Anamuyari ahaana owiixuttiha anaaya mweettelo wooloka mweekumini. Mwa ntakiheryo, pooti wira nyuwo munnimananiha okhala mutthu oororomeleya. Moohaanyiherya muniphavela wira aniinyu akhalane mukhalelo owo.

Nave-tho munniphavela owiixuttiha aniinyu osuwela ovara muteko, okhala a xariya ni waathokorerya saana atthu akina. Mikhalelo iyo mutthu onipacerya okhalana ori ene mmiravo.

ELE BIIBILIYA ONIHIMYA AWE: “Nwixuttihe amiravo mwettelo worera: anùluvalaru, khanliyala”.​—Miruku 22:6.

Mahiku ala a etekonologia, vanitthuneya okhalana makhalelo ooloka. Maama mmosa oniitthaniwa Karyn ohimmye so: “Itthu soohiloka sinniphwanyaneya muselulaarini”. Onnincererya oriki: “Anamwane pooti owehaka itthu soohiloka ari ene vakhiviru vahu”.

ELE BIIBILIYA ONIHIMYA AWE: ‘Atthu atokwene . . . ahalimaleliha ankhili aya osuwela othanla sorera ni sotakhala’.​—aHéberi 5:14.

Waattittimiha akina. Eyo enihela muhina (orumeela moolumo oowi: “xontte” ni “kooxukhuru”) ni waathokorerya saana akina. Mikhalelo iyo ti soothowa mahiku ala, maana atthu annitepa ovaha efaita ikaruma sa etekonologia waahiya atthu.

ELE BIIBILIYA ONIHIMYA AWE: “Etthu enosivelani wireliwa n’atthu akina, nwireleke yeyo akhw’inyu”.​—Luka 6:31.

Muhimyeke mweettelo anyu wooloka. Mwa ntakiheryo, asomi anihimya wira amiravo anoowerya osyaka orupihana ni mutthu ahithelanne aya, akhala wira anoosuwela vahinatthi wira opaka eyo etthu yootakhala.

MIRUKU: Murumeeleke etthu ekhumelenle ninaano wira mpacerihe ovaanela voohimya sa makhalelo ooloka. Mwa ntakiheryo, vakhala wira sinilaleiwa ihapari soowi yookhumelela ekrime, nyuwo pooti ohimya so: “Ti vootakhala moota anamunceene ari aya oowali. Nyuwo munoonela sai? Exeeni eniwiiriha atthu okhala siiso?”

“Vakhala wira anamwane khanisuwela etthu yooloka ni yoohiloka, nto vannaavila othanla itthu sooloka”.​—Brandon.

Nwiixuttiheke aniinyu waattittimiha akina. Hata anamwane acikhaani, anoowerya wiixutta waattittimiha akina arumeelaka moolumo ntoko “xontte” ni “kooxukhuru”. Eliivuru eni Parenting Without Borders (Waahuwa Anamwane Ohirina Mukano) enihimya so: “Anamwane yaawehaka wira khahiyo ari mekhaya mulaponi, masi anniirela mpantta emusi aya, exikola aya ni muttetthe anikhala aya, awo anoophavelaka ovara miteko sinaakumiherya mireerelo atthu akina, ohiya awo mmensaya”.

MIRUKU: Mwaavaheke aniinyu miteko sa vate wira yiixutteke waavarela muteko atthu akina.

“Vakhala wira anamwane anoolimalela ovara muteko vano, khanrowa onyoonyeriwaka miteko saya muhoolo. Nto ovara saana miteko anivahiwa aya onimwaakhaliherya yannuwa”.​—Tara.