Akina yinnunwe mittetthe seiye alopwana anceene ahinaavaha aya efaita athiyana. Mwa ntakiheryo, mutokweene mmosa a esirkwiitu onirumeela oBolivia oniitthaniwa Hans, ohimmye so: “Alopwana akina, yinnuwe ni muupuwelo woohiloka woowi alopwana akhalana efaita yuulupale waavikana athiyana”. b Shengxian, mutokweene a elapo ya oTaiwan ohimmye so: “Muttetthe kinikhala aka, alopwana anceene anuupuwela wiira athiyana khanreerela omweetta nakoso onipakiwa ni alopwana. Nave vakhala wiira mulopwana onoohimya moonelo wa muthiyana, anamuyari awe khanrowa osiveliwaka ni yena”. Alopwana akina, pooti waathanyaka athiyana mwa inamuna soovirikana. Mwa ntakiheryo, pooti oromolaka moolumo otheiha masi aphavelaka waaveeha athiyana aahiiso waaramusa.

Ti voohakalaliha, woona wiira khuuvo mulopwana onivarexexa ni soolema sa muttetthe iinunwe awe. Owo pooti onnixintta moonelo woohiloka woowi alopwana tarina efaita waavikana athiyana. (aEef. 4:22-24) Vaanoweryaneya opaka eyo, vakhala wiira nnootthara ntakiheryo na Yehova. Mwaha ola, nnooweha moota Yehova onathokorerya awe athiyana, moota anna anrowa aya wiixutta waathokorerya athiyana ntoko Yehova ni moota axitokweene anrowa aya ovaha ntakiheryo nooloka na moota woowaattittimiha arokora.

YEHOVA ONAATTHOKORERYA SAI ATHIYANA?

Yehova, oonivaha ntakiheryo nooloka na moota woowaathokorerya athiyana. Ntoko Tiithi omoriwa ikharari, onnaaphenta apinaatamu. (Yoh. 3:16) Yehova onnaathokorerya athiyana oororomeleya ntoko anaawe arina efaita yuulupale. Nrowe nthokorerye inamuna vakhaani sa moota Yehova oniwoonela awe athiyana.

 Owo khoniwehexexa makhalelo aya. Yehova ompattuxa mulopwana ni muthiyana iilikanyihaka. (Maph. 1:27) Yehova khaapattunxe alopwana ootepa osuwela opaka itthu waavikana athiyana, nave owo onnaaphavela atthu ootheene alopwana ni athiyana. (2 Wah. 19:7) Yehova, ompattuxa mulopwana ni muthiyana aavaha osuwela omosa-ru sa moota woowiiwexexa ikeekhai sa mbiibiliyani ni wuupuwelela mikhalelo sawe. Nave Yehova, oniweha waamini wa alopwana ni athiyana mwa enamuna emosa-ru, akhale ale anlipelela okhala mparayiisu valaponi vaava aahiiso ale anrowa olamulelaka ntoko mamwene ni Yesu wiirimu. (2 Ped. 1:1) Vannooneya wiira Yehova, khonaathanya athiyana.

Yehova, onnaawiriyana. Yehova onnaathokorerya ni onniweha itthu sinaaxankiha athiyana. Mwa ntakiheryo, Yehova aahiiwa ni aahaakhula mavekelo aathiyana ntoko Rakheli ni Ana moovarihana ni itthu yaavekela aya. (Maph. 30:22; 1 Sam. 1:10, 11, 19, 20) Yehova oorumiha olempwa mbiibiliyani soowiiraneya sa alopwana yaawiriyana saana athiyana. Mwa ntakiheryo, Abrahamu aahitthara malakiheryo a Yehova onwiriyanaka mwaarawe, Sara. (Maph. 21:12-14) Nave Davidi aahinwiriyana Abigayili. Mweekeekhai, owo aahoona wiira aari Yehova aamurumme orowa olavula ni yena. (1 Sam. 25:32-35) Yesu yoowo oonihenrye moomalela mikhalelo sa Tiithi awe, aahinwiriyana maama awe, Maria. (Yoh. 2:3-10) Matakiheryo ala, annooniherya wiira enamuna Yehova onaattittimiha awe athiyana ori waawiriyana saana.

Yehova onnaaroromela athiyana. Mwa ntakiheryo, Yehova aahimuroromela Eva wiira aamukhapelelaka elapo yootheene. (Maph. 1:28) Mwaha woopaka eyo, owo aahooniherya wiira aanimuthokorerya Eva ntoko namakhaliherya a iyawe, Adamu, ohiya ntoko muthiyana ohirina efaita. Nave Yehova, aanaaroromela axithiyana maprofeta ntoko Deebora ni Hulda, yaawo yaakhaliherya yaavahaka miruku atthu, waahela muhina aphuki ni mamwene. (Makh. 4:4-9; 2 Mam. 22:14-20) Olelo-va, Yehova onnaaroromela athiyana makristau wiira avareke muteko awe. Arokora awo oororomeleya, annirumeela ntoko anamalaleerya, mapioneera ni mamisionaaria. Annikhaliherya oteka ni orattela Ipa sa Omwene ni iye sinirumeeliwa ni mutthenkeso wa Yehova. Akina a yaawo, anirumeela oBeteli nave akina annikhaliherya mapuro makina sinitaphuleliwa iliivuru sanyu. Arokora awo, ari ntoko anakhotto Yehova onaaruma awe wiira amalelihe yoophavela awe. (Esal. 68:11) Moohaanyiherya, Yehova khonaaweha athiyana ntoko oolosowa aahiiso ahinwerya ovara etthu.

ANNA ANROWA WIIXUTTA SAI WAATHOKORERYA ATHIYANA NTOKO YEHOVA?

Anna, wiira nisuwele waathokorerya arokora makristau ntoko Yehova onaathokorerya awe, nihaana ovarerya muupuwelo ahu ni moota nimpaka ahu itthu. Wiira nipake eyo, nihaana okhaliheriwa. Sintoko siisaale maakina a raio-X aniwerya aya osuwela oretta wa mutthu, mpatthani ooloka onoowerya onikhaliherya akhala wiira nookhalana moonelo woohiloka voohimya sa athiyana. Exeeni nikhanle ahu oopaka wiira naakhele nikhaliheryo nlo?

Mmukoheke mpatthani munimuroromela anyu. (Mir. 18:17) Ti vooloka, hiyo omukoha mpatthani nimmuroromela ahu ni onooniwa okhala ooreera murima makoho ntoko ala: “Munoonela sai moota kinaathokoreryaka athiyana? Niireke awo anoowerya oweha wiira kinnaattittimiha? Kiireke kihaana olokiherya enamuna kinilavula aka ni awo?” Akhala wiira mpatthani anyu onimooleelani inamuna sikina mukhanle anyu oolokiherya, muhimananiheke wiisaakiha. Ohiya-vo, mmananiheke opaka marukunuxo awo aniphwanelela.

Musomeke Nuulumo na Muluku. Enamuna emosa yooloka nikhanle ahu oosuwela vakhala wiira ninnaathokorerya saana athiyana, ori ovarerya miyuupuwelo sahu ni moota nimpaka ahu itthu orweela wa Nuulumo na Muluku. (aHeeb. 4:12) Okathi nimmusoma ahu Biibiliya, ninniixutta matakiheryo a alopwana yaathokorerya ni yahaathokorerya saana athiyana. Nave nihaana olikanyiha miteko saya ni sawihu. Ohiya-vo, olikanyiha iversiikulu sa mbiibiliyani ni sikina, pooti onikhaliherya osuwela moonelo xeeni nrina ahu voohimya sa athiyana. Mwa ntakiheryo, moovarihana ni 1 Pedru 3:7, muthiyana ootheliwa ohaana ottittimihiwa ntoko siisaale ‘onikhapeleliwa awe mwaapu woowaakuva ophweeya’. c Niireke eyo enitaphulela wiira khorina ankhili aahiiso khoniwerya  opaka etthu ntoko alopwana? Khahiyo ti yeeyo! Mulikanyihe moolumo a Pedru ni aGalasia 3:26-29 yaawo anihimya wiira Muluku ohaathanla athiyana ni alopwana wiira yalamuleleke wiirimu vamosa ni Yesu. Vaavo ninsoma ahu Nuulumo na Muluku ni nninvekela ahu mpatthani ahu miruku sa moota nnaathokorerya ahu athiyana, nnimwiixutta owooniherya nttittimiho athiyana.

MOOTA XEENI AXITOKWEENE ANIWOONIHERYA AYA NTTITTIMIHO AROKORA?

Anna a mmulokoni, nave animwiixutta moota woowaathokorerya saana arokora mwa nttittimiho, attharaka ntakiheryo na axitokweene oophenta. Moota xeeni axitokweene anooniherya aya ntakiheryo na waattittimiha arokora? Nrowe nthokorerye inamuna sikina anipaka aya eyo.

Awo annaattottopela arokora. Murummwa Paulo, oovaha ntakiheryo nooloka axitokweene akhanle aya ootthara. Owo aanaattottopela ikwaha sinceene arokora, okathi aalempe awe ekarta oroihaka muloko wa oRoma. (aRom. 16:12) Munnuupuwela moota arokora awo yaahakalanle aya, nuumala wiiwa esommwaka mmulokoni ekarta Paulo aalempe awe? Moolikanasa, axitokweene annaattottopela arokora mwaha wa mikhalelo saya sooreera ni miteko aninvarela aya Yehova. Eyo enniwiiriha arokora okhalana muupuwelo wooloka ni woona wiira annivahiwa efaita ni ottittimihiwa. Moolumo oolipiha a mutokweene, pooti omukhaliherya murokora ohihiya omurumeela Yehova moororomeleya. — Mir. 15:23.

Okathi axitokweene anaattottopela aya arokora, ahaana olavula mwa enamuna yooloka ni yooluluwanyeya. Mwaha wa xeeni? Murokora mmosa oniitthaniwa Jessica, onihimya so: “Ti vooreera okathi anna animuleela aya murokora wiira ‘moovara saana’. Nave ti vooreera okathi anna anaattottopela aya arokora mooluluwanya. Mwa ntakiheryo, amuttottopelaka maama onimmaaliha mwaana omithukumanoni aahiiso okathi murokora oniimananiha awe onvirela ole onimusomiha awe Biibiliya wiira orowe omuthukumanoni”. Okathi axitokweene anaattottopela  aya mooluluwanya, arokora annoona wiira anniphentiwa ni aakhalana efaita yinceene mmulokoni.

Awo annaawiriyana arokora. Axitokweene oowiiyeviha awo khanuupuwela wiira tarinexa miruku sooloka. Awo annaavekela moonelo arokora ni annaawiriyana ni ephoole okathi anilavula aya. Mwa enamuna eyo, axitokweene annaalipiha arokora ni annittottela mureerelo. Moota xeeni? Mutokweene mmosa oniitthaniwa Geraldo, onirumeela oBeteli ohimmye so: “Kihoona wiira waavekela arokora moonelo, onnikikhaliherya ovara saana muteko aka. Okhala wene, awo annisuwela ovara saana muteko waavikana anna”. Arokora anceene mmulokoni, annirumeela ntoko mapioneera nave annaasuwela saana atthu ni mapuro anilaleerya aya. Mutokweene mmosa oniitthaniwa Bryan ohimmye so: “Arokora pooti okhaliherya vanceene mutthenkeso wa Yehova. Nto nihaana ottottela mureerelo mikhalelo ni osuwela waya!”

Mutokweene orina ankhili, khanrowa okhootta miyoonelo sa arokora. Mwaha wa xeeni? Mutokweene mmosa oniitthaniwa Edward, onihimya so: “Moonelo aahiiso yoowiiraneya ya murokora, pooti omukhaliherya munna oweha etthu ene emphavela ohimmwa ni pooti omukhaliherya wiiwexexa saana miyoonelo sa atthu akina”. (Mir. 1:5) Nnaamwi mutokweene owo ohirowaka orumeela miyoonelo sa murokora, hata vari siiso, mutokweene owo ohaana omuttottopela ni omuxukhurela mwaha wa miyoonelo sawe.

Awo anniwiixuttiha arokora. Axitokweene arina ankhili, annirumeela saana okathi aya wiira awiixuttihe arokora. Mwa ntakiheryo, awo pooti owiixuttiha arokora ohoolela muthukumano wa muteko woolaleerya vakhala wiira munna oopatisiwa khokhanle. Nave awo pooti owiixuttiha arokora moota woorumeela saana makina aahiiso ikaruma sinikhaliherya oteka ni olokiherya ipa sa mutthenkeso wa Yehova. OBeteli, anna aniweherya muteko, anniwiixuttiha arokora moota wookhapelela miritti ntoko manutensau, okhapelela musurukhu, othuma itthu, olokiherya iprokrama sa mukomputatoorini ni itthu sikina. Okathi axitokweene aniwiixuttiha aya arokora, annooniherya wiira annaaroromela ni anoovara saana miteko athanleliwa aya.

Arokora anceene, annirumeela inamuna yiixuttihiwe aya ni axitokweene, wiira yaakhaliherya atthu akina. Mwa ntakiheryo, arokora akina annirumeela inamuna yiixuttihiwe aya sa muteko wooteka wiira yaakhaliherye anna akina olokiherya ipa saya sihononeyale mwaha wa ehasara ya ephattu. Arokora akina yiixuttihiwe muteko woolaleerya, annaakhaliherya arokora akina ovara saana ni muteko woolaleerya. Arokora awo, aniwoonela sai axitokweene aniivaha okathi wiira awiixuttiheke? Murokora mmosa oniitthaniwa Jennifer, onihimya so: “Okathi kaavara aka muteko wooteka Empa ya Omwene, muhooleli a muteko ole aahiivaha okathi wiira okiixuttihe ovara saana muteko ole. Owo aaniweha muteko kaavara aka ni aanikittottopela. Vaanikisivela ovara muteko hoothe ni munna ole, okhala wiira kaaniweha wiira aanikiroromela ni aanivaha efaita muteko kaavara aka”.

EFAITA ERINA AYA WAATHOKORERYA SAANA AROKORA NTOKO AMUSI

Hiyo ninnaaphenta vanceene arokora ntoko siisaale Yehova onaaphenta awe! Nto nihaana waathokoreryaka ntoko amusi ahu. (1 Tim. 5:1, 2) Ninnihakalala vanceene omurumeela Yehova vamosa ni arokora. Nave ti voohakalaliha vaavo anoona aya wiira anniphentiwa ni okhapeleliwa. Murokora mmosa oniitthaniwa Vanessa, ohimmye so: “Miyo kinnimuxukhurela vanceene Yehova, mwaha woowiirelaka mpantta mutthenkeso awe ni aana anceene yaawo anikilipiha”. Murokora mmosa oTaiwan, onihimya so: “Miyo kinnimuxukhurela vanceene Yehova vamosa ni mutthenkeso awe, mwaha woowaakhapelelaka saana athiyana ni ovaha ephoole miyoonelo sahu. Tthiri eyo ennilipiha vanceene waamini waka ni ennikiiriha ovaha efaita eparakha erina aka ya wiirela mpantta mutthenkeso wa Yehova”.

Moohaanyiherya, Yehova onnihakalala vanceene vaavo onaaweha awe anna yaathokoreryaka arokora mwa niphento ni nttittimiho ntoko yena! (Mir. 27:11) Mutokweene mmosa a wEscócia oniitthaniwa Benjamim, ohimmye so: “Olumwenku ola, khonaattittimiha nnakhala vakhaani athiyana. Nto vaavo muthiyana onirwa awe Empa ya Omwene, nimphavela wiira ooneke ovirikana iwo”. Ootheene ahu, nihaana wiimananiha opaka ele eniwerya ahu, nimutakihaka Yehova naathokoreryaka arokora mwa niphento ni mwa nttittimiho ntoko vaniphwanela aya. — aRom. 12:10.