MWAHA ONITHOKORERIWA 29
Mwiilokiherye Ahinatthi Opacerya Maxakha Maalupale
“Mukhaleke oolikana ene”. — MATH. 24:44.
NSIPO 150 Mumphavele Muluku Wira Moopoliwe
ELE NINROWA AHU WIIXUTTA a
1. Xeeni vari aya vooloka wiilokiherya ehinatthi okhumelela ehasara?
WIILOKIHERYA vahinatthi, onnoopola ikumi. Mwa ntakiheryo, okathi enikhumelela aya ehasara, atthu yiilokihenrye, annoopowa ni annaakhaliherya atthu akina. Mutthenkeso mmosa wa wEuropa onaakhaliherya atthu saaphwannye ihasara onihimya so: “Wiilokiherya saana, pooti woopola ikumi”.
2. Xeeni ninreerela ahu wiilokiherya ahinatthi opacerya maxakha maalupale? (Matheyo 24:44.)
2 Moohipisa, anoopacerya “maxakha maalupale”. (Math. 24:21) Masi moovirikana ni ihasara sikina nihinlipelela ahu, hiyo ninnilipelela maxakha maalupale. Iyaakha 2.000 sivinre, Yesu aahaatumerya awiixutti awe wiira yaahana wiilokiherya nihinatthi ophiya nihiku nno. (Mmusome Matheyo 24:44.) Nto akhala wiira nnimwiilokiherya vahinatthi, vanoorowa onikhweela ovilela okathi owo ni waakhaliherya atthu akina. — Luka 21:36.
3. Moota xeeni ovilela, othunku ni ophenta, onrowa aya onikhaliherya okathi wa maxakha maalupale?
3 Nrowe niwehe mikhalelo miraru sinrowa onikhaliherya wiilokiherya ahinatthi maxakha maalupale. Ninrowa opaka exeeni okathi ninrowa ahu olaleyaka muhupi wa ophukela, masi nnalupatthiwa? (Wiis. 16:21) Ninrowa opirisariki okhala oovilela, wiira nimwiiwelele Yehova, nroromelaka wiira onoonikhapelela. Exeeni ninrowa ahu opaka akhala wiira annihu anoopweteiwa mireerelo saya? (Hab. 3:17, 18) Ninrowa opirisariki wooniherya othunku, wiira naakhaliherye anna awo. Nto ninrowa opaka-ni akhala wiira ninrowa okhalaka opuro mwaamukhaani vamosa ni anna ni arokora anceene, okathi maloko anrowa aya waataana? (Ezek. 38:10-12) Ninrowa opirisariki okhalana niphento, wiira niwerye ovilela okathi owo wooxankiha.
4. Biibiliya onooniherya sai wiira nihaana ohihiya wooniherya ovilela, othunku ni ophenta?
4 Biibiliya onnintumererya wiira nihihiye wooniherya ovilela, othunku ni ophenta. Luka 21:19, onihimya so: “Vakhala wira munoovilela mpakha wookiseryani, munimoopola ikumi sanyu”. Nave aKolosi 3:12, onihimya so: “Mooniheryeke othunku”. Nave-tho 1 aTesaloonika 4:9, 10, onihimya so: “Mphentaneke mukina ni mukhwaawe. . . . ninnootumereryani, nyuwo axinna, wira mutepeke opaka eyo”. Makristau yaalepeliwe soolepa iya, yaanooniherya ovilela, othunku ni ophenta. Masi hata vari siiso, awo yaanitumereriwa ohihiya wooniherya mikhalelo iyo. Naatakihaka makristau ale, nihaana opakaka etthu emosa-ru. Nto wiira niwerye opaka eyo, ninrowa oweha etthu yaakhalihenrye makristau ale oopacerya, wooniherya mikhalelo iyo. Nave, ninrowa oweha moota nikhanle ahu oowaatakiha makristau ale ni okathi omosa-ru, wiilokiherya ahinatthi maxakha maalupale.
MULIPIHE OVILELA WANYU
5. Makristau a okathi wa Paulo, yaawenrye sai ovilela okathi saaphwanya aya mixankiho?
5 Makristau yaakhala okathi wa Paulo, yaahaana okhala oovilela. (aHeeb. 10:36) Awo yaahikhalana mixankiho sinceene, seiyo saaphwanya atthu akina okathi ole. Nave mwaha wookhala makristau saahaaphwanya-tho mixankiho sikina. Makristau awo yaanilupatthiwa ohiya paahi ni ahooleli a etiini ya ayuda ni makhulupale a aRoma, masi-tho yaanilupatthiwa ni amusi aya. (Math. 10:21) Makristau ale yaahikhalana mixankiho sikina. Yaahikhala anamavirikanya yaawo yaaphavela okawanya muloko, nto makristau ale yaahaana wiimananiha wiira miyuupuwelo iyo sihaahapuxe. (Mit. 20:29, 30) Masi hata saaphwannye mixankiho iye sootheene, makristau ale yaahivilela. (Wiis. 2:3) Yaawenrye sai? Awo yaanuupuwelela matakiheryo a arumeyi a Yehova a khalai yaawo yaavilenle, ntoko Yobi. (Yak. 5:10, 11) Yaaninvekela Yehova ikuru. (Mit. 4:29-31) Nave-tho yaanuupuwelela mareeliho Yehova aavaha awe mwaha wa ovilela waya. — Mit. 5:41.
6. Etthu Merita aapanke awe wiira owerye ovilela, enwiixuttihani exeeni?
6 Hiyo nave, nnoowerya ovilela akhala wiira nnoosomaka ni wuupuwelela, matakiheryo a arumeyi a Yehova ari mbiibiliyani aahiiso ari iliivuru sahu, yaawo yaawenrye ovilela mixankiho. Eyo ti etthu yaamukhalihenrye murokora Merita a wAlbânia, okathi aalupatthiwa awe vanceene ni amusi awe. Owo onihimya so: “Osoma yoowiiraneya ya Yobi eri mbiibiliyani, yaahikilipiha vanceene. Yobi saahimphwanya mixankiho sinceene ni khaamusuwela ti pani aakumiherya. Masi hata vari siiso, owo aahimmye so: ‘Kinolaleya ohittheka waka mpakha okhwa’. (Yob. 27:5) Nto okathi kuupuwela aka mixankiho saka, kaanoona wiira khisaattale kalikanyiha ni sa Yobi. Nave moovirikana ni Yobi, miyo kaanimusuwela aakumiherya mixankiho iye”.
7. Nnaamwi muhirina mixankiho sinceene niinaano-va, exeeni munireerela anyu opakaka?
7 Etthu ekina enrowa onikhaliherya olipiha ovilela wahu, ori onvekela Yehova ni omuleela mixankiho sahu sootheene. (aFil. 4:6; 1 aTes. 5:17) Woonasa wene, niinaano-va nyuwo khamurina mixankiho sinceene. Masi okathi munixanka anyu, oriipiwa murima wala muhinoona anyu etthu yoopaka, niireke munninvekela Yehova wiira ookhaliheryeni? Akhala wiira munookhalana yoolema ya onvekela Yehova okathi munikhalana anyu mixankiho saamukhaani, khivanrowa wooxankihani onvekela okathi sinoophwanyaayani mixankiho suulupale. Tthiri munookupaliki wiira Yehova onimookhaliheryani okathi wooreerela. — Esal. 27:1, 3.
OVILELA
Khula muxankiho onniphwanya olelo-va, pooti onikhaliherya ovilela mixankiho sikina muhoolo (Nwehe ettima 8)
8. Ntakiheryo na Mira, nnooniherya sai wiira ovilela mixankiho olelo-va, onoonikhaliherya ovilela mixankiho muhoolo? (Yakobo 1:2-4.) (Nwehe efootu.)
8 Akhala wiira nnoovilela mixankiho saamukhaani olelo-va, nnoowerya ovilela mixankiho suulupale okathi wa maxakha maalupale. (aRom. 5:3) Exeeni enniiriha ohimyaka siiso? Okhala wiira anna anceene ahoona wiira okathi anivilela aya mixankiho saamukhaani sineehererya waamini waya, eyo ennaakhaliherya ovilela mixankiho suulupale muhoolo. Nto annaamini wiira muhoolo saaphwanya mixankiho sikina, Yehova onimwaakhaliherya. Nave waamini onoonikhaliherya ovilela mixankiho sinrowa oniphwanya muhoolo. (Mmusome Yakobo 1:2-4.) Eyo ti etthu yaamwiiranenle pioneera a wAlbânia oniitthaniwa Mira. Okhala wiira Mira aahivilela mixankiho khalai, eyo ennimukhaliherya ovilela mixankiho sinimphwanya vano. Owo onihimya wiira ikwaha sikina uupuwela wiira yena paahi ti samphwanya mixankiho sinceene. Masi Mira khaaliyanle itthu Yehova ampakenle awe iyaakha 20 saavinre. Nuumala-vo, owo aanuupuwela so: ‘Muhihiye waamini. Muhihiye omurumeela Yehova, okhala wiira ohookhaliheryani ovilela mixankiho sinceene mwaarina anyu’. Hiyo nave nuupuweleleke okathi Yehova aanikhalihenrye awe. Mukupaliki wiira Yehova onnoowehani khula okathi munivilela anyu, nto onimooreelihani vanceene. (Math. 5:10-12) Nave, okathi maxakha maalupale anrowa aya opacerya, nyuwo munrowa okhala oolikana ene wiira nvilele.
MOONIHERYEKE OTHUNKU
9. Anna a muloko a wAntiyokiya, oSiiria, yoonihenrye sai othunku?
9 Nrowe niwehe etthu yaakhumelenle okathi makristau a oYudeya, yaarina aya muxankiho wa etala yinceene. Nuumala anna a muloko wa wAntiyokiya, oSiiria osuwela sa etala ele, awo yaahiwoonela othunku anna a oYudeya. Ohiya owoonela othunku paahi, yaahaakhaliherya. Nto anna a wAntiyokiya, oSiiria “yaahilakela waakhaliherya anna yaakhala oYudeya, ntoko yaawerya aya”. (Mit. 11:27-30) Nnaamwi makristau ale yaaphwanyiwe etala yaakhala otteiwene, anna a wAntiyokiya yaahilakela waakhaliherya. — 1 Yoh. 3:17, 18.
OTHUNKU
Vaavo enikhumelela aya ehasara, okathi wooreerela nikhanle ahu oowoonela othunku atthu akina (Nwehe ettima 10)
10. Ninrowa wooniherya sai othunku okathi anna ni arokora sinaaphwanya aya ihasara? (Nwehe efootu.)
10 Naatakihaka makristau ale a wAntiyokiya, nihaana owoonela othunku anna ni arokora okathi sinaaphwanya aya ihasara aahiiso mixankiho sikina. Nto moowaakuveya nihaana waakhaliherya anna awo. Hiyo pooti waakoha axitokweene a muloko ahu, akhala wiira yookhala etthu ninreerela ahu opaka wiira naakhaliherye, aahiiso hiyo pooti ovaha musurukhu ahu ni waavekelela anna ni arokora awo. b (Mir. 17:17) Mwa ntakiheryo, mwaakha wa 2020 saahipakiwa ikomisau 950 olumwenku wootheene, wiira saakhaliheryeke anna ni arokora okathi wa Koronaviiru. Ninnaaxukhurela vanceene anna ni arokora yaawo aniivahererya wiira akhaliheryeke okathi wooxankiha. Etthu eniwiiriha anna ni arokora awo wiivahererya, mwaha wa othunku anooniherya aya. Othunku onniwiiriha ovahaka mireerelo saya, waakhaliheryaka anna ni arokora olipiha waataana arina aya ni Yehova, nave ikwaha sikina anniivahererya wiira alokiherye aahiiso ateke ipa sa anna wala Ipa sa Omwene. — Mulikanyihe ni 2 aKorinto 8:1-4.
11. Wooniherya wahu othunku, onwiixuttiha exeeni atthu akina?
11 Vaavo nnooniherya ahu othunku okathi wa ihasara, atthu akina anniweha wiimananiha wahu. Mwa ntakiheryo, mwaakha wa 2019, munamukhaya Dorian, aahinyaanya Empa ya Omwene elapo ya oBahamas. Okathi anna yaalokiherya aya Empa ya Omwene, yaahilavula ni mulopwana mmosa ahaakhanle Namoona a Yehova, wiira aakhaliherye oteka ni okumiha itthu sikina saareerela wiira ovariwe muteko ole. Anna yaahimukoha musurukhu yaarowa aya omuliva wamala muteko ole. Masi mulopwana ole aakhunle so: “Khamumprisari okilivasa etthu . . . masi kinimookhaliheryani oteka ni woovahani itthu sikina sinireerela. . . . Miyo kiniphavela okhaliherya mutthenkeso anyu. Okisivela vanceene itthu muniwiirela anyu atthu akina”. Atthu anceene olumwenku ola, khanimusuwela Yehova, masi anceene a yaawo anniweha itthu anipaka aya Anamoona a Yehova wiira yaakhaliherye atthu akina. Tthiri okathi ninwoonela ahu othunku atthu akina, eyo ennaakhaliherya atthu anceene omusuwela Yehova, yoowo ori ‘oomoriwa ikharari vanceene’. — aEef. 2:4.
12. Owoonela othunku atthu olelo-va, onrowa onikhaliherya sai okathi wa maxakha maalupale? (Wiisuupulula 13:16, 17.)
12 Okathi wa maxakha maalupale, niireke nnoorowa opirisariki owoonela othunku atthu? Biibiliya onihimya wiira atthu yaale ahinikhaliherya mitthenkeso sa epoliitika, anoolupatthiwaka niinaano-va ni okathi wa maxakha maalupale. (Mmusome Wiisuupulula 13:16, 17.) Okathi owo, anna ni arokora anoorowa opirisariki ovahiwa itthu saamukhaani sinrowa waathowaka. Okathi Mwene ahu Yesu Kristu, onrowa awe waaphukelaka atthu valaponi, nimphavela wiira oniphwanye nooniheryaka othunku wiira ‘naakhele Omwene olokiheriwe’. — Math. 25:34-40.
MUNCERERYE WAAPHENTA WANYU ANNA NI AROKORA
13. Moovarihana ni aRoma 15:7, makristau oopacerya yaancerenrye sai ophentana waya mukina ni mukhwaawe?
13 Ophenta mukhalelo mmosa waasuwanyeiha makristau oopacerya. Masi niireke vaanikhweya makristau ale wooniherya ophenta? Nrowe niwehe ovirikana waakhanle ni makristau a muloko wa oRoma. Muloko ole, yaahikhala ayuda yiixuttihiwe nlamulo na Moise, masi yaahikhala-tho amalapo yaarina soolema soovirikana. Nave akina yaari ipottha. Woonasa wene makristau makina yaahikhalana ipottha owaani masi anathukumana hoothe mmulokoni. Nto okhala wiira makristau ale yaari oovirikana, exeeni yaakhalihenrye olipiha ophentana waya? Etthu yaakhalihenrye yaari moolumo a murummwa Paulo ani: “Mwaakhelaneke mukina ni mukhwaawe”. (Mmusome aRoma 15:7.) Exeeni murummwa Paulo aphavela awe ohimya ni moolumo ala? Nuulumo na ekereku nitaphuleliwe va noowi “mwaakhelaneke”, nintaphulela owaakhela saana aletto aahiiso omweemererya mutthu mukina wiira okhale mpatthani ahu. Mwa ntakiheryo murummwa Paulo ahimutumererya Fileemoni wiira aahaana ‘omwaakhela saana’ Oneesimo, nnaamwi aari epottha awe yaatthyanwe. (Fil. 17) Nave Prisila ni Akila yaahimwaakhela saana Apolo. Awo yaahimukuxa “amutthokiherya oratteene ephiro ya Muluku”. (Mit 18:26) Makristau ale, khiyeemerenrye wiira ovirikana waya waavalaanye, ohiya-vo, awo yaanaakhelana.
OPHENTA
Waaphenta wahu anna ni arokora onoonikhaliherya ovilela (Nwehe ettima 15)
14. Moota xeeni murokora Anna ni iyawe yoonihenrye aya ophenta?
14 Hiyo nave, nnoowerya owooniherya niphento anna ni arokora, naataanaka naawo ni oviriha okathi niri ene hoothe. Napaka eyo enoowiiriha anna ni arokora oniphentaka. (2 aKor. 6:11-13) Nrowe nithokorerye yoowiiraneya ya murokora Anna ni iyawe. Eretta ya koronaviiru yaapacenrye amalaka-ru waakhela yoothanleliwa aya esya, ya orumeela ntoko mamisionaario elapo ya wÁfrica Ocidental. Nto nuumala ophiya, awo khiyaawerya okumana ni anna ni arokora. Anamathelana ale yaapanke exeeni wiira yooniherye ophenta? Awo yaanaalikarela amurumeelaka vídeo-chamada, wiira aweryeke waaweha ni waasuwela saana anna. Nto anna anceene yaanaalikarela ni yaanaalepela mensaxe, yaaxukhurelaka mwaha wa niphento yaawoonihenrye aya. Exeeni yaawiiriha mamisionaario ale waalikarelaka anna ni arokora wiira yaasuwele saana? Murokora Anna onihimya so: “Miyo nkiniliyala moota anna ni arokora yaaniphenta aya, hata okathi wa mixankiho. Ntakiheryo naya, nookikhaliherya ohihiya waaphenta anna ni arokora”.
15. Ntakiheryo na murokora Vanessa, ninwiixuttihani exeeni sa waaphenta anna ni arokora? (Nwehe efootu.)
15 Miloko sinceene olelo-va, aakhala anna ni arokora yaawo arina mikhalelo ni mahuweliwo oovirikana. Nnoowerya wuncererya waaphenta wahu anna ni arokora awo, akhala wiira nnoowehexexaka mikhalelo saya sooloka. Murokora mmosa oniihaniwa Vanessa, a oNova Zelandia, waaninvila waataana saana ni anna akina a muloko awe. Vanessa aapanke exeeni? Owo aahilakela ohiya waasyaka anna awo, masi ovirihaka okathi munceene ori ene hoothe. Opaka eyo yaahimukhaliherya woona etthu yaamwiiriha Yehova waaphentaka anna ale. Murokora Vanessa onitthokiherya oriki: “Nuumala iyaka othanliwa wiira okhale mutokweene a esirkwiitu, hiyo naaniviriha-tho okathi munceene niri ene ni anna ni arokora arina mikhalelo soovirikana. Nto nenna-va, vannikisivela vanceene otthekula naawo. Mweekeekhai Yehova onnaaphenta atthu awo a mikhalelo soovirikana, maana ohaathanla wiira yiireleke mpantta mutthenkeso awe”. Okathi nnaaweha ahu atthu akina ntoko Yehova onaaweha awe, ninnooniherya wiira ninnaaphenta. — 2 aKor. 8:24.
Okathi wa maxakha maalupale, Yehova onoorowa onikhapelela naahihiye okhala hoothe ni anna ni arokora (Nwehe ettima 16)
16. Xeeni vanrowa aya okhala wa faita waaphenta anna ni arokora, okathi wa maxakha maalupale? (Nwehe efootu.)
16 Okathi wa maxakha maalupale, nnoorowa opirisariki waaphenta anna ni arokora. Okathi wa maxakha maalupale Yehova onrowa onikhapelela sai? Nkawehani etthu Yehova aalenle awe arumeyi awe okathi yaatupheliwe aya ni ababilonia. Yehova aalenle so: “Nyuwo atthu a nloko naka, mutthikele owannyu: mwiwaleleke mpa mwinyu, mulipihe masele [mikhora]. Mwipitheke okathi vakhani, mpakha ovira oviruwa w’Apwiya”. (Yes. 26:20) Woonasa wene, Yehova pooti orowa onivekelaka opaka etthu emosara-ru, okathi wa maxakha maalupale. Nuulumo noowi “mpa”, ninromoliwa eversiikulu ela, pooti okhalaka Ipa sa Omwene. Okathi wa maxakha maalupale, hiyo nnoorowa okhapeleliwa akhala wiira nnookhala vamosa ni anna ni arokora. Tthiri nihaana wiimananiha ohiya paahi waavilela anna ni arokora, masi nihaana waaphentaka. Akhala wiira nnimwaaphentaka, woonasa wene eyo pooti oniiriha woopowa okathi wa maxakha maalupale.
MWIILOKIHERYEKE OKHUMA NIINAANO-VA
17. Akhala wiira nnimwiilokiherya niinaano-va, etthu xeeni ninrowa ahu opaka okathi wa maxakha maalupale?
17 “Nihiku nulupale n’Apwiya” onrowa okhala okathi wooxankiha wa atthu ootheene. (Sof. 1:14, 15) Nave arumeyi a Yehova sinimwaaphwanya mixankiho. Nto akhala wiira nnimwiilokiherya niinaano-va, nnookhala oomaaleleya ni nnoowerya waakhaliherya atthu akina. Nto nihaana ovilela okathi sinniphwanya aya mixankiho. Nave okathi anna ni arokora sinaaphwanya aya mixankiho, nihaana wiimananiha owoonela othunku naavahaka itthu sinaathowa. Tthiri naimananiha waaphenta anna ni arokora niinaano-va, eyo enoonikhaliherya waaphenta muhoolo. Niira siiso, nikupaliki wiira Yehova onoorowa onitthuvela onivahaka okumi woohimala elapo esya, ehinrowa okhala ihasara, mixankiho, nave ninrowa akhalaka vamosa ni anna ni arokora. — Yes. 65:17.
NSIPO 144 Nuupuweleke Etthuvo ya Muhoolo!
a Moohipisa anoopacerya maxakha maalupale. Nto nihaana okhalana mikhalelo iya sinittharelana: Ovilela, othunku ni ophenta, wiira nakhale oolikana ene okathi owo wooxankiha. Mwaha ola, nnooweha moota makristau oopacerya yoonihenrye aya mikhalelo iya ni moota nikhanle ahu oowooniherya olelo-va, wiira niilokiherye ahinatthi opacerya maxakha maalupale.
b Ale aniphavela okhaliherya muteko wooteka okathi enikhumela aya ehasara, ahaana omaleliha olepa ipetisau sini: Departamento Local de Projecto/Construção (DC-50) aahiiso Petição Para Serviço Voluntário (A-19), nuumala-vo alipeleleke olattuliwa.