Yesu aahiixuttiha wira atthu yaahaana okhalana murettele. Okathi omosa aahaaleela awiixutti awe wira: “Muhuupuweleke wira kiruuhale murettele vathi-va. Miyo kiruuhale ohiiwanana, ohiya murettele. Mweekeekhai, kiruuhale ohiiwanana mulopwana ni paapa awe, mwaana mwaamuthiyana ni maama awe, muthiyana ootheliwa ni amaathi awe”. (Math. 10:34, 35) Yesu aaphavela ohimya exeeni ni moolumo ala?

Yesu khaaphavela okawanya imusi, masi aanisuwela wira moolumo awe yaamwiiriha imusi sikina okawanyeya. Nto atthu ootheene yaarowa othanla okhala atthareli a Kristu aapatisiwa aka, yaahaana osuwela wira amusi aya akina khiyaarowa osiveliwa ni yoothanla eyo. Okathi mukina ole athelanne aya aahiiso mutthu mukina a emusi aya, pooti waalupattha vanceene, nto eyo pooti waaxankiha weettela itthu Yesu aixuttiha awe.

Biibiliya onnaatumererya makristau eekeekhai okhalaka ni “murettele ni atthu otheene”. (aRom. 12:18) Imusi sikina, soowiixuttiha sa Yesu saarowa okhala ntoko “ekatana”. Eyo enniiraneya okathi mutthu mmosa a vatthokoni oneemererya awe ekeekhai masi akina ahinaphavela ekeekhai. Okathi eyo eniiraneya aya, mutthu ole iixuntte ekeekhai onikhala nwanani amusi ni atthu a vatthokoni vawe ahiniphavela ekeekhai. — Math. 10:36.

Awiixutti a Yesu anikhala itthoko atthu akina ari aya a etiini ekina, ahaana othanla akhala wira anrowa omuhakalalihaka Yehova ni Yesu aahiiso amusi aya. Mwa ntakiheryo, amusi aya ahikhanle Anamoona a Yehova pooti waakhanyereryaka olya ifesta sa etiini. Nto awo ahaana omuthanla ti pani anrowa aya omusiveliha. Yesu aahimmye so: “Ole onimphentexa paapa awe aahiiso maama awe okivikana miyo, mutthu owo khoniphwanela okhala mwiixutti aka”. (Math. 10:37) Ni moolumo ala, Yesu khaaphavela ohimya wira atthareli awe aniphavela wiixutta ekeekhai ahaaphenteke amusi aya. Masi aaphavela owiixuttiha etthu ya faita yinceene mookumi. Akhala wira amusi ahu ahikhanle Anamoona a Yehova anninlupattha mwaha wa omukokhorela Yehova, nihihiye waaphenta. Masi nihaana osuwela wira etthu nintepa ahu ovaha efaita omphenta wahu Muluku.

Moohaanyiherya, okathi amusi ahu annilupattha aya ninniriipiwa murima. Masi awiixutti a Yesu, aahaana wuupuwela moolumo ala Yesu anihimya wira: “Ole ohinikuxa mwiri awe wa nihaaxeryo onakitthara, mutthu owo khoniphwanela okhala mwiixutti aka”. (Math. 10:38) Ni moolumo makina, makristau annithokorerya olupatthiwa ni amusi aya, ntoko mixankiho sinaaphwanya atthareli eekeekhai a Kristu. Okathi omosaru, awo annikupali wira mweettelo aya wooloka, onimwaakhaliherya amusi aya akina wiixutta ekeekhai. — 1 Ped. 3:1, 2.