aHeeberi 11:1-40
11 Waamini ti ororomela weekeekhai wira itthu ninlipelela ahu sinimwiiraneya tthiri, nave ti etthu ennikupaliha wira ele ehinoona ahu, yookhala tthiri.
2 Mwaha woowi atthu a khalai* yaahikhalana waamini siiso, Muluku aahooniherya wira awo yaanimusiveliha.
3 Mwaha wa waamini, hiyo noosuwela wira olumwenku* woopwehiwa opuro aya nirumeeliwaka nuulumo na Muluku. Siiso, Muluku oorumeela itthu sihinwerya ahu woona, wira opake itthu sinwerya ahu woona.
4 Mwaha wa waamini, Abeli aahinvaha Muluku mukuttho waarina efaita yuulupale ovikana mukuttho wa Kayini. Nave, mwaha wa waamini iwo, aahihimmwa okhala naxariya, maana Muluku aaheemererya yoovaha awe. Nto, hata okhwiiye ene, owo nlelo onnilavula mwaha wa waamini wawe.
5 Mwaha wa waamini, Enokhi aahithaamihiwa wira ohihaawe okathi aarowa awe okhwa. Owo khaaphwanyiwe, okhala wira Muluku aahimuthaamiha. Masi, ohinatthi othaamihiwa, Muluku aahimukhalela onamoona wira aahimusiveliha.
6 Nave-tho, khivanweryaneya omusiveliha Muluku nihaaminiki, okhala wira ole onimwaattamela Muluku, ohaana okupali wira Muluku ookhala, ni wira onnaatthuvela ale animwaavya ni murima aya wotheene.
7 Mwaha wa waamini, Nowe aahooniherya wira aanimoova Muluku, okathi aaleeliwe awe itthu saarowa wiiraneya, nlelo sihinatthi wooneya. Nto, aahiteka ekalawa wira owoopole atthu a vatthokoni vawe. Nave, mwaha wa waamini wawe, aahilamula olumwenku, ni aahihimmwa okhala naxariya.
8 Mwaha wa waamini, Abrahamu okathi aihaniwe awe ni Muluku, aahiiwelela ni aahirowa opuro Muluku aamuleihenrye awe wira aarowa onvaha. Owo aahirowa, hata ahaasuwela opuro aarowa awe.
9 Mwaha wa waamini, owo aahikhala ntoko namurwa elapo aaleiheriwe awe, okhalaka muheemani vamosa ni Isaakhi ni Yakobe, yaawo-tho Muluku aaleihenrye awe etthu emosa-ru.
10 Tthiri, owo aanilipelela epooma yaarina alisenso* eekeekhai, yeeyo etekiwe ni epattuxiwe ni Muluku.
11 Nave, mwaha wa waamini, Sara nnaamwi aavirinhe iyaakha sa oyara, aahivahiwa owerya wooyara, okhala wira aanikupali wira Ole aamuleihenrye toororomeleya.
12 Tivo, wa mutthu mmosa, yoowo ooniwa wira khaawerya okhalana osuulu,* aakhumelela anamwane, yaawo ahireere waatta ntoko itheneeri sa wiirimu, ni ahinkontareya ntoko mihaava sa ophareya.
13 Otheene ala ahookhwa yaaminiki, hata yahaakhenle itthu yaaleiheriwe aya. Nnaamwi itthu iyo saarowa wiiraneya muhoolo, wa atthu ala, waakhala ntoko ahaakhela. Nave yaahilaleya ohoolo wa atthu, wira awo yaari anamurwa ni yanvira elapo ele.
14 Ale anilavula siiso, annooniherya wira anniphavela ni murima wotheene opuro aya, wira akhaleke.
15 Masi, vaakhanle wira awo yaanuupuwela opuro yaakhumme aya, yanwerya otthikela weiwo.
16 Masi, awo anniphavela ophwanya opuro wooreera, eyo piiyo, opuro onikhuma wiirimu. Tivonto, Muluku khonuuliwa muru, mwaha wa wiireliwaka Muluku aya, okhala wira ohaalokiherya epooma emosa.
17 Mwaha wa waamini, okathi Abrahamu eehereriwa awe, aahooniherya waamini wawe, onahala vakhaani onvaha Isaakhi ntoko mukuttho. Abrahamu, yoowo aakhenle itthu aaleiheriwe awe otteeliwe ene murima, aaheererya onvaha mwanawe mmoseene,
18 nnaamwi Muluku aamuhimenrye wira: “Ole onrowa ohimmwa okhala osuulu* anyu, onrowa okhuma nloko na Isaakhi”.
19 Masi aanikupali wira Muluku anwerya omuhihimuxa mwanawe, nto aahimwaakhela mwaana owo, okhalaka ntoko aaroohihimuxiwa mookhwaani. Eyo yaahooniherya etthu yaarowa wiiraneya muhoolo.
20 Mwaha wa waamini, Isaakhi aahimureeliha Yakobe ni Esawu, aaleelaka itthu saarowa okhumelela muhoolo.
21 Mwaha wa waamini, Yakobe ohalaka vakhaani okhwa, aahaareeliha anamwane otheene a Yosefe, ni aahimukokhorela Muluku iilipiheryaka ni ttootto awe.
22 Mwaha wa waamini, Yosefe ohalaka vakhaani okhwa, aahilavula sa okhuma wa anaisarayeli wExiitu, nave aahivaha malakiheryo* a etthu yaarowa wiirihiwa makhuva* awe.
23 Mwaha wa waamini, apapawe ni amamawe Moise, yaahimwiipithiha miyeeri miraru nuumala oyariwa, okhala wira yaanoona wira mwaana ole aari ooreera, nave khiyoovale ele mwene aarumme awe.
24 Mwaha wa waamini, Moise vannuwale awe, aahikhootta wiireliwa mwaana a mwaana mwaamuthiyana a Farawo.
25 Masi aahithanla ohaaxiwa vamosa ni atthu a Muluku, ohiya opuha vakhaani miteko sa etampi,
26 maana owo aahoona wira othanyiwa wa Kristu, yaari etthu yootepa oreera ovikana mihakhu sa wExiitu. Owo aaniwehexexa oratteene etthu aarowa awe ovahiwa muhoolo.
27 Mwaha wa waamini, owo aahikhuma wExiitu, ohoovaka onanariwa wa mwene, maana khaahiyale ovilela mixankiho ooniheryaka opixa murima, okhalaka ntoko aanimoona Ole ohinooneya.
28 Mwaha wa waamini, owo aahimpaka Paasikha ni aahittikitthela ephome vasulu va mikhora, wira nlaikha na Muluku nihiwiivakase anaaya oopacerya oyariwa.
29 Mwaha wa waamini, atthu a Muluku yaahilapuwa Ephareya Yooxeerya, okhalaka ntoko yeetta vatthayani voowuuma, masi atthu a wExiitu aphavelaka olapuwa, yaahimireya mphareya-mmo.
30 Mwaha wa waamini, ixiri sa oYerikho saahimorela vathi, nuumala atthu orukurerya mahiku 7.
31 Mwaha wa waamini, Rahabi, yoowo aari namararuwa,* khaiviwe vamosa ni atthu ale yahaamwiiwelenle Muluku, okhala wira aahiwaakhela ni murettele anamahottela.
32 Nto kihimye-tho exeeni? Miyo nkaarowa okhalana okathi wira kilavule sotheene sa Gideyoni, Baraki, Sansoni, Yefte, Davidi, vamosa ni Samuweli ni maprofeta makina.
33 Mwaha wa waamini, awo yaahiwana ni yaahaawerya mamwene, yaaheettela exariya, yaahaakhela etthu yaaleiheriwe aya, yaahiwala iyano sa akharamu,
34 khiyaaviiye ni mooro, yaahitthyawa wiiviwa ni xoowa,* yaari atthu yahaawerya masi khukhalihiwa oowerya, yaari oowerya okhottoni, yaahaaxintta awanani aya.
35 Athiyana yaahiwaakhela atthu aya yaakhwiiye yaawo yaahihimuxiwe mookhwaani. Masi atthu akina, khiyaaphavenle ohiya waamini waya, yiirelaka otaphuliwa paahi, maana yaaniphavela ohihimuxiwa wootepa oreera.
36 Tthiri, atthu akina yaahiveehiwa ni yaahiwaxuliwa. Ohiya-vo, yaahitthukiwa ni ekwirinti, nave yaahiriheliwa mukhatteya.
37 Akina yaahivonyiwa maluku, yaaheehereriwa, yaahikawanyiwa eriyari, yaahiiviwa ni xoowa,* yaaneetta ewanre ene isapala sa ipwittipwitthi ni sa ipuri, yaahithoiwa, yaahilupatthiwa, yaahihaaxiwa.
38 Awo yaari ootepa oreera murima, ahinareerela okhala olumwenku ntoko ole. Yaanivira moothakoni, mmiyaakoni, mmakhukuni ni mmalittini.
39 Nave, nnaamwi otheene aya yaakhaleliwe onamoona ni Muluku mwaha wa waamini waya, awo khiyaakhenle etthu yaaleiheriwe aya,
40 okhala wira Muluku aahoona etthu yootepa oreera aanilokihenrye awe. Siiso, awo anookhalihiwa oomalela vamosa ni hiyo.
Inoota
^ Aahiiso, “amuhavinre ahu”.
^ Aahiiso, “okathi ola”. Nwehe Moolumo Ootthokiheriwa.
^ Aahiiso, “mathipelo”.
^ Ekereku, “ookhwa”.
^ Ekereku, “mmiso”.
^ Aahiiso, “aahiruma”.
^ Aahiiso, “masikho”.
^ Onihimmwa muthiyana onirupihiwa ni mulopwana ophavelaka musurukhu.
^ Aahiiso, “espaata”.
^ Aahiiso, “espaata”.
