NIIREKE MUNNIWERYA OTHANLA ITTHU SINROWA OWIIRANEELANI MUHOOLO? Atthu akina anihimya wira itthu sotheene sinrowa wiiraneya mookumini mwahu soolempwa khalairu, nto hiyo khaninwerya othanla. Vaavo vahiniwerya aya waakhwaniherya soolakela saya, nto awo anihimya wira khiyaalepeliwe wiiraneya, maana yaavaheriwe siiso.

Atthu akina annikhulumuwa vaavo anuupuwela aya wira olumwenku ola wootakhala khonirowa oloka. Woonasa wene awo yaaniimananiha opaka itthu wira alokiherye okumi aya, masi khiivo etthu yooloka enoona aya, ohiya ikhotto, ikrime, ihasara sa ephattu, ni iretta saahononaka apalano aya. Mwaha wa yeeyo, atthu awo annuupuwela so: “Kinihaawelani? Fataari ohiya!”

Ekeekhai wira sookhala itthu sikina mookumi sinkhumelela ni sinaahonona apalano anyu. (Musuweli 9:11) Masi nyuwo munoowerya othanla vakhala wira munoophwanya okumi woohimala wala nnaari. Biibiliya onnooniherya wira okumi anyu ori mmatatani mwanyu. Muthokorerye ele Biibiliya onihimya awe.

Moise, yoowo aahoolela nloko na Isarayeli khalai, aahaaleela atthu ahinatthi okela Elapo Yooleiheriwa, oriki: “Miyo kopweha va maithoni vanyu ekumi n’ukhwa, oreriwa n’utakhaliwa. Muthanleke ekumi, wira mukhaleke nyuwo n’an’inyu n’osùlu anyu. Mwaphenteke Apwiya Muluku anyu, mwiweleleke molumo aya, mutthareke”.​—Otumererya 30:15, 19, 20.

“Miyo kopweha va maithoni vanyu ekumi n’ukhwa, oreriwa n’utakhaliwa. Muthanleke ekumi”.​—Otumererya 30:19

Aayo, Muluku aahiwoopola aIsarayeli weepotthani wEjiitu ni aahaavaha eparakha ya okhalaka ootaphuwa ni oohakalala Elapo Yooleiheriwa. Masi eyo khiyaarowa wiiraneya mekhayaru. Wira aphwanye mareeliho awo, aIsarayeli yahaana ‘othanla ekumi’. Moota xeeni? Yahaana ‘waphenta Apwiya Muluku aya, wiwelela molumo aya, attharaka’.

Olelo-va, nyuwo-tho muhaana opaka yoothanla emosaru. Etthu enrowa anyu othanla enimoophwanyihani okumi wala okhwa. Mwathanla omphenta Muluku, omwiiwelela ni otthara malamulo awe, nyuwo munoophwanya okumi woohimala elapo ela ya vathi. Masi ninrowa opaka sai eyo?

Ophenta ti mukhalelo muulupale wa Muluku. Muluku aahimuruma murummwa Yohani olepa so: “Muluku ophentá”. (1 Yohani 4:8) Tivonto, nuumala okohiwa tiivi yaari yooruma yuulupale, Yesu aahimmye so: “Mwaphenteke Apwiya Muluku anyu ni murim’anyu wothene n’iroho anyu yothene n’usuwela wanyu wothene”. (Matheyo 22:37) Mutthu khonikhala mpatthani a Yehova Muluku mwaha wa omoova paahi, masi mwaha wa niphento. Xeeni vanitthuneya aya omphenta Muluku?

Yehova waaphenta wawe apinaatamu onlikana ni ophenta wa maama ni paapa. Nnaamwi anamuyari apinaatamu aryeene oohimalela, awo anniwiixuttiha, waalipiha ni waakhaliherya anaaya, maana aniphavela wira ahakalaleke. Nto exeeni anamuyari anlipelela aya? Anlipelela wira anaaya yeetteleke malakiheryo anaavaha aya, wira awo aphwanye mureerelo. Nto niireke khivaniphwanelela Tiithi ihu a wiirimu olipelelaka wira nimuxukhureleke mwaha wa itthu sotheene onniirela awe?

Nttaava noopacerya olempwa Biibiliya, nuulumo noowi “owiriyana”, nintaphulela “wiiwelela”. Tthiri eyo ti etthu anamuyari aniphavela aya ohimya yaariki: “mwaawiriyaneke anamuyari anyu”. Tivonto, onwiriyana Muluku onitaphulela wiixutta ni wiiwelela moolumo awe. Okhala wira khaninwerya wiiwa nsu na Muluku olavulaka mwaneene, hiyo nnoowerya onwiriyana nisomaka ni weettela moolumo awe ari mBiibiliyani.​—1 Yohani 5:3.

Yesu aahooniherya wira omwiiwelela Muluku ti wootepa oreera. Owo aahimmye so: “Khahiyó n’iphawu-ru pahi mutthu t’onkhalawe mukumi: nto ni khula nulumo ninkhuma mwano mwa Muluku”. (Matheyo 4:4) Nnaamwi eyoolya eniphwanyihaka mureerelo mweerutthuni mwahu, masi omusuwela Muluku ti wootepa otthuneya. Mwaha wa xeeni? Mwene Salomoni ohaakhula oriki: “Wettihiwa n’ankhili ti worera ovikana wettihiwa ni mihakhu, okhala wira ankhili awo annavaha ekumi ale anettana”. (Musuweli 7:12) Osuwela ni ankhili anikhuma wa Muluku anoowerya onikhapelela vano, ni anoonikhaliherya opaka soothanla sooloka sinrowa oniphwanyiha okumi woohimala.

Nkahaya muupuwele nlikanyiho na Yesu nithokorenrye ahu mwaha ovinre, nenlo nni: “Mukhora onkeliha mwekumini ti wophunyeya, ephiro ene ti yorika: vano ale amphwanya ephiro yeyo ari vakhani”. (Matheyo 7:13, 14) Okathi mutthu oneetta awe ephiro eyo ohaana okhala ni mutthu onisuwela oratteene wira omuleelihe ni onvaha malakiheryo a moota woophiya onrowa awe. Wuumalelani waya, ephiro eyo eniroiha weekumini yoohimala. Tivonto, nihaana otthara malakiheryo a Muluku. (Esalimo 16:8) Ninrowa otthara sai malakiheryo a Muluku?

Khula nihiku nihaana opaka itthu sinceene. Waaniheryasa sookhala itthu sinceene naaphavela ahu opaka. Naahikhalane ephoole, itthu iyo pooti okuxa okathi waarowa ahu wuupuwelaka itthu Muluku onnivekela awe opaka. Ti nthowa naya Biibiliya onnuupuxerya awe oriki: “Muthokorerye orattene mwettelo anyu. Muhetteké ntoko alolo: mwetteke ntoko atthu a miruku. Mphwanye murerelo w’okathi orinanyu, okhala wira mahiku ala t’òtakhala”. (aÉfeso 5:15, 16) Wira nikhale apatthani a Muluku nihaana omuhela yena nipuro noopacerya mookumini mwahu.​—Matheyo 6:33.

Nnaamwi ehikhanle etthu ekhanle anyu oopaka wira mulokiherye itthu siiraneyale ottuli, masi munoowerya opaka soothanla sooloka sinrowa wookumiheryani itthu sooreera nyuwo ni amusi anyu. Biibiliya onihimya wira Tiithi ihu a wiirimu, Yehova, onniniphenta vanceene ni onninleela etthu oniphavela awe wira nipakeke. Nwehe moolumo ala a profeta Mikeya:

“Apwiya ànixuttiha sorera sirinahu wira: ànihimerya sinnivekelaya. Itthu sene t’iya: nvareke miteko sa xariya, mphente orera murima, mwetteke ni wiyeviha vamaithoni va Muluku”.​—Mikeya 6:8.

Yehova onnoolattulani wira mweetteke nuuwo wira mphwanye mareeliho aasukenrye awe ale animutthara. Niireke munimweemya? Yoothanla ti yawinyu!