atthu oohiroromeleya.
47 Murumeyi ole onisuwela etthu eniphavela pwiya awe, masi ohinakhala oolikana ene aahiiso ohinapaka ele evekeliwe awe ni* pwiya awe, onoomaniwa ikwaha sinceene.
48 Vano ole ohinisuwela etthu oniphavela pwiya awe, masi onapaka itthu siniphwanelela omaniwa, onoomaniwa ikwaha vakhaani. Tthiri, ole ovahiwe itthu sinceene, onoovekeliwa itthu sinceene, nave ole ororomeliwe itthu sinceene, onrowa otepa ovekeliwa itthu sinceene.
49 “Miyo kirwenle opattiha mooro vathi-va. Mooro owo woopatta khalai ene, tivonto nkiniphavela-tho etthu ekina.
50 Veekeekhai, kookhalana opatiso kinrowa aka opatisaniwa. Nlelo kinooxanka mpakha opatiso owo omala!
51 Munuupuwela wira kiruuhale murettele vathi-va? Nnaari, nkiruuhale murettele. Kinooleelani wira kiruuhale ohiiwanana.
52 Okhuma olelo orowa ohoolo, onookhala okawanyeya vatthokoni. Yakhala atthu athanu etthoko eyo, araru anrowa waavirikanyaka anli, vano anli anrowa waavirikanyaka araru.
53 Atthu awo anookawanyeya: paapa ononvirikanya mwanawe mwaamulopwana, mwaana mwaamulopwana ononvirikanya paapa awe. Maama ononvirikanya mwanawe mwaamuthiyana, mwaana mwaamuthiyana ononvirikanya maama awe. Maathi ononvirikanya mwaara a mwanawe, muthiyana ootheliwa onimwaavirikanya amaathi awe”.
54 Nave-tho, Yesu aahihimeerya mittitthi iye sa atthu wira: “Mwaawehaka neeku nikhumelelaka onikela nsuwa, nyuwo munnihimya wira: ‘Ennoorwa epula ni epheyo yinceene’. Nto eyo enniiraneya.
55 Vano, yoopaka epheyo ya osuuli,* nyuwo munnihimya wira: ‘Vanooviha vanceene’. Nto eyo enniiraneya.
56 Anawoothe! Nyuwo munnisuwela otaphulela makhalelo a vathi ni a musulu. Nto xeeni muhinisuwela anyu otaphulela okathi ola ninkhala ahu?
57 Xeeni muhinisuwela anyu etthu ya xariya munireerela anyu opaka?
58 Mwa ntakiheryo, mwaarowaka omilattuni ni mutthu mmutthekenle anyu, mwiimananihe ophuka mulattu anyu nuuwo, nlelo mweettaka mphironi, wira ohoovahereryeni mulipa-oophuka. Nto mulipa-oophuka owo, ohoovahereryeni kwarta ookhatteya, wira owo ooriheleni mukhatteya.
59 Kinooleelani ekeekhai wira: Khamunikhuma mukhatteya-mmo, muhilinve musurukhu wotheene”.*
Inoota
^ Nwehe Moolumo Ootthokiheriwa.
^ Ekereku, “musurukhu miili wa asaario”.
^ Aahiiso, woonasa wene: “musinagoga”.
^ Aahiiso, “okumi anyu onoophaveliwa”.
^ Aahiiso, “axinuuni”.
^ Aahiiso, “iliiriyu”.
^ Nwehe Moolumo Ootthokiheriwa.
^ Aahiiso, “oniirani na othela”.
^ Okhuma 9 oora ya ohiyu mpakha ohiyu eriyari.
^ Okhuma ohiyu eriyari mpakha 3 oora ya voosiisu.
^ Aahiiso, “namuteko onihoolela vatthokoni”.
^ Aahiiso, “miruku”.
^ Aahiiso, “anamuteko a vatthokoni”.
^ Aahiiso, “oniphavela awe”.
^ Aahiiso, “okuusini”.
^ Ekereku, “eleepita yookiserya”.
