Silempwale ni Matheyo 27:1-66
27 Vaxaakaru, asitokweene ootheene aanamakeya ni asitokweene aayuda, yaathukumana weera elaihane moota yaakelaaya omwiiva Yesu.
2 Emutthukakaru, yaamukuxa enamuroiha wa kovernatore Pilatu.
3 Yuda ole anvarinhe Yesu oonakaru weera Yesu aalamuliwa wiiviwa, waamuriipa murima mwaha wa etthu ele owo aapankaawe ni aahaatthikihera asitokweene aanamakeya ni asitokweene aayuda musurukhu 30 wa eparatha innyinwaawe,
4 aweerelaka: “Koottheka mwaha wonvariha mutthu oohittheka.” Nto awo omwaakhula yenre: “Hiyo khanaano mulattu, mulattu ti waawa!”
5 Vano, Yuda aavonyera musurukhu wa eparatha mpuwa mwa etemplu ni aakhuma anarowa wiitthukelela.
6 Vano, asitokweene aanamakeya yaakuxa musurukhu ole wa eparatha ni yaaheera: “Khonaakhuleliwa okuxa musurukhu ola ohela mukoofirini* mwa etemplu, mwaha wooweera ola musurukhu wa ephome.”
7 Ekohanakaru mukina ni mukhwaawe, yaalakela ovarela muteko musurukhu ole weera ethume ematta weera evithiwekemo anamawa.
8 Tivanto, ematta ele eniitthaniwaaya ematta ya ephome mpaka olelo va.
9 Nto eyo, yaakwanihera yoohimmwa ya profeta Yeremiya yeeyo eneera: “Yaakuxa musurukhu 30 wa eparatha, musurukhu yoowo waalakelinwe weera athummweno mutthu. Waatta wa musurukhu owo anamwane ana a Israeli akina yaalakenlaaya omutumiha yoowo.
10 Ni yaathumano ematta ntoko hiihaale Yehova aakilamunlaawe.”
11 Yesu areene ohoolo wa kovernatore aakohiwa ha ni kovernatore owo: “Nyuwo mwene aayuda?” Yesu waakhula enre: “Ti nyuwo munhima.”
12 Emaara ootheriwaawe ni asitokweene aanamakeya ni asitokweene aayuda, Yesu khaakhunle etthu.
13 Nto, Pilatu aamukoha ha Yesu: “Khamuniiwa itthu iya munootheriwaanyu?”
14 Mene khaamwaakhunle etthu. Nnakhala ni masu mamoha mano, nto mwaha wa yeeyo, kovernatore aatikhiniheya vantxipale.
15 Yeele eri efeesta ya Mpaasika, Pilatu aakhalano yookhovelela ya omutaphula mutthu mmoha aatthukinwe yoowo atthu yeeraaya emuthanle weera ataphuliwe.
16 Vaavale, awo yaakhalano mulipa ootthukiwa oosuweliwaxa iitthaniwa Baraba.
17 Emaara atthu yaathukumannaaya, Pilatu aahaakoha: “Wa atthu ala eeli, muntthuna weera kimutaphule taani: Baraba naari Yesu, oniitthaniwa Kristu?”
18 Nto Pilatu, aasuwela weera atthu ale yanvaherera Yesu mwaha wa nrima.
19 Opwaha mwa yeeyo, Pilatu akilantheene otripunaale,* amwaariye yaahaaruma atthu weera emuleele ha: “Muhimukumihere maitho mulopwana owo a exariya, woona weera ohiyu ola nkireere ohaawa vantxipale moolohani, mwaha wa yoowo.”
20 Mene, asitokweene aanamakeya ni asitokweene aayuda, yaasesera muloko wa atthu weera ovekele otaphuliwa Baraba ni emwiivihe Yesu.
21 Vano, Pilatu aahaakoha: “Wa atthu ala eeli, muntthuna weera kimutaphule taani? Waakhula yenre: “Baraba!”
22 Pilatu, aavirelela waakoha eeraka: “Vanonto, kimutekele eheeni Yesu, oniitthaniwa Kristu? Muloko wootheene wa atthu waakhula wenre: “Akhomeliwe vamwirini.”
23 Pilatu, aahaakoha tho: “Etthu heeni yoonanara opankaawe mulopwana ola?” Mene yaakhuwela veeli yeeraka: “Akhomeliwe vamwirini!”
24 Vano Pilatu onnaiye weera khaawera opaka etthu, ni weera muloko wa atthu wannavirelela onyakula, aakuxa maahi ananyawa matata ohoolo wa muloko wa atthu ale. Eeraka: “Miyo, nkaanoono mulattu ni ephome ya mulopwana ola. Mulattu ti wawinyusa.”
25 Muloko ole wa atthu, waamwaakhula weeraka: “Ephome awe enimorele hiyo ni anamwane ahu.”
26 Pilatu aaruma otaphuliwa Baraba. Mene, aaruma owaxuliwa Yesu ni wiiviwa vamwirini.
27 Vano, anakhotto a Pilatu yaamukuxa Yesu emmukeliha owannyawe Pilatu. Ephiyakaru, yaahaathukumanya anakhotto ootheene enamurukurera Yesu.
28 Emurulakaru ikuwo sawe, yaamukhuneela ni ekuwo yooxeera;
29 yaatthava ekhara* ya miiwa ni yanwariha vamuru ni moono awe woolopwana yanvareliha mutathi. Ekokhoraka ohoolo wawe, yannamutheya yeeraka: “Mwiivuluxe, mwene aayuda!”
30 Vano, yaamusenyera, ni yaakuxa mutathi ole enammana vamuru.
31 Noomala omutheya, yaamurula ekuwo ele yooxeera enatthikela onwariha ikuwo sawe. Avinyaka, enamuroiha omukhomela vamwirini.
32 Ekhumaka nipuro nne, yamphwanya mulopwana mmoha a oKirene iitthaniwa Simoni ni yaamunyesereriha mulopwana ola oteexa mwiri wa nihaaxero* wa Yesu,
33 ephiyakaru nipuro niitthaniwa oGolgota, eyo tiiyo, nipuro na ikarakasa,
34 yanvaha eviinyu yootakanseriwa ni makukhu oowaawa weera awure; mene alawihakaru, aakhootta owura.
35 Emukhomelakaru vamwirini, yaahaahulelana ikuwo sawe, yaasaaseraka eparakha,
36 ni yaakilaathi vale, enanwehaweha.
37 Vasulu vamuru vawe, yaahiikaathi yoolempwa yoomoothera, yeera: “Ola Yesu, mwene aayuda.”
38 Anamwiiya eeli yaakhomeliwa vamoha nuuwo. Mmoha moono woolopwana ni mukina moono woothiyana.
39 Ni atthu yaavira vale, yannanveeha Yesu ettikinyaka muru
40 emweerelaka: “Khaiyene ti nyeenyu mwaahima weera mwampwexa etemplu ni oteka mpuwa mwa mahiku mararu, muhiivuluxaka heeni! Mwaareene Mwaana a Muluku, mukhuruwe vamwirini vawo wa nihaaxero!”*
41 Yannahima etthu emoha-moharu tho, asitokweene aanamakeya vamoha ni alipa oolepa ni asitokweene aayuda. Awosa yaapatxera omutheya, yeeraka:
42 “Owo oowera waavuluxa atthu akina mene khanwera wiivuluxa mwaneene awe! Ola mwene ana a Israeli! Akhuruwe tthiri vamwirini vale wa nihaaxero,* ni hiyo nnaamuroromele.
43 Ola aamuroromela Muluku, vano, waari weera Muluku annasiveliwa nuuwo, anvuluxe viinaano va. Woona weera ola ohima eera: ‘Miyo Mwaana a Muluku.’”
44 Mpaka naanamwiiyeene tho, yaakhomelinwe vamoha nuuwo vamwirini, yannanveeha.
45 Ovinya ewoora ya 12, yaapatxera epiphi elapo ele yootheene mpaka ewoora ya 15.
46 Ewoora yeettelaka 15, Yesu aakhuwela ni mmilo awe wootheene eeraka: “Eli, Eli, lama sabaktani?” eyo tiiyo: “Muluku aka, Muluku aka. Mwaha wa heeni mukihiñyaanyu?
47 Yiiwaka eyo, akina yaari vale yaaheera: “Mulopwana ola, ommwiitthana Eliya.”
48 Moohipisa, mmoha a yaale aari vaavale aatthimaka anarowa okuxa exponxa* anaruweya nviinyuni yoowaawa, aatthukelela vamutathini ananvaha Yesu weera awure.
49 Akina yaari vaavale yaaheera: “Mmuhiye! weera noone waari weera Eliya onoowa onvuluxa.”
50 Mwa ekwaha yanaaveeli, Yesu aakhuwela ni nsu noowiiwanyeya ni aahookhwa.
51 Nto, ewoora ene yeele, ekortiina ya mutemplu yaapereya okhuma osulu mpaka vathi, etthaya yaatetereya ni maluku yaaphweeya.
52 Vano, mahiye yaahuleya ni mirutthu sintxipale saatthu oororomeleya* yaakhwiiye, saakumiheriwa vaate
53 (ni atthu yaakhumme Yesu avinyererihiwakaru, yaavolowa esidade yootteela) enooniwa ni atthu antxipale.
54 Mene emaara mutokweene aanakhotto ni atthu yanwehaweha Yesu yonnaaya etthaya ettikinyeyaka ni itthu seereya, yaahoova vantxipale ni yaaheera: “Mweekhaikhai, ola aari Mwaana a Muluku.”
55 Vaavale yaakhala asithiyana antxipale yeemenle ottayi wene enwehaka Yesu. Awosa, yaamutthara Yesu ovinyera oGalileya, weera emukhavihereke.*
56 Wa athiyaneene yaala, aakhalavo Maria Madalena nave-tho Maria mukina, ameyawe Yakobe ni Yosefe ni ameyaya anamwane a Zebedeyo.
57 Nsuwa nihinaaye oneela, aaphiya mulopwana mmoha amuhakhu, Yosefe, aari a elapo ya wArimatheya yoowo aakhanle mutthareli a Yesu.
58 Mulopwana ola aarowa owannyawe Pilatu ni aavekela murutthu wa Yesu. Nto Pilatu, aaruma weera innyereriwe murutthu owo aavekenlaawe.
59 Yosefe, aakuxa murutthu wa Yesu anavitikelela ni ekuwo ya eliinyu
60 ni aanvitha mmahiyeni manyowani aathimpaiye vamwala. Apirikixelakaru nluku ntokotoko mpaka vamulako va nihiye, owo aapwaha.
61 Nto, Maria Madalena ni Maria mukina, yaahala va mahiyeni vale ekilantheene.
62 Wooxa waya, naari nihiku naattharelana nihiku naarehereliwaaya esaabadu, asitokweene aanamakeya ni afarisi yaathukumana ni Pilatu
63 ni yaaheera: “Apwiya, nohuupuwelela weera namootha ole areene mukumi, aahimme weera: ‘Yavira mahiku mararu, miyo kinoovinyererihiwa.’
64 Tivanto, olamule weera nawehereriweke nihiye nawe mpaka nihiku nanaararu weera ehiwe atthareli awe ale wiiya murutthu awe, ni eweereleke atthu ha: ‘Owo oovinyererihiwa mookhwaani!’ Khoo, wootha nno weereya, waarowa okhala wootepa onanara opwaha wootha wawe woopatxera.”
65 Pilatu, aaweerela: “Mwaakuxeke anakhotto, mwawehaweheke nihiye nno mpaka munwerelaanyuvo.”
66 Yaarowa olipiha nluku naattiyelinwe ni nihiye nne ni yaahaahiya anakhotto* ewehawehaka vale.
Footnotes
^ Ekoofiri ela naari nipuro waasunkiwaayamo musurukhu mutemplu.
^ Naari: “nipuro nnuulummwa milattu.”
^ Naari: “nampurutxi.”
^ Naari: “nttapwatta.”
^ Naari: “ootteela.”
^ Naari: “envareleke muteko.”
^ Naari: “makwaarta.”
