aRoma 1:1-32
1 Epaphelo ela ti ya Paulo, murumeyi a Kristu Yesu. Miyo kihiihaniwa wira kikhale murummwa, ni koothanliwa wira kilaleye ihapari sooreera sa Muluku.
2 Muluku aahileiherya khalai ene ihapari iyo sooreera mwa Soolempwa soowaarya, aarumeelaka maprofeta awe.
3 Ihapari iyo, sinimuhimya Mwanawe, yoowo aari osuulu* wa Davidi.
4 Ninnisuwela wira owo Mwaana a Muluku, okhala wira Muluku aahirumeela owerya wa munepa awe woowaarya, wira omuhihimuxe mookhwaani: Mwaana owo, ti Yesu Kristu, Pwiya ahu.
5 Omurumeelaka yoowo, Muluku oonooniherya oreera wawe murima wuulupale. Yesu ookithanla wira kikhale murummwa, wira kaakhaliherye atthu a maloko otheene waamini, wiiwelela ni ottittimiha nsina nawe.
6 Nyuwo-tho, muhiihaniwa eriyari ya atthu yaawo yiihaneliwe omutthara Yesu Kristu.
7 Epaphelo ela aniroiheliwa otheene ale anikhala oRoma, yaawo aniphentiwa ni Muluku, yaawo-tho owiihanne awe wira akhale oowaarya:
Oreera murima wuulupale ni murettele wa Muluku Tiithi ihu, ni wa Yesu Kristu Pwiya ahu, okhale ni nyuwo.
8 Opacerya wene, kinnimuxukhuru Muluku aka mwa Yesu Kristu, mwaha wa nyuwo, okhala wira waamini wanyu, onnilavuliwa olumwenku wotheene.
9 Kinnimurumeela Muluku ni murima aka wotheene, kilaleyaka ihapari sooreera sinimuhimya Mwanawe. Nave, Muluku onnisuwela wira nkinikhala-khala kihiyaka wooromolani okathi onivekela aka.
10 Kinnivekela wira, vaweryaneya vale, aahiiso Muluku aphavela, kiwerye orwa ori anyu.
11 Tthiri, kinniphavela vanceene woowehani, wira kookaweleni mareeliho anikhuma wa Muluku, wira waamini wanyu olipe,
12 aahiiso, kiire so, wira otheene ahu nlipihane ni waamini khula mmosa a hiyo orina awe.
13 Anna, kiniphavela musuweleke wira, ikwaha sinceene kaaniphavela orwa ori anyu, wira kiwiixuttihe atthu a weiwo okhala awiixutti, ntoko kiirale aka ilapo sikina. Masi khula okathi, yookhala etthu enikikhoottiherya orwa iwo.
14 Miyo kookhalana muritti* woowaalaleerya atthu otheene: akereku ni ale ahikhanle akereku, ale arina miruku ni ale ahirina miruku.
15 Nave, kinniphavela vanceene woolaleeryani ihapari sooreera, nyuwo munikhala oRoma.
16 Miyo nkinuuleliwa muru ihapari sooreera. Tthiri, ihapari sooreera ti owerya Muluku onirumeela awe wira omoopole khula mutthu onaamini, opacerya muyuda, nave-tho mukereku.
17 Exariya ya Muluku, annooniheriwa ale anooniherya waamini, ni ennilipiha waamini waya, ntoko Soolempwa sinihimya aya wira: “Masi naxariya onookhala mukumi mwaha wa waamini”.
18 Muluku a wiirimu onniwooniherya oviruwa atthu ahinimwiiwelela, ni ahineettela exariya. Awo annipaka itthu sootakhala wira yaakhoottiherye atthu osuwela ekeekhai.
19 Awo ahaana omusuwela Muluku, okhala wira Muluku owo, oowooniherya itthu sinceene.
20 Tthiri, mikhalelo sa Muluku nihinwerya ahu woona, ninnisuwela naasomaka moota olumwenku opattuxiwe aya. Hiyo nnoowerya wiixutta moota Muluku ori awe, nitokosaka itthu opanke awe. Itthu iyo sinnooniherya owerya wawe ohinimala, ni wira owo ti Muluku. Tivonto, ale ahinicalela soowooniherya iyo, kharina mathowa a ohimukupali Muluku.
21 Nnaamwi yaamusuwela Muluku, awo khiyanvuwinhe, nnakhala khiyaamuxukhurenle. Masi awo khiyuupuwela etthu, nnakhala khiyaiwexexa etthu.
22 Hata yaahimya wira aakhalana ankhili, yaahooniherya ohikhalana ankhili.
23 Ohiya omuttittimiha Muluku, yoowo ohinikhwa, awo anittittimiha ilatarato sinilikana ni pinaatamu, yoowo onikhwa, vamosa ni ilatarato sa axipalame,* sa inama sa metto mixexe, ni iye siniipurula.
24 Tivo, Muluku aahaahiya apakaka itthu soohiloka, ntoko waaphavela aya murima aya, itthu seiyo saananariha irutthu saya.
25 Awo aaturuka ekeekhai ya Muluku, ni wootha. Nave, annikokhorela ni orumeela itthu sipattuxiwe, omuhiya Mpattuxa, yoowo oniphwanela ovuwihiwa mahiku otheene. Amen.
26 Tivo, Muluku ohaahiya epakaka itthu soowuuliha muru. Athiyana khaniphavela orupihiwa* ni alopwana, masi aniphavela orupihana athiyana-ru paahi. Eyo ennivirikanya makhalelo a ephattu.
27 Siiso-tho, alopwana aahiya waarupiha athiyana, ntoko makhalelo a ephattu alimaleliwe, masi aniphavela paahi orupihana alopwana-ru, apakaka itthu soowuuliha muru. Nto awo animwaakhela* voomalela ehukhumu aniphwanela aya, mwaha wa miteko saya soonanara.
28 Nto okhala wira awo khiyoona oreerela omusuwela saana Muluku, owo ohaahiya athipeleleka wuupuwela itthu soohiloka, ni opaka itthu yahaakhanle aya oopaka.
29 Atthu awo, yaahitepa ohikhalana exariya, otakhala, ohiphiyeriwa, wiira itthu soonanara. Nave yaari ananrima, anawiive, oowana, oowootha, oolavilavi, oohankawaani,
30 oowaapa, oomunyokha Muluku, ooveeha, oowiixinnuwiha, oowiittottopa, yanaapaka apalano ootakhala, oohiwiiwelela axipapaya ni aximamaya,
31 oohikhalana miruku, oohiroromeleya ni sooleiherya saya, oohaaphenta akhwaaya, ni oohimoriwa ikharari.
32 Awo annisuwela oratteene ele Muluku enihimya awe, wira atthu anipaka itthu iyo, aniphwanela okhwa. Hata vari siiso, awo annithipelela opaka itthu iyo ni anniweemererya ale anipaka itthu iyo.
Inoota
^ Ekereku, “mmiso”.
^ Ekereku, “kinnilokihiwa”.
^ Aahiiso, “axinuuni”.
^ Aahiiso, “orupihana”.
^ Aahiiso, “anooliviwa”.
