aHeeberi 6:1-20
6 Vano nikupanli ahu soowiixuttiha soopacerya sinimuhimya Kristu, nroweke ohoolo wira nikhalane waamini woolipa. Nihitthikele-tho itthu soopacerya niixuntte ahu, eyo piiyo, ottharuwa miteko seethiru ni omwaamini Muluku,
2 ni inamuna soovirikana sa opatiso ni owiixaatherya matata atthu, ohihimuxiwa wa alipa-ookhwa ni ophukeliwa ohinimala.
3 Nikhaliheriwaka ni Muluku, nnoowerya okhalana waamini woolipa.
4 Atthu akina aakhootta soowiixuttiha seekeekhai, nave khuuvo oniwerya waakhaliherya orukunuxa murima aya. Awo aamwaleeliwa. Aavahiwa etthu enikhuma wiirimu, nave ahaakhela munepa woowaarya.
5 Ahaakhela nuulumo nooreera na Muluku, ni mareeliho* a olumwenku* onirwa.
6 Nto, khivanweryaneya waakhaliherya, okhala wira annimukhomela-tho Mwaana a Muluku vamwirini, ni anniwiiriha atthu omutheya.
7 Etthaya, yeeyo enrupeliwa epula ikwaha sinceene, enanuula maasi a epula eyo, enaruwerya mihokorokho sinaakhaliherya atthu alimme, ennireelihiwa ni Muluku.
8 Masi vakhala wira etthaya eyo enniimiha miiwa ni malaxi, khenvareleya muteko, nave voohipisa Muluku onrowa olapha. Nto wookiseryani waya, enoopahiwa.
9 Vano, axinnaka oophentiwa, nnaamwi nilavulaka siiso, ninnikupali itthu sooreera sinrowa wookhumelelani, seiyo sinrowa owiirihani woopoliwa.
10 Tthiri, Muluku naxariya, owo khonrowa oliyala muteko anyu ni ophenta wanyu nsina nawe, mwaarumeelaka ni muhihiyaka waarumeela ale oororomeleya.*
11 Masi, nimphavela wira khula mmosa a nyuwo okhalaneke nthiti, wira ororomeleke voomalela mpakha wookiseryani.
12 Siiso, khamunrowa okhala oowoolowa,* masi munimwaatakiha ale anaakhela itthu sileiheriwe, mwaha wa waamini ni opixa murima.
13 Okathi Muluku ammanenle awe natiri Abrahamu, khaakhanle mutthu mukina muulupale aarowa awe omulaphela, tivo owo aahiilaphela mmansawe,
14 oriki: “Mweekeekhai, miyo kinimooreelihani, nave kinimuncererya osuulu anyu”.
15 Nto, nuumala Abrahamu wooniherya opixa murima, aahimwaakhela natiri aamaneliwe awe.
16 Okathi mutthu onimmana awe natiri, onnilipiherya eyo omuromolaka mutthu muulupale. Eyo ennimaliha onyakulihana wotheene, maana enooniherya wira ele onihimya awe ekeekhai.
17 Siiso-tho, Muluku ophavelaka owooniherya oratteene ale yaarowa omwaakhela natiri, wira khaarowa wunteerya etthu aalakenle awe opaka,* aahilipiherya eyo olaphaka.
18 Itthu iyo piili Muluku opanke awe,* khasinturukeya, nave Muluku khonikhala-khala oothaka. Itthu iya sinninlipiha hiyo nitthyawenle wa Muluku, wira nivarexexe nlipelelo nrina ahu.
19 Hiyo nookhalana nlipelelo nla, nenno nri ntoko nankura a okumi ahu, ninnikhaliherya okhala oolipa, nihihoveryaka etthu. Nlipelelo nlo, ninninroiha muhina mwa ekortiina,
20 memmo Yesu okenle awe mwaha wa hiyo, onihulelaka ni onilokiheryaka ephiro. Owo ookhala namukuttho muulupale a mahiku otheene, ntoko Melikhisedeki.
Inoota
^ Ekereku, “ikuru”.
^ Aahiiso, “okathi onirwa”. Nwehe Moolumo Ootthokiheriwa.
^ Ekereku, “ale oowaarya”.
^ Aahiiso, “oolosowa”.
^ Aahiiso, “miruku sawe”.
^ Itthu iyo sinimuhimya natiri a Muluku ni olapha wawe.
