Hulda Oophwanya Etthu Aaphavela Awe
VAKHANLE wiira mwaahixukurya ephareya yaamukhaani ya oSangir Besar wIndonesia, iyaakha sivinre, woonasa wene mwaamwaweha arokora araru makristau ephareya eyo. Awo toosuwelexiwa vanceene ephareya eyo mwaha wa muteko anivara aya wa olaleya ihapari sooreera, yaakhaliheryaka atthu omwiiwexexa Biibiliya. Masi okathi ole, yaahikhalanasa muteko mukina yaavarasa aya.
Ephareya ya oSangir Besar oNorti wa wIndonesia
Ikwaha sinceene, awo yaanikela mmaasini enateexa maluku oolemela ekumiheryaka ota. Maluku makina yaari maalupale ni yaalikana ni boola. Moottharelana, yaahikilaathi ibanko sa miri amukunxe ene maritela wiira aphwexakase maluku awo mpakha olikana ntoko mooce a mwalyakhu. Nuumala-vo, yaanihela maluku awo macikhaani ipaalti sa palaastiku ni yaahikuxa mpakha opuro yaakhalasa aya. Moottharelana, yaanihela maluku awo musaakhoni suulupale, vaaweryaneya aya okuxa ni ekaaro wiira yaarumeeliweke apakaniwaka estaraata.
Hulda, ottottelaka maluku ophareya
Mmosa arokora awo aari Hulda. Nto makhalelo awe yaanimweemererya oviriha okathi munceene ovaraka muteko owo waavikana akina. Owo aarumeela musurukhu aaphwanya awe ni muteko owo, wiira othume eyoolya ni itthu sikina amusi awe yaapirisari aya. Nave-tho musurukhu mukina aanisuka. Owo aaphavela omuthuma tablet awe wiira oweryeke ovolowa mwaplikativuni JW Library®. Hulda aanisuwela wiira iviidiyu ni itthu sikina sa mwaplikativuni saammukhaliherya okhumela saana muteko woolaleerya ni omwiiwexexa saana Biibiliya.
Hulda aanivara muteko khula vaasiisu iwoora piili, mpakha oviriha mweeri mmosa nnimeya, ophwexakasaka maluku yaaphiyerya omusariha aterelaato mmosa a kaaro. Etthu yooreera okhala wiira aahiwerya ophwanya musurukhu waaphiyerya omuthuma tablet.
Hulda omukunxe ene tablet awe
Hulda onihimya so: “Nnaamwi kaakhulumuwa vanceene mwaha woophexakasa maluku, moowaakuveya kaahiliyala owereya wootheene, okathi kaamurumeelaka tablet musya yoowo onikikhaliherya muteko woolaleerya ni olokiherya oratheene mithukumano sa ekristau”. Owo onihimya wiira tablet awe ole, aahimukhaliherya okathi wa eretta ya Koronaviiru, okhala wiira miteko sootheene saavariwa mmulokoni saarumeeliwa ikaruma eletrooniku. Ninnihakalala mwaha wa murokora Hulda ophwanya etthu aaphavela awe.
