1, 2. (a) Mutthokiherye nlikanyiho na Yesu voohimya sa mwaneene ematta. (b) Moota xeeni nlikanyiho nne nnooniherya aya ovaha ni oreera murima?

MWANEENE ematta aahipeherya voosiisu omerkaatu, owaavyaka anamuteko wira yalime mmatta mwawe. Aahiiwanana waaliva esisapo ya muteko yaarowa aya ovara, nto awo yaaheemererya. Masi okhala wira muteko khiwaareere, aahirowa-tho ikwaha sinceene waaphavela anamuteko akina wira yavareke muteko. Owo aahiiwanana waaliva musurukhu mmosaru anamuteko otheene. Makaaripi, mwaneene ematta aahirowa waaliva anamuteko ale. Mwaneene ematta ele aahaaliva esisapo emosaru nnaamwi anamuteko akina yaavanre nihiku notheene, akina yaavanre ewoora emosa paahi. Masi, vaavo ale yaavanre nihiku notheene yaapacenrya aya wunlaseya, mwaneene ematta aakhunle so: ‘Khahiyó esisapo ya nihiku yaiwanannyahu? Nkinwerya okuxa itthu saka, kìrihe emphavelaka? Khino nyuwo munnanareliwa orera waka murima?’—Matheyo 20:1-15

 ² Nlikanyiho nna na Yesu ninniniixuttiha etthu yuulupale voohimya sa oreera murima wa Yehova aahiiso “eparakha ya Muluku”. ^[1] (Nwehe enoota.) (Mmusome 2 aKorinto 6:1.) Moota xeeni? Atthu akina pooti wuupuwela wira ole aavanre nihiku notheene aahaana waakhela musurukhu munceene waavikana atthu akina. Masi mwaneene ematta aahaareerela murima anamuteko ale yaalimme okathi vakhaani. Musomi mmosa onnitthokiherya masu ala oowi “iparakha sa Muluku” aniphwanyaneya mBiibiliyani, oriki: “Moolumo ala anooniherya etthu mutthu enivahiwa awe mahala nnaamwi ohireerelaka aahiiso ohiphwanelaka ovahiwa etthu eyo”.

3, 4. Nthowa xeeni ni moota xeeni Yehova oonihenrya awe waamorela ikharari apinaatamu otheene?

³ Biibiliya onnileela wira iparakha sa Muluku ti ‘yovaha’ ya mahala. (aÉfeso 3:7) Okhala wira omwiiwelela wahu Yehova khahiyo woomalela, hiyo khannireerela waakhela iparakha sinikhuma wa Muluku. Tthiri, naaphwanela okhwa paahi. Mwene Salomoni aahimmye so: “Mulaponi khavo onìra sa xariya mahiku othene, ahiweryaka ovonya”. (Musuweli 7:20) Muhoolo mwaha murummwa Paulo aalavunle so: “Othene aya àttheka, àthoiwa ovuwa wa Muluku” ni “ale anvarela muteko etampi anniliviwa n’ukhwa”.​—aRoma 3:23; 6:23a.

⁴ Okhala wira Yehova onnaaphenta apinaatamu vanceene, oonivaha “Mwan’awe mmosene” wira onikhwele. Ela ethoonyeryo yuulupale ya oreera murima wa Yehova. (Yohani 3:16) Paulo aahimmye wira “Yes’uwo ahiyevihiwa, khukhala mukhani ovikana malaikha, wira àkhwele atthu othene, vomoriwa ikharari ni Muluku. Nto vano ninnimona awarihiwe ovuwa ni nttittimiho mwaha w’ohawa n’ukhwa wawe”. (aHéberi 2:9) Tthiri, “eparakha Muluku ennivahawe mahala enniphwanyiha ekumi ehinimala, mwa Yesu Kristu Pwiy’ahu”.​—aRoma 6:23b.

5, 6. Exeeni enikhumelela akhala wira ninlamuleliwa ni (a) etampi? (b) oreera murima wa Muluku?

⁵ Nranve sai yoottheka ni okhwa? Biibiliya onihimya wira “mwaha wa yottheka ya mutthu mmosene yowo, okhwa ohawerya atthu othene”. Tivonto, okhala wira na osuulu wa Adamu, noorava etampi ni ninnookhwa. (aRoma 5:12, 14, 17) Hata vari siiso, hiyo nnoowerya okhootta olamuleliwa aahiiso weettihiwa ni etampi. Moota xeeni? Akhala wira nnimwaamini mukuttho onoopola wa Kristu, nnoottottela mureerelo oreera murima aahiiso ikharari sa Yehova. Biibiliya ohimya so: “Sokhumelela ikano sa Moise: siso sottheka sihinjerereya. Masi vavo vattale etampi, votepa watta eparakha ya Muluku. Siso, etampi ehòniherya owerya waya eruhaka okhwa: vano, eparakha ya Muluku, ephwanyihiwahu ni Yesu Kristu Pwiy’ahu, ehòniherya owerya waya eruhaka ekumi ehinimala”.​—aRoma 5:20, 21.

⁶ Nnaamwi nryeene alipa-oottheka, nihihiyeke etampi enlamulelaka. Tivonto, vaavo vanipaka ahu etthu yoohiloka, ninninvekela Yehova wira onlevelele. Paulo oniloponle so: “Etampi ehoweryekeni-tho, okhala wira khamunikhalela ikano: nyuwo munkhalela eparakha ya Muluku”. (aRoma 6:14) Nto, moota xeeni ninttottela ahu mureerelo eparakha ya Muluku? Paulo ohimmye so: “Vekekhai, yokhumelela eparakha ya Muluku, khwaruhela wopowa atthu othene. Eparakh’ela enninixuttiha okhotta makhalelo ahu òtakhala n’uhiya itthu sintthunexiwa vathí-va, wira mahiku othene netteke ni wisumaliha n’ixariya n’omuttittimiha Muluku”.​—Tito 2:11, 12.

7, 8. Antaphulela exeeni moolumo oowi “iparakha sohilikana sa Muluku” sinooniherya awe mwa inamuna soovirikana? (Nwehe elatarato yoopacerya.)

⁷ Murummwa Pedru olempe wira: “Khula mutthu àrumeleke akhw’awe, àkawelaka oreriwa ovahiwawe ni Muluku, ntoko murumeyi òroromeleya a iparakha sohilikana sa Muluku”. (1 Pedru 4:10) Antaphulela exeeni moolumo oowi “iparakha sohilikana sa Muluku” sinooniherya awe mwa inamuna soovirikana? Antaphulela wira nnaamwi siniphwanyaka mixankiho sinceene mookumini mwahu, Yehova onoonivaha ele enitthuneya wira nivilele. (1 Pedru 1:6) Okathi wotheene onrowa onivaha ele enrowa onikhaliherya oxintta khula yoweeha.

⁸ Murummwa Yohani aalempe so: “Othene ahu nokaweliwa mahala oreriwa wawe womalela, iparakha iparakha sene”. (Yohani 1:16) Okhala wira Yehova onnooniherya oreera wawe murima mwa inamuna soovirikana, ninnaakhela mareeliho manceene. Mareeliho awo taavi?

9. Ninrowa ottottela sai mureerelo iparakha sa Yehova, ni ninrowa wooniherya sai oxukhurela wahu?

⁹ Yehova onninlevelela soottheka sahu. Oreera murima wa Yehova onninikhaliherya oleveleliwa itampi sahu. Masi, akhala wira ninnittharuwa ni ovikaniha wiimananiha omala-maliha itthu soohiloka siniphavela ahu (Mmusome 1 Yohani 1:8, 9.) Paulo aahaatthokiherya maKristau oowoottihiwa a okathi awe moota Yehova onlevelela awe itampi. Owo aahimmye so: “[Muluku] ònakiherya owerya w’epiphi, khunithamiherya momweneni mwa mwan’awe onimpentexawe. Mwa yowo t’omphanyahu wopowa ni oleveleliwa itampi”. (aKolosi 1:13, 14) Ninnimuxukhurela vanceene Muluku mwaha wa onimorela wawe ikharari, vano nihaana onvuwiha yena. Nave okhala wira Yehova onninlevelela soottheka sahu, nnoowerya ophwanya mareeliho manceene oohakalaliha.

10. Mureerelo xeeni oniphwanya ahu mwaha wa eparakha ya Muluku?

¹⁰ Nnookhalana wataana wooloka ni Muluku. Hiyo naatthu oottheka okhuma oyariwa wahu, nto naawanani a Muluku. Paulo aalempe so: “Okathi waryahu awanani awe, Muluku ònatàniha ni yowo mwaha w’okhwa wa Mwan’awe”. (aRoma 5:10) Mwaha wa mukuttho wa Yesu, ninnaataanihiwa ni Muluku, eyo piiyo, ninnikhalana murettele ni Muluku ni okhala apatthani awe. Paulo aahitthokiherya ela ni moota enivarihana aya ni oreera murima wa Yehova, okathi aalepenle awe annawe oowoottihiwa oriki: “Siso, nikhalihiwene anaxariya mwaha wo wamini, nokhalana murettele ni Muluku mwaha w’Apwiy’ahu Yesu Kristu. Mwaha wo wamini, Yesu t’oniphwanyihalyawe eparakh’ela enlipanahu”. (aRoma 5:1, 2) Tthiri ninnixukhurela vanceene mwaha wa murettele ni ompatthani orina ahu ni Yehova!

11. Moota xeeni maKristau oowoottihiwa, anikhaliherya aya “ipwittipwitthi sikina” wooniwa okhala sa xariya?

¹¹ Nnookhalana exariya ohoolo wa Muluku. Profeta Daniyeli aalempe wira okathi wookiserya, “atthu ànkhili”, eyo piiyo, maKristau oowoottihiwa, yaarowa okhaliherya “muttitthi w’atthu iphiro sa xariya”. (Mmusome Daniyeli 12:3.) MaKristau oowoottihiwa anipaka sai eyo? Awo annilaleya ihapari sooreera ni wiixuttiha imilyau sinceene sa atthu a “ipwittipwitthi sikina” malamulo a Yehova. (Yohani 10:16) MaKristau awo oowoottihiwa annaakhaliherya wooniwa okhala a xariya ni Muluku, eyo enniweryaneya mwaha wa oreera murima wa Yehova. Paulo otthokihenrye so: “Muluku, n’urera wawe murima, onnaphwanyiha exariya ehiphwanenle, okhala wira Yesu Kristu ohaphwanyiha wopowa”.​—aRoma 3:23, 24.

12. Nivekelo nnooniherya sai oreera murima wa Muluku?

¹² Nnoowerya omwaattamela Muluku ninvekelaka. Mwaha wa omoriwa ikharari wa Yehova, hiyo ninnimwaattamela nrumeelaka nivekelo. Paulo aahihimya ehice ya Yehova okhala ‘ehice ya oreera wawe murima’, ni onnintumererya waattamela ehice eyo, ‘nilavulaka mootaphuwa’. (aHéberi 4:16a) Hiyo pooti onvekela Yehova khula okathi orweela mwa Yesu. Tthiri ela eparakha yuulupale! Paulo ohimmye so: “Hiyo ninniwerya omwattamela Muluku nihimòvaka, nimuroromelaka”.​—aÉfeso 3:12.

13. Moota xeeni eparakha ya Muluku ‘ennikhaliheryaya okathi wophwanelela’?

¹³ Nnoophwanya nikhaliheryo okathi wooreerela. Paulo onnitumererya wira ninvekele Yehova moohicikha ele eniphavela ahu, nto, “siso nnomoreliwa ikharari, nnophwanya eparakha ennikhaliherya okathi wophwanelela”. (aHéberi 4:16b) Hata neehereriwaka aahiiso niwananaka mixankiho mookumini mwahu, hiyo nihaana omuxonttela Yehova wira onikhaliherye. Nave onnaakhula mavekelo ahu nnaamwi ohikhanyereriwaka opaka eyo. Okathi wotheene Yehova onnaarumeela anna ni arokora wira anikhaliherye. Nave Yehova onnaakhula mavekelo ahu. “Tivó nihimyeke ni nroromelo wira: ‘Apwiya t’anikikhaliherya, tivó vahinòvaka etthu. Atthu anwerya okìriha exeni?’”​—aHéberi 13:6.

14. Moota xeeni oreera murima wa Yehova onnikhaliherya aya?

¹⁴ Nnoowerya ophwanya nimaaliho. Eri eparakha yuulupale omaalihiwa ni Yehova mwaha wa oreera wawe murima, hata niphwanyiwaka mixankiho. (Esalimo 51:19) Okathi maKristau a oTesalonika yaahaawa aya mwaha wa olupatthiwa, Paulo aalempe so: “Pwiy’ahu Yesu Kristu mmansawe, ni Muluku Tith’ihu oniphentale, yowo onivanhe eparakha y’ohakalalihiwa wohimala n’uroromela wulupale, awo yotteliheni murima, yolipiheni wira mwetteleke sorera sothene, ni molumo ni miteko sanyu”. (2 aTesalonika 2:16, 17) Tthiri ti voolipiha osuwela wira mwaha wa onimorela wawe ikharari, Yehova onniniphenta ni onikhapelela!

15. Omoriwa ikharari wa Yehova, onnivaha nlipelelo xeeni?

¹⁵ Nookhalana nlipelelo na okumi woohimala. Okhala wira na alipa-oottheka, khanniwerya okhalana nlipelelo nihikhaliheriwaka ni Yehova. (Musome Esalimo 49:8, 9.) Masi Yehova oonivaha nlipelelo nootepa oreera. Nlipelelo xeeni? Yesu aahimmye wira: “Etthu entthunaya Atithi t’ila: mutthu ti mutthu onimona Mwana, anamwamini yowo, akhalane ekumi yohimala”. (Yohani 6:40) Tivonto, ninnilipelela okhala mahiku otheene mwaha wa omoriwa ikharari wa Yehova. Paulo ohimmye so: “Vekekhai, yokhumelela eparakha ya Muluku, khwaruhela wopowa atthu othene”.​—Tito 2:11.

16. Moota xeeni maKristau makina a eseekulu yoopacerya yaarumeela aya moohiloka oreera murima wa Yehova?

¹⁶ Ninnaakhela mareeliho manceene mwaha wa oreera murima wa Yehova. Masi, nihirumeeleke oreera murima wa Muluku mwa enamuna yoohiloka wira nipake etampi. Eriyari ya maKristau eseekulu yoopacerya, yaahikhala ale yeererya ‘ohonona ehapari y’orera wawe murima Muluku ahu, wira ekhunele makhalelo aya ònananara’. (Yuda 4) Woonasa wene maKristau ale oohaamini yuupuwela wira Yehova aarowa waalevelelaka okathi wotheene hata apakaka itampi moolakelela. Nto yaaneererya-tho waatthekiha annaya. Nave olelo-va, mutthu onipaka eyo ‘onniruwana eroho [munepa] y’oniphenta wa Muluku’.​—aHéberi 10:29.

17. Yoolopola xeeni Pedru ovanhe awe?

 ¹⁷ Satana onnaawoka maKristau makina olelo-va, owiirihaka wuupuwela wira awo pooti opaka etampi ni wira Yehova onrowa waalevelela hata ahittharuwaka. Ekeekhai wira Yehova onniphavela waalevelela ale anttheka anattharuwa; masi owo oniwehererya wira niwananeke soophavela soohiloka sa murima ahu. Yehova aahimuupuxerya Pedru olepa wira: “Vano-nto nyuwo, apatthani aka, molopoliwa. Mwipasopeke wira muhikuxiwé n’uvonya w’atthu òtakhala murima, ni wira muhivukulé olipa wo wamini wanyu. Ohiya vo, mutepeke wunjererya ophentana n’omusuwela Yesu Kristu Pwiy’ahu ni Mòpoli ahu”.​—2 Pedru 3:17, 18.

18. Mwaha wa oreera murima wa Yehova, miritti xeeni nrina ahu?

¹⁸ Ninnixukhurela vanceene oreera murima wa Yehova. Nto, nihaana orumeela iparakha iyo Yehova onnivaha awe, wira ninvuwiheke yena ni waakhaliherya akina. Tthiri owo muritti ahu. Ninrowa orumeela sai iparakha iyo? Paulo ohimmye so: “Vano khula mutthu òkhalana sovaha sihinlikana, sittharaka eparakha Muluku onvahalyawe. Ole ovahiwe eparakha y’olaleya masu a Muluku, alaleyeke attharihaka wamini. Ole ovahiwe eparakha yo warumela akhw’awe, àrumeleke. Mukina avahiwá eparakha yo wixuttiha, ixuttiheke. Ole ovahiwe eparakha y’ovaha miruku sorera, avareke mutek’ola. Ole onakawela akhw’awe sorera sawe, àvaheke n’uleva”. (aRoma 12:6-8) Mwaha wa oreera murima wa Yehova, nookhalana muritti wa olaleya ihapari mooluttuweliwa, owiixuttiha akina Biibiliya, waalipiha anna ni arokora ni waalevelela ale waaniheryasa anniveeha.

19. Ninrowa othokorerya muritti xeeni muru onittharelana?

¹⁹ Okhala wira Yehova oonireerela murima, nihaana wiimananiha “olaleya ehapari yorera wira Muluku onniniphenta”. (Miteko 20:24) Ninrowa othokorerya muritti owo muru onittharelana.