Nel ano 2020, ga sucedesto tante desgràssie ntel mondo e anca ga scominsià la pandemia del coronavìrus. Come che le Testimònie de Geovà le ga giutà quei che i ga passà par una desgràssia?

Nel ano de servìssio de 2020, * la Comission dei Cordinadori del Corpo Governante la ga dessidio doperar de pi de 148 milioni de reai par giutar le persone che le gavea passà par una desgràssia. Questi soldi i ze stati doperadi par giutar in de pi de 200 posti ndove ga sucedesto desgràssie come el coronavìrus, forti venti, inundassion nela Àfrica, la seca nel Zimbàbue e quando ga mancà magnar nela Venezuela. Par meso de questi donativi, la organisassion la ze stata bona de comprar magnar, àqua, robe, rimedi e giutar i fradei a gaver un posto de star. I ga comprà anca materiai par netar, rangiar e far su nantra volta le costrussion. Vedemo arquanti esempi de come questo laoro l’è stà fato.

Coronavìrus. Nela pandemia, fradei de tuto el mondo i ga patio. Tanti i ze restadi maladi o fin ghe manchea soldi. Par giutar i fradei, i ze stati fati in tuto el mondo de pi de 800 Grupi che i giuta quando ghen’è desgràssie. Questi grupi i restea sempre atenti de come ndea la situassion dei fradei e suito i ghe disea ala Comission dei Cordinadori. Cossita, la Comission la podea dessider come giutarli dela meio maniera.

Nel ano 2020, i Grupi che i giuta quando ghen’è desgràssie i ga giutà le persone a gaver àqua, magnar, rimedi e produti par netarse. In arquanti posti, lori i ga laorà insieme coi ansiani e cossita, i fradei i ga ricevesto el aiuto del governo.

Tante persone che no le ze Testimònie de Geovà le ga parlà del laoro che femo quando ghen’è desgràssie. Par esémpio, Field Simwinga, un omo de autorità nela Zàmbia, el ga dito ai fradei: “Ringrassiemo a valtri che gavé giutà le fameie che ghe ocorea nela ora giusta.”

Ga mancà magnar nela Angola. Par causa dela pandemia del coronavìrus, no ghen’era mia tanto magnar nela Angola, e quel che ghen’era costea tanto. Par tanti dei nostri fradei l’era cada volta pi fadiga comprar magnar.

La filial del Brasil la ze stata convidada par mandar pachi de magnar ai fradei dela Angola. Par doperar ben i donativi, i fradei i ze ndati in serca par catar la meio maniera de comprar e mandar questo magnar, e lo ga comprà in granda quantità. Par comprar e mandar cada paco i ga guastà intorno de 120 reai. Cada un el pesea quasi 20 chili e ghen’era riso, fasoi, òio e altre robe. Fin adesso, i ga mandà 33.544 pachi, o sia, 654 tonelade de magnar. Questo magnar e quel che la filial dela Angola la ga dato ga giutà de pi de 50 mila persone!

Cossa che i nostri fradei i ga catà de questo aiuto? Alexandre, che l’è de star nte un posto distante nela Angola, el ga dito: “Questa la ze stata una prova che Geovà el me vol pròpio ben e che no son mia mi sol. Son importante par la organisassion de Geovà!” Mariza, che la ze drio slevar i so fioi ela sola, la ga dito: “Geovà el ga scoltà le me orassion. Mi ringràssio tanto a lu e ala so organisassion!”

Seca nel Zimbàbue. Nel ano de servìssio de 2020, ga sucedesto una bruta seca nel Zimbàbue che ga fato milioni de persone patir la fame. Anca tante Testimònie de Geovà no le gavea magnar che bastea.

Alora, i ga fato sinque Grupi che i giuta quando ghen’è desgràssie par portar magnar ai fradei. Tanti i ga giutà a meter a posto el magnar, cargarlo nei auti e portarlo ai fradei che i gavea de bisogno. Arquanti i ga dato in prèstio el so auto par far questo laoro. * Nel ano de servìssio de 2020, de pi de 3 milioni e meso de reai i ze stati doperadi par comprarghe magnar a de pi de 22.700 persone.

In arquante situassion, i fradei i era belche sensa magnar casa quando el aiuto l’è rivà. Par quela, lori i ga ringrassià tanto a Geovà e arquanti i ga fin scominsià a cantar càntichi.

Nte una region, una organisassion che no la fea parte del governo la volea dar magnar ale persone. Alora, i ga fato una riunion con quei che i era de star lì. Due Testimònie de Geovà védove le ze ndate a quela riunion. Ma lori i ga scominsià a parlar de polìtica, e le due sorele le ga visto che no l’era mia giusto quel che i era drio domandar par darghe aiuto. Quando lore due le ze ndate via de quela riunion le persone le ghe ga ridesto drio e le ga dito: “No sté vegner qua domandar aiuto dopo, è?” Magari, due stimane dopo, i fradei i ghe ga portà magnar ale sorele, tanto tempo vanti che rivesse el aiuto de quela organisassion.

El nome de Geovà l’è stà lodà nel Zimbàbue par causa del aiuto dei fradei. Par esémpio, varda quel che ga sucedesto con Prisca, che l’è de star nte un paeseto. Ghen’era una bruta situassion par via dela seca. Le persone de quel paeseto le era drio pareciar la tera par impiantar. Ancora cossita, Prisca la ndea predicar tuto el mèrcore e vendre. Ma i so visini ghe ridea drio e ghe disea: “Te vè far la to fameia morir de fame par causa de questa predicassion.” Ela ghe rispondea: “Geovà mai el abandona i so servi.” Poco tempo dopo, Prisca la ga ricevesto magnar dela nostra organisassion. Alora, arquanti dei so visini i ze restadi maraveiadi e i ga dito: “El to Dio no’l te ga mai abandonà, par quela, anca noantri volemo imparar sora lu.” Cossita, sete dei so visini i ze drio scoltar le riunion par meso dela ràdio.

ntanto che el fin no’l vien, seitaremo infrontar queste desgràssie. (Mateo 24:3, 7) Ringrassiemo tanto i donativi che valtri fé par meso de diverse maniere che spiega nel site donate.isa4310.com. Gràssie ala vostra generosità, semo boni de giutar quei che i ze drio sofrir quando i ga de bisogno.