1 aKorinto 1:1-31
1 Miyo Paulo, kihiihaniwa mwaha wa ele Muluku oniphavela awe, wira kikhale murummwa a Kristu Yesu. Vamosa ni munnihu Soositene,
2 ninnilepela epaphelo ela muloko wa Muluku, yoowo ori oKorinto, vamosa ni otheene ale ari mapuro makina, aniromola nsina na Pwiya ahu Yesu Kristu. Owo ti Pwiya aya ni Pwiya ahu. Muluku ohoothanlani wira mukhale ni Yesu Kristu, nave owo oowiihanani wira mukhale oowaarya:
3 Oreera murima wuulupale ni murettele wa Muluku Tiithi ihu, ni wa Yesu Kristu Pwiya ahu, okhale ni nyuwo.
4 Okathi wotheene kinnimuxukhuru Muluku aka, mwaha wa oreera wawe murima wuulupale oovanhaaweni mwa Kristu Yesu,
5 okhala wira mwa Yesu owo, Muluku oowiirihani othaaciri mwa itthu sotheene, nave ohoovahani owerya olavula ni osuwela wuulupale,
6 siisaale ihapari sa Kristu silipihiwa aya mwa nyuwo.
7 Mwaha wa yeeyo, nyuwo mookhalana itthu sotheene muniphavela anyu, nlelo mulipelelaka okathi Pwiya ahu Yesu Kristu onrowa awe wooniheriwa.
8 Muluku onimookhaliheryani okhala oolipa mpakha wookiseryani, wira nihiku na Pwiya ahu Yesu Kristu, ohikhale mutthu onrowa woohimyanani etthu.
9 Tthiri, Muluku toororomeleya, ti yoowo owiihanneni wira mwiiraane ni Mwanawe, Yesu Kristu, Pwiya ahu.
10 Axinnaka, kinnootumereryani mwa nsina na Pwiya ahu Yesu Kristu, wira mwiiwananeke ni ohikhale okawanyeya eriyari anyu, masi mwiiraaneke saana, ni mukhalaneke muupuwelo ni moonelo mmosa-ru.
11 Axinnaka, atthu akina a etthoko ya Kolowe, aakileela wira khamuniiwanana.
12 Kinnilavula siiso, okhala wira atthu akina a nyuwo anihimya wira: “Miyo kinimutthara Paulo”, akina anihimya wira: “Miyo kinimutthara Apolo”, akinaku anihimya wira: “Miyo kinimutthara Keefa”,* nave akina anihimya wira: “Miyo kinimutthara Kristu”.
13 Niireke Kristu tookawanyeya? Niireke Paulo ootoko okhomeliwa vamwirini? Aahiiso, niireke ookhala a nyuwo opatisiwe mwa nsina na Paulo?
14 Kinnimuxukhuru Muluku, okhala wira nkimpatinse nnakhala mmosa a nyuwo, ohikhanle Krispo ni Gaio,
15 wira ohikhale mutthu onrowa ohimyaka wira opatisiwe mwa nsina naka.
16 Nave-tho, kihaapatisa atthu a etthoko ya Siteefano. Waahiya atthu ala, nkinsuwela akhala wira kompatisa mutthu mukina.
17 Tthiri Kristu khokirumme waapatisa atthu, masi okirumme olaleya ihapari sooreera. Nave, owo khokirumme olaleerya kirumeelaka moolumo a atthu oosuwela, wira okhwa wa Kristu vamwirini wa nihaaxeryo,* ohikhalihiwe ethiru.
18 Mweekeekhai, mwiixuttiho wa mwiri wa nihaaxeryo,* etthu ya elolo wa ale anrowa opwetexiwa, masi wa hiyo nooponwe, ti owerya wa Muluku.
19 Ti siiso silempwale aya wira: “Miyo kinimwaamaliha ankhili a asuweli, nave kinookhootta* osuwela wa asuweli”.
20 Ari vai asuweli? Ari vai alipa-oowiixuttiha Nlamulo?* Ori vai ole onimusivela ovaanyihana itthu sa olumwenku ola?* Niireke Muluku khoonihenrye wira ankhili a olumwenku ola teethiru?
21 Okhala wira atthu a olumwenku ola annaaroromela ankhili aya, awo khanimusuwela Muluku. Atthu akina khanoona okhala ya faita ele enilaleya ahu. Masi, Muluku oolakela owoopola ale anaamini, orumeelaka ehapari eyo. Siiso, ankhili a Muluku ahooniheriwa.
22 Ayuda aniphavela ithoonyeryo, nave akereku anaaphavela ankhili,
23 masi hiyo nimmulaleya Kristu, yoowo aakhomeliwe vamwirini. Wa ayuda, owo ti nluku ninkwattuliha, masi wa ale ahikhanle ayuda, etthu ya ololo.
24 Wa ale aniihaniwa, ayuda ni akereku, Kristu ti owerya wa Muluku ni ankhili a Muluku.
25 Atthu pooti othokoreryaka itthu sa Muluku okhala ntoko itthu sihirina efaita ni soohilipa, masi itthu iyo ti sootepa okhalana ankhili ni soolipexa waavikana atthu awo.
26 Tivonto axinnaka, muupuweleke mukhalelo mwaarina anyu, okathi mwaihaniwe anyu ni Muluku. Okathi owo khiyaakhanle atthu anceene yooniwa okhala asuweli ni apinaatamu. Khiyaakhanle atthu anceene oowerya, nnakhala yaakhuma imusi soovuwa.
27 Masi Muluku oothanla itthu sa olumwenku ola, seiyo sinithokoreriwa okhala sa elolo, wira owuulihihe muru asuweli. Nave, Muluku oothanla itthu sa olumwenku ola, seiyo sinithokoreriwa okhala soohilipa, wira uulihihe muru itthu soolipa.
28 Muluku oothanla itthu soohisuwanyeya sa olumwenku ola, ni itthu soothanyiwa, ni itthu sihikhanle etthu, wira omalihe itthu sikhanle etthu,
29 nave wira ohikhale mutthu onrowa wiittottopaka vamaithoni va Muluku.
30 Muluku towiirinheni wiiraana ni Kristu Yesu. Yesu owo, onniwooniherya ankhili ni exariya ya Muluku. Mwaha wa Yesu, atthu anoowerya oreerihiwa, nave mwaha wa yoowoopola* ovanhe awe, anoowerya woopoliwa,
31 wira yiiraneye ntoko silempwale aya: “Ole oniittottopa, aittottopeke mwaha wa Yehova”.
Inoota
^ Yoowo-tho oniihaniwa Pedru.
^ Nwehe Moolumo Ootthokiheriwa.
^ Nwehe Moolumo Ootthokiheriwa.
^ Aahiiso, “kinookakhela okhwipi”.
^ Eyo piiyo, mutthu onisuwela wiixuttiha oratteene Nlamulo.
^ Aahiiso, “okathi ola”. Nwehe Moolumo Ootthokiheriwa.
^ Nwehe Moolumo Ootthokiheriwa ani: “Yoowoopola”.
