1. Itthu iri moota heeni mulaponi mahukwaano, ni itthu iyo sinanroromeliha eheeni?

 ATTHU yaawehaka vale itthu sineereeya mahukwaano, antxipale a yaawo, onnaaxupa ororomela weera itthu sinoorowa oreera muhoolo, mwaha wooweera imusi sinnakawanyeya, atthu anoovirelela okhala oowali ni oowiitthuna. Ni atthu antxipale onnaaxupa waaroromela ale anlamulela. Menento ekhaikhai ti yooweera, itthu sootheene iya sineereeya, sinoonihera weera itthu sihanle vakhaani oreera. Mwaha wa heeni? Mwaha wooweera atthu ampaka itthu seiye Biblya ahimmaawe weera saamweereya “mahiku òmalihera.” (2 Tim. 3:1-5) Yoole ori mutthu oneemela anaweha moota itthu iraaya mahukwaano, onnasuwela weera iprofesiya woohima sa mahuku oomalihera sinnakwanela. Etthu eyo ennoonihera weera Yesu oopatxera olamulela Omwene wa Muluku. Ohiya paahi eprofesiya emphwanyeya va Timotheyo, sookhala tho iprofesiya ikina sinuuluma woohima sa Omwene wa Muluku. Osuwela weera iprofesiya ikina sookwanela, onoolipiha nroromelo nahu.

2. Mwa yoosoma ela ninkela woona eheeni, ni mwaha wa heeni ninkelaahu woona iprofesiya iya? (Mukomentari efootu ya vakaapani.)

² Mwa yoosoma ela ninkela woona (1) eprofesiya emoha ennikhavihera wiiwexexa liini Omwene wa Muluku opatxenraaya olamulela, (2) iprofesiya sinnikhavihera wiiwexexa weera Yesu ookhala mwene a Omwene wa Muluku wiirimu ni (3) nnoorowa woona iprofesiya sinoonihera moota amwiittani a Omwene wa Muluku anrowaaya onyanyiwa. Nnimoona tho weera iprofesiya iyo sinkhala ntoko ipeesa sohimoontariwa, mene vaavo nimmontaraahu ipeesa iyo ninnawera woona etthu eneera ekhumelele. Vamoha-moharu, nasuwela ovarihana okhanle variyari va eprofesiya emoha nekwaaya, nnoosuwela weera ninkhala mahuku oomalihera nave nnimwiiwexexa etempu nraahu navetho  nnimwiiwexexa weera itthu sootheene sineereya moovarihana netempu ya Yehova.

3. Eprofesiya ya Daniyeli 7:13, 14 enanroromeliha eheeni?

³ Eprofesiya ya Daniyeli 7:13, 14, yaahima khalairu weera Yesu kristu aakela okhala namalamulela oomalela a Omwene wa Muluku. Atthu amaloko ootheene yaamukhala oohakalala ‘omurumeela owo’, ni omwene awe khonkela okuxiwa ni omwene mukina. Eprofesiya ekina ya Daniyeli, yaalaihenre weera Yesu aakela opatxera olamulela okwipi wa ehuhu yeeyo Biblya oniitthanaawe ihuhu ithanu ni piili. Neereke tthiri vannawereya osuwela liini Yesu okhanlaawe mwene?

4. Moota heeni Daniyeli 4:10-17 onnikhaviheraawe osuwela eyaakha Yesu okhanlaawe mwene? (Nwehe enoota.)

⁴ Mmusome Daniyeli 4:10-17. “Ihuhu ithanu ni pili” entaphulela ehuhu ya iyaakha 2.520 ehuhu eyo epatxenre eyaakha ya 607 A.E.C. Yesu ahiwiiye, vaavo aBabilonia yaamwankhaaya omwene mwene oomalihera athanliwe ni Yehova oYerusalemu. Ihuhu ithanu ni Piili simanle liini? Simanle eyaakha ya 1914 E.C., vaavo Yehova anvanhaawe omwene Yesu—“yoowo orino edireitu yookhala mwene” a Omwene wa Muluku. *—Ez. 21:25-27, Tradução do Novo Mundo.

5. Mwaha wa heeni eprofesiya ya “ihuhu ithanu ni piili” eraaya yootthuneya wa hiyo?

⁵ Mwaha wa heeni eprofesiya ela eraaya yootthuneya wa hiyo? Wiiwexexa eprofesiya woohima sa “ihuhu ithanu ni piili,” onnalipiha nroromelo nahu weera Yehova onimwaakwanihera anatiri ootheene alaihenraawe. Yehova aathanla etempu yoophwanelela weera Yesu akhale mwene. Vamoha-moharu, iprofesiya sootheene ikina sa Yehova sinookwanela etempu enamphwanelela Yehova. Nroromeleke weera nihuku na Yehova ‘nnoophiya moohipisa.’—Hab. 2:3.

6. (a) Ninsuwela moota heeni weera Yesu onnalamulela wiirimu? (b) Moota heeni Apokalise 6:2-8 onaakhulelaawe eyo?

⁶ Ahalelaka omaliha muteko awe elapo ela ya vathi, Yesu aahima itthu saakela weereyaka elapo ela ya vathi saarowa wooniheraka weera owo oopatxera olamulela wiirimu. Mwa itthu sene ikina owo ahimmawe weera saamweereya tiiya: ikhotto, etala ni etetere ya elapo [terremoto]. Owo tho, aahima weera—“samukhumelela iretta sowaakhuva omwaramwareya elapo yootheene”, COVID-19 [coronaviru] ntakihero na iretta sene seiyo soowaakhuva omwaramwareya. Itthu sotheene iya sineereya sineerela eparte ethonyero enoonihera “owa wa Yesu kristu.” (Math. 24:3, 7; Luka 21:7, 10, 11) Sivinreene iyaakha 60 Yesu akhwiyeene ni avinyererihiweene, Yesu owo anvaha murumwa Yohani ithonyero sa moota itthu iyo sakelaaya weereya. (Mmusome Apokalise 6:2-8.) Itthu sootheene iya sinneereya ovinyera eyaakha ya 1914 Yesu akhalakaru mwene a Omwene wa Muluku.

7. Mwaha wa heeni itthu sinvirelelaaya oxupa valaponi Yesu akhalakaru mwene?

⁷ Mwaha wa heeni Yesu akhalakaru mwene itthu sinvirelelaaya oxupa valaponi? Apokalise 6:2 onnahima etthu yootthuneya. Etthu yoopatxera Yesu aapankaawe akhalakaru mwene waari owana ekhotto. Aawana nnaani? Aawana ni Satana vamoha ni mademoniyu awe. Ekapiitulu ya 12 enhima weera Satana ni mademoniyu awe yaawiniwa ni khuluwi ovonyeriwa elapo ela ya  vathi. Avonyeriwakaru elapo ya vathi, Satana ori oonyoonyiwa ni onnawuumulela isara sawe sootheene atthu ankhala valaponi. Nto etthu eyo enneeriha waakumelela maxupo “atthu ootheene enkhala elapo ya vathi.”—Apok. 12:7-12.

8. Mwaha wa heeni nihinxupeyaahu noonaka itthu soonanara sineereya olelo va?

⁸ Mwaha wa heeni eprofesiya ela eraaya yootthuneya wa hiyo? Soowereya sa mulaponi ni soopaka satthu sinnanikhavihera osuwela weera Yesu ookhala mwene. Mwa yeeyo, ohiya onyonyiheya mwaha wa itthu soonananra atthu ampakaaya, ontthuneya weera nuupuweleke wi atthu awo enkwanihera iprofesiya sa mBiblyani. Onnooneya weera Omwene etthu yeekhaikhai! (Nsal. 37:1) Nave nroromeleke weera itthu sineereke ovirelela oxupa vaavo Harmagedoni onattamelaawe. (Mar. 13:8; 2 Tim. 3:13) Ti vooreera onvarela muteko Muluku ansivelo yoowo onnikhavihera osuwela mwaha wa heeni itttu valaponi sintepaaya onanara.

9. Moovarihana ni Daniyeli 2:28, 31-35, tiivi eri epotencia Mundial, ni epatxenre liini olamulela?

⁹ Mmusome Daniyeli 2:28, 31-35. Hiyo ninnoona eprofesiya ela ekwanelaka mahukwano. Yoolohera ya Nabukhodonosori yaathonyera etthu yeera ekhumelele noomala Kristu opatxera olamulela “mahiku òmalihera.” Amwiittani a Yesu valaponi va, enhela mpuwa epotencia mundial yeeyo yahimmwale mBiblyani, aani, yeeyo enthonyiheriwa veneneroni okhala imetto sa “eyuma ni oloko.” Epotencia eyo ennalamulela. Epotencia ela ekhumelenle mpuwa mwa ekhotto yoopatxera ya elapo yootheene [Primeira Guerra Mundial], vaavo Grã-Bretanha ni Estados Unidos yapakannaaya ontthamwene wa nivarihano na Anglo-Americana. Eneneeru  Nabukhodonosori onnaawe moolohani mwawe, ennoonihera mikhalelo miili sineeriha epotencia mundial ela okhala yoovirikana ni ipotencia ikina sivinre.

10. (a) Moota heeni eprofesiya ya Daniyeli enhimaaya moowiiwanyeya epotencia Anglo-Americana? (b) Erisa heeni nintthuneyaahu osepaka? (Nwehe equaadru “ Murimaa nooloko!”)

¹⁰ Etthu yoopatxera enhiyaniha epotencia Anglo-Americana ni ipotencia ikina Daniyeli onnaawe moolohani mwawe, ori weera epotencia Anglo-Americana khekhanleno emetal ntoko eouro ni eparatha. Mene eyo erimweera otakanserana eyuma ni oloko. Oloko ontaphulela “osuulu wa atthu” eyo tiiyo, atthu ootheene. (Dan. 2:43, enoota.) Mahukwaano ninnawera woona moota atthu ananvolelaaya mwathanle, ikampanya sa idiretu civil, opaka imanifestação [okela mmuseweni wooperera exariya] ni nos sindicatos. Itthu sootheene iya sineereya sinnawootxeliha ale anlamulela opaka etthu ele awo antthunaaya.

11. Mwaha wa heeni nintthuneyaahu ororomela weera ninkhala mahuku oomalihera?

¹¹ Mukhalelo wa naaveli onhiyaniha epotencia Anglo-Americana ni ipotencia ikina, ori weera epotencia ela ti yoomalihera ehimmwale ni Biblya, yeeyo ethonyiherinwe vaneneeruni etokotoko okhala manaani. Etthu ela entthuna ohima weera khenrowa okhala epotencia ekina tho. Emalihero ya epotencia ela Anglo-Americana, onrowa okhala Harmagedoni, vaavo Omwene wa Muluku onrowaaya onyaanya epotencia ela vamoha ni igovernu sootheene sa atthu. *—Apok. 16:13, 14, 16; 19:19, 20.

12. Etthu heeni ekina ehimmwale ni eprofesiya ya Daniyeli ennivaha nroromelo ni yooweherera?

¹² Mwaha wa heeni eprofesiya ela eraaya yootthuneya wa hiyo? Eprofesiya ya Daniyeli ennahima itthu sinoonihera weera hiyo ninkhala omamalihero wa mahuku oomalihera. Iyaakha 2.500 sa muttuli, Daniyeli aahima weera anyanyiwa vale Babilonia, samukhumelela ipotencia ixexe mundial, ipotencia sene seiyo, sanvoleela ekumi ya atthu a Muluku. Opwaha mwa yeeyo, Daniyeli aahima weera epotencia mundial Anglo-Americana, yaarowa okhala yoomalihera. Etthu ela ennanroromeliha weera moohipisa Omwene wa Muluku onoonyaanya igovernu sa atthu ni olamulela elapo yootheene.—Dan. 2:44.

13. (a) “Mwene anathanu nararu” ni “mamwene mulokó” entaphulela eheeni? (Apokalise 17:9-12) (b) Eprofesiya ela enkwanela moota heeni?

¹³ Mmusome Apokalise 17:9-12. Ekhotto yoopatxera ya elapo yootheene yoonanariha itthu sintxipale, mene etthu ela yaakwanihera eprofesiya ekina ya mBiblyani woohima sa mahuku oomalihera. Anamahoolela a elapo, yaapatxera wiilipihera weera ewiihe murettele elapo yootheene. Nto Janeiro a 1920, anamahoolela awo yampaka Liga das Nações yoowo muhoolo mwaya mweeri wa Outubro eyaakha ya 1945 aranttelinwe ni Nações Unidas. Mareherero ala eniithaniwa “mwene anathanu nararu”, mene mareherero ala khaiyene epotencia mundial. Eyo eneereya mwaha wooweera, mareherero ala weera ekhaleno ikuru enlipa nnikhavihero na igovernu ikina. Biblya oniitthana igovernu iya “mamwene mulokó.”

14-15. (a) Apokalise 17:3-5 onuuluma eheeni woohima sa “Babilonia mutokweene”? (b) Etthu heeni eneereya ni ittiini soowootha mahukwaahu ala?

¹⁴ Mmusome Apokalise 17:3-5. Muluku aamweeriha Yohani oloha, mwa yooloha ela, Yohani aamona namararuwa, “Babilonia mutokweene”, yoowo ontaphulela ittiini sootheene soowootha siri valaponi. Yoolohera ela enkwanela moota heeni? Ovinyera khalayi mpaka vano, ittiini soowootha sinnakhavihera ni sinniiwanana ni igovernu sa valaponi. Voohipisa va, Yehova onoohela mmurimani mwaya anamalamulela awo “miruku wera epake okhwela  [ootthuna] wawe.” Yeereya eyo enkela okhumelela eheeni? Anamalamulela awo a epoliitika naari neere, “mamwene mulokó” enoorowa otuphela ni onyanya ittiini sootheene soowootha.—Apok. 17:1, 2, 16, 17.

¹⁵ Ninsuwela moota heeni weera Babilonia mutokweene ohanle onyanyiwa? Weera naakhule nikoho nna, nintthuneya weera nuupuwelele toko weera ecidade ya khalayi ya oBabilonia, eparte yintxipale ya ecidade ela yaakosoopiwa ni maahi a mooloko Eufrate. Eliivuru ya Apokalise ennalikanxera imiliyawu satthu simmukhavihera Babilonia mutokweene ni “maahi” ale yaarino muteko wookosoopa ecidade. (Apok. 17:15) Mene eliivuru ene yeela tho ya Apokalise, ennahima weera maahi awo ‘yaamuuma’, eyo entthuna ohima weera ittiini soowootha samwayeleela atthu anakhavihera. (Apok. 16:12) Eprofesiya eyo ennakwanela mahukwaano. Mwaha wooweera, atthu antxipale mahukwaano ennahiya ittiini enaasa mapuro makina weera emalihe maxupo aya.

16. Okhumelela wa Nações Unidas onoonihera eheeni? Ni Babilonia mutokweene onrowa onyanyiwa liini?

¹⁶ Mwaha wa heeni eprofesiya ela eraaya yootthuneya wa hiyo? Okhumelela wa Nações Unidas  ni atthu antxipale ohikhavihera waya ittiini soowootha, onoonihera weera hiyo ninkhala mahuku oomalihera. Nnamweera atthu antxipale mahukwano ehimukhaviheraka Babilonia mutokweene, onyanyiwa wawe onrowa ophiya wa moota mukina. Ntoko nonnaahu, Yehova onoohela mmurimani mwaya “mamwene mulokó” yaawo antaphulela igovernu sa epolitika ni enkhavihera Nações Unidas “miruku wera epake okhwela wawe.” Vaavo atthu enrowaaya okhalaka ehihovelakaru naari mano weera Babilonia onoonyanyiwa nihuku tinno, igovernu iya sa epolitika sinoorowa omunyanya Babilonia mutokweene. Nto etthu ela enrowa waaphwanya atthu antxipale mootutuxera. * (Apok. 18:8-10) Onyanyiwa wa Babilonia mutokweene onimwaavalaveliha atthu ni okumihera maxupo mantxipale. Mene atthu a Muluku enoorowa okhalano mathowa meeli enrowa waahakalalihaka. Nthowa noopatxera, itiini soowootha inoonyanyiwa khuluwi. Ni nthowa nanavili, eyo enkela woonihera weera nihanle vakhaaneene weera nimwalane neelapo ela ya maxupo!—Luka 21:28.

17-18. (a) Etthu heeni nintthuneyaahu opaka weera nivirelelihe olipiha nroromelo nahu? (b) Yoosoma enttharelana ninkela woona eheeni?

¹⁷ Daniyeli ohimme weera ‘osuwela wekhaikhai wamutawala’, ni tiyeeyo “eneereya mahukwaahu ala!” Hiyo ninniiwexexa iprofesiya sinkwanela mahukwaano. (Dan. 12:4, 9, 10) Iprofesiya iyo sinnakwanela sihinihiyaka ni oohovela, etthu eyo enaatxeerera omutikhina wahu ni omuttittimiha wahu Yehova vamoha ni masu awe. (Yes. 46:10; 55:11) Tivawonto nvirelele olipiha nroromelo nanyu mmusomaka Biblya ni waakhavihera atthu akina tho weera ekhaleno onthamwene woolipa ni Yehova. Muluku ahu onimwaakosoopa atthu ootheene yaale anrowa omuroromela owo. Mutthu ori poothe onkela omuroromela Yehova, onoorowa okosoopiwa nave okhalano “murettele wolipa”.—Yes. 26:3.

¹⁸ Yoosoma enttharela ninkela woona iprofesiya siwuuluma atthu a Muluku ankhala mahuku oomalihera. Iprofesiya iyo tho ninkelaahu woona, sinonroromeliha tho weera ninkhala mahuku oomalihera. Nave-tho nnoorowa woona weera—mwene ahu—Yesu Kristu onnaahoolela atthu a Muluku.