La guera del Armagedon la ze la guera final de Dio contra i governi umani. Belche adesso, questi governi e quei che i ze insieme de lori i va contra Dio e no i vol mia obedir a lu. (Salmo 2:2) La guera del Armagedon la ndarà finir fora con tuti i governi umani. — Daniel 2:44.

 Ghen’è sol una volta la parola “Armagedon” nela Bìblia, in Apocalisse 16:16. Lì, ghen’è una professia che la dise che, “nel posto che in ebraico se ciama Armagedon”, i “rè de tuta la Tera abitada” i sarà riunidi “par la guera del grando giorno de Dio, el Tuto Poderoso”. — Apocalisse 16:14.

 Chi che ndarà lotar nel Armagedon? Gesù Cristo el ndarà comandar un esèrsito dei cieli che vinserà la guera contra i nemighi de Dio. (Apocalisse 19:11-16, 19-21) In meso de questi nemighi, ghen’è quei che no i vol mia obedir a Dio e gnanca i ghe fà conta. — Ezechiel 39:7.

 Sarà che el Armagedon el sarà una guera nte un posto del Oriente Mèdio? Nò, la guera del Armagedon la sarà in tuta la Tera. — Geremia 25:32-34; Ezechiel 39:17-20.

 Armagedon, che dele volte l’è scrito “Har–Magedon” (in ebraico, Har Meghiddohn), vol dir “Monte de Megido”. Megido l’era una cità del Israel antigo. La stòria la mostra che tante guere importante le ga sucedesto lì, e la Bìblia la parla de arquante de lore. (Giuisi 5:19, 20; 2 Rè 9:27; 23:29) Ma, el Armagedon no’l podaria esser nel posto ndove l’era Megido. No ghen’è gnanca un monte grando lì, e gnanca se fusse in tuti i piani de Gezreel, che i ze lì in torno, no ghe staria tuti quei che i va lotar contra Dio. Invesse, el Armagedon l’è una situassion che la ndarà suceder in tuto el mondo, quando i governi i ndarà riunirse par la ùltima volta contra el governo de Dio.

 Come che sarà el Armagedon? No savemo mia come che Dio el ndarà doperar el so poder, ma nel passà lu el ga doperà robe come: tempeste de sassi, teramoti, spiovade forte, fogo e sùlfaro, sciantisi e malatie. E lu el pol doperar queste cose nantra volta. (Giò 38:22, 23; Ezechiel 38:19, 22; Abacuche 3:10, 11; Zacaria 14:12) I nemighi de Dio i restarà persi de una maniera che i ndarà coparse intrà de lori, ma nel fin tuti i ndarà capir che l’è Dio che el sarà drio lotar contra lori. — Ezechiel 38:21, 23; Zacaria 14:13.

 Sarà che el Armagedon sarà el fin del mondo? El Armagedon no’l ndarà finir fora cola Tera, parché la ze el posto de star dele persone par sempre. (Salmo 37:29; 96:10; Eclesiasti 1:4) E invesse de finir fora con tute le persone, el Armagedon ndarà salvarle, parché una “granda mùcia de gente” che obedisse a Dio la seitarà a viver. — Apocalisse 7:9, 14; Salmo 37:34.

 La Bìblia la dopera la parola “mondo”, nò solche par parlar dela Tera, ma anca par parlar dele persone rugne che no le vol mia obedir a Dio. (1 Gioani 2:15-17) Alora, podemo dir che el Armagedon el sarà el “fin del mondo” par le persone rugne. — Mateo 24:3, Pastoral.

 Quando che sarà el Armagedon? La guera del Armagedon la sarà nel fin dela “granda tribolassion”, che Gesù el ga dito che la ndaria suceder. Lu el ga dito: “Sora quel giorno e quela ora nissun el sà, gnanca i àngeli nei cieli, gnanca el Fiol, ma solche el Pare.” (Mateo 24:21, 36) Ancora cossita, la Bìblia la mostra che el Armagedon el sarà durante la presensa de Gesù, che la ga scominsià in 1914, nel cielo. — Mateo 24:37-39.