aKolosi 3:1-25
3 Okhala wira moohihimuxiwa mookhwaani vamosa ni Kristu, weeso muthipeleleke ophavela itthu sa wiirimu, weiwo Kristu okilanthi awe moono woolopwana wa Muluku.
2 Muupuweleke itthu sa wiirimu, ohiya itthu sa vathi-va.
3 Nyuwo muhookhwa, nave okumi anyu woovithiwa vamosa ni Kristu, okhala wira eyo ennivarihana ni ele Muluku oniphavela awe.
4 Okathi Kristu, yoowo ori okumi ahu, onrowa awe wiixooniherya, nyuwo-tho munimooniheriwa vamosa nuuwo ni ovuwa.
5 Vano, mwiive soophavela soohiloka sa erutthu anyu: orupihana woohiloka,* itthu soonanara, osiveliwa orupihana woohiloka, soophavela soohiloka ni ohiphiyeriwa, eyo piiyo, waakokhorela amuluku eethiru.
6 Onanariwa wa Muluku onimwaaphwanya ale aniira itthu iyo.
7 Ola ti waari mweettelo anyu khalai, mwaavara anyu soonanara iyo.*
8 Masi vano mukhootteke itthu iya sotheene: oviruwa, onanariwa, otakhala murima, oveeha, ni oruwana, nnakhala sihikhume mwaano mwanyu.
9 Muhootheryaneke. Murule omutthu wa khalai ni miteko saya,
10 nto nware omutthu wa niinaano, yoowo onikhalihiwa musya ni osuwela weekeekhai, onalikana ni omutthu wa Muluku opattunxe.
11 Omutthu owo wa niinaano khuuvo mukereku aahiiso muyuda, mutthu oowinnuwihiwa nnakhala oohinnuwihiwa, epottha wala mutthu ootaphuwa, mmalapo, Xiitha,* maana otheene anoolikana; masi Kristu tori sotheene mwa itthu sotheene.
12 Okhala wira moothanliwa ni Muluku, ni mwa atthu oowaarya ni oophentiwa, mooniheryeke* othunku, oreera murima, wiiyeviha,* omaala ni opixa murima.
13 Nvilelaneke, mulevelelaneke ni murima wotheene ikwaha sotheene, hata musuwelaka wira mootthekeliwa. Ntoko Yehova oolevelenlyaaweni, ni nyuwo-tho mwiireke siiso.
14 Ovikana itthu sotheene iya, mooniheryeke* ophenta, okhala wira ophenta iwo onniwiiraaniha atthu otheene voomalela.
15 Nave-tho, murettele wa Kristu weettiheke mirima sanyu, okhala wira muhiitthaneliwa murettele owo wira mukhale erutthu emosa-ru. Mukhaleke atthu ooxukhuru.
16 Nuulumo na Kristu nikhale ni nyuwo ni noovaheeni miruku sotheene. Muhihiyererye wiixuttihana ni olipihana* ni masaalimo, munvuwihaka Muluku, ni isipo soomutthapela ni omuxukhuru. Mmwiipeleke Yehova ni murima anyu wotheene.
17 Khula etthu enihimya anyu aahiiso eniira anyu, mwiireke mwa nsina na Pwiya Yesu, nave mmuxukhuruku Muluku Tiithi, mwa Yesu.
18 Nyuwo athiyana, nwiiweleleke aiyanyu voohinlaseya, ntoko simphavela aya Apwiya.
19 Nyuwo alopwana, muhihiye waaphenta amwaarinyu ni muhaaviruweleke.*
20 Nyuwo anamwane, nwiiweleleke apapinyu ni amaminyu mwa sotheene, okhala wira eyo ennaasivela Apwiya.
21 Nyuwo axipaapa, muhaanyonyiheke* aniinyu, wira ehooceye.*
22 Nyuwo ipottha, nwiiweleleke ale munaavarela anyu muteko vathi-va mwa sotheene, khahiyo okathi anoowehaayani paahi, wira mwaasivelihe atthu,* masi mwaarumeeleke ni murima wooreera, mwaha wa omoova Yehova.
23 Khula etthu munipaka anyu, mpakeke ni okumi* anyu wotheene, ntoko munimurumeela Yehova, ohiya atthu.
24 Moosuwela wira Yehova tonrowa wootthuvelani, oovahakani sooreera aasukenrye awe atthu awe. Munvareleke muteko Pwiya, Kristu.
25 Tthiri ole oniira sootakhala onooliviwa ni sootakhala siniira awe, maana Muluku khonimuthanla mutthu.
Inoota
^ Ekereku, porneía. Nwehe Moolumo Ootthokiheriwa.
^ Aahiiso, “mwaakhalela anyu soonanara iya”.
^ Xiitha, eyo piiyo, atthu ootakhala yaakhala otakhwani.
^ Aahiiso, “nware”.
^ Aahiiso, “wiiyeviha mmuupuweloni”.
^ Aahiiso, “nware”.
^ Aahiiso, “otumereryana”.
^ Aahiiso, “muhahaaxeke”.
^ Aahiiso, “muhaapaceke; muhaananariheke”.
^ Aahiiso, “ahiriipiwe murima”.
^ Ekereku, “mphavelaka wooniwa paahi, wira mwaahakalalihe atthu”.
^ Nwehe Moolumo Ootthokiheriwa ani: “Okumi”.
