Iminutu 60 soopacerya mwaana onviriha awe nuumala oyariwa, onkhala okathi wa marukunuxo manceene. Mwaha wa xeeni? Mwaha woowi okathi owo wooxankiha ti vootthuneya vanceene maama okhala vakhiviru va mwanawe wira omukhapeleleke. *

Exeeni enimwiiriha maama omukhapelela mwanawe moophenta nuumala omuyara? Prusoora Jeannette Crenshaw, okathi aakohiwa awe ni The Journal of Perinatal Education, aahimmye wira mwaha woowi muthiyana onnikhalana iseelula siniitthaniwa hormônio oxitocina. Iseelula iyo “sinniiriha mapele awe osareya nuumala oyara ni sinnimukhaliherya maama owo osiveliwa vanceene ni mwanawe”. Nave-tho ookhala Hormônio mukina onikhumelela mwerutthuni mwa maama, “onimukhaliherya waataana vanceene ni mwanawe” nuumala omuyara. Xeeni eyo eri aya etthu yootthuneya?

Wiiwanana iwo okhanle eriyari ya mwaana ni amamawe, okumiheriwe ni Mpattuxa ahu oophenta, Yehova Muluku. * Mwene Davidi aahimuttottopela Muluku mwaha ‘woomukumiha mmirimani mwa amamawe’, eyo yaanimukupaliha wira okathi owo Davidi ari opuro woororomeleya. Owo aahimmye so: “Okathi kaayariwe aka, ti nyuwo mukipwenhe mmatatani mwa amaama wira kikhapeleliwe, nyuwo mwa Muluku aka”.​—Esalimo 22:9, 10, NM.

MUTHOKORERYE ELA: Vakhala wira Muluku oopattuxa iseelula iyo sooxankiha wira simukhaliheryeke maama omukhapelela moophenta mwanawe, onwehaweha ni omukhaliherya ni itthu oniphavela awe okathi oninnuwa awe, niireke eyo khenooniherya wira Muluku onninithokorerya sintoko “atthu a nloko” nawe?​—Miteko 17:29.

Yesu Kristu yoowo ommusuwela saana Mpattuxa waavikana atthu otheene, aixuttinhe so: “Axipalame anli khantumihiwa inota vakhani pahi? Vano, nnákhala mmosá khampweteya, Atith’inyu ehitthunne. Nto nyuwo, hatá ikharari sa mmuruni mwanyu sihalikeliwa sothene. Tivó, muhòveké: nyuwo muhavikana axipalame òwatta”.​—Matheyo 10:29-31.

Anamunceene a hiyo khannaavaha ephoole axipalame, ni khaninsuwela vakhala wira mwaapalame ‘mmosá onnipweteya’. Masi Tiithi ahu a wiirimu onnisuwela vaavo onipweteya awe khula mwaapalame! Atthu aakhalana efaita vanceene waavikana axipalame. Eyo enniixuttiha wira khamuntthuneya ‘wova’ wala wuupuwelaka wira Muluku khonoovahani efaita. Muluku onnoovahani efaita ni onnoothokoreryani!

 Biibiliya onninlipiherya wira:

• “Maitho Àpwiya anniweha sothene: annona miteko sahu sorera ni sotakhala”.​—MIRUKU 15: 3.

• “Apwiya annakhapelela anaxariya: annakhulela okhuwelela waya”.​—ESALIMO 34:16.

• “Mwaha w’okiphenta wanyu, kinnitteliwa murima, kinnitthapa. Nyuwo muhona ohawa waka: mosuwela ovelavela waka”.​—ESALIMO 31:8.

Niireke yookhala etthu eniturukeya mookumini mwahu vakhala wira ninnisuwela wira Muluku onninithokorerya ni onniniweha moophenta? Atthu anceene makhalelo aya pooti olikanaka ni Ana, * a wInglaterra, yoowo ohimmye so:

“Waahivira okathi munceene kuupuwelaka wira Yehova khaakiphenta ni khaakhula mavekelo aka. Kaatthokelela wira eyo yaakikhumelela mwaha woohikhalana waamini. Kuupuwela wira ele yaari ehukhumu aka mwaha wa ohikhala mutthu a faita. Nave koona wira Muluku khaakikhapelela”.

Vano Ana onnikupali wira Muluku onnimuthokorerya ni omphenta. Exeeni erukununxe muupuwelo awe? Owo onihimya so: “Muupuwelo aka waahipacerya oturukeya vakhaani-vakhaani. Kinnuupuwela mwaha wa mBiibiliyani kaawiriyanne aka iyaakha sivinre. Owo waahikivara murima ni waahikikhaliherya oweha wira mukuttho wa Yesu wookiphwanyiha mureerelo, eyo yaahikikupaliha wira Yehova onnikiphenta. Okathi mavekelo aka anaakhuliwa aya kinnimoroxa maithori, mwaha woowi eyo ennitepa okilipiherya wira Yehova onnikiphenta vanceene. Nave omusoma Biibiliya ni orowela mithukumano sa eKristau wookiixuttiha itthu sinceene voohimya sa Yehova, mikhalelo sawe, ni moota onnithokorerya awe. Vano kinnikupali wira Yehova onnimphenta vanceene khula mmosa a hiyo”.

Yowiiraneya ya Ana ti yoolipiha vanceene. Munrowa okupalixa sai wira Muluku onnisuwela makhalelo anyu ni miyuupuwelo sanyu? Nnoothokorerya nikoho nlo mwaha onittharelana.