Te pol spetar un futuro meio
Te pensi che el futuro el sarà bon? Tante persone le se sforsa de gaver un pensamento positivo stesso con tuti i problemi che ghen’è ancoi. Ma sarà che podemo creder che le robe le restarà meio? Si! La Bìblia la mostra che podemo creder nte un futuro meio.
Cossa la Bìblia la promete par el futuro?
La Bìblia la parla de bruti problemi che semo drio infrontar. Ma anca la promete che questi problemi i ndarà finirse. Varda arquanti esempi.
Problema: Tanti no i ga una casa par ndar de star
Cossa la Bìblia la dise: “Lori i ndarà far su case e i ndarà de star in lore.” — Isaia 65:21.
Cossa ndarà suceder nel futuro: Tute le persone le podarà gaver la so casa.
Problema: Tanti i ze sensa laoro e i ze poareti
Cossa la Bìblia la dise: “I me scoliesti i ndarà goder de tuto el laoro dele so man.” — Isaia 65:22.
Cossa ndarà suceder nel futuro: Tuti i gavarà un laoro e i sarà contenti de farlo.
Problema: Ingiustìssia
Cossa la Bìblia la dise: “Prinsipi i ndarà far quel che l’è giusto.” — Isaia 32:1.
Cossa ndarà suceder nel futuro: Le persone no le sarà pi tratade de maniera ingiusta par causa dela so rassa o se i ga soldi o nò. No ghen sarà pi gnanca un tipo de ingiustìssia.
Problema: Malatie par causa dela fame
Cossa la Bìblia la dise: “Ghen sarà tanti grani nela tera. Anca su i monti se ndarà tor su tanto de magnar.” — Salmo 72:16.
Cossa ndarà suceder nel futuro: Tuti i gavarà tanto de magnar che ghe fà ben, nissuni ndarà dormir con fame e no gavarà pi problemi de salute par causa dela mancansa de magnar.
Problema: Crime e violensa
Cossa la Bìblia la dise: “Le se sentarà cada una soto la so vigna e soto el so figher, sensa nissuni par spaurarle.” — Michea 4:4.
Cossa ndarà suceder nel futuro: Tuti i ndarà sentirse sicuri parché i rugni no i ghen sarà pi e “i giusti i sarà paroni dela tera”. — Salmo 37:10, 29.
Problema: Guera
Cossa la Bìblia la dise: “Le nassion no le alsarà la spada una contra le altre, gnanca le impararà mai pi a far la guera.” — Isaia 2:4.
Cossa ndarà suceder nel futuro: In tuta la Tera ghen sarà pace. (Salmo 72:7) Nissuni gavarà de scampar via par nantro paese o piander parché ga perso qualchedun che i amea nela guera.
Problema: Malatie
Cossa la Bìblia la dise: “E nissuni ndarà dir: ‘Son malà.’” — Isaia 33:24.
Cossa ndarà suceder nel futuro: Le persone no le sarà pi defissiente e gnanca le sarà malade. (Isaia 35:5, 6) La Bìblia anca la promete che “no ghen sarà pi la morte”. — Apocalisse 21:4.
Problema: Destrussion dela naturesa
Cossa la Bìblia la dise: “El deserto e la tera seca i restarà contenti. El deserto el restarà contento e el ndarà fiorir come el assafron.” — Isaia 35:1.
Cossa ndarà suceder nel futuro: Tuta la Tera la ndarà esser un paradiso ndove le persone le ndarà viver, cossita come Dio sempre el ga volesto. — Génesi 2:15; Isaia 45:18.
Quel che la Bìblia la promete l’è massa bon par esser vero?
Fursi catemo che si, ma te incoraiemo a cognosser meio quel che la Bìblia la dise sora el futuro. Parché? Parché le promesse dela Bìblia le ze difarente de quele che le persone le fà. Lore le vien de Dio. Questo fà una granda difarensa, varda parché:
Podemo fidarse in Dio. La Bìblia la dise che Dio “no’l pol dir busie”. (Tito 1:2) Sol Dio el pol saver cossa che ndarà suceder nel futuro. (Isaia 46:10) Nela Bìblia ghen’è tanti esempi che i mostra che tuto quel che Dio el dise sempre sucede. Par saver de pi, varda el vìdeo La Bìblia la è de orìgine divina?.
Dio el ga el poder par risolver i nostri problemi. La Bìblia la dise che Dio el ga el poder par far tuto quel che el vol. (Salmo 135:5, 6) O sia, no ghen’è gnente che pol intrigar a Dio de realisar tute le so promesse. Lu el ga el poder par giutarne e anca el vol far questo parché el ne ama. — Gioani 3:16.
Ma, te pol pensar: ‘Se Dio el vol giutarne e el ga el poder par farlo, parché ancora gavemo tanti problemi?’ Varda la risposta nel vìdeo Parché che ghen’è tanto sofrimento?.
Come le promesse dela Bìblia le ndarà realisarse?
Par meso del so Regno, un governo nel cielo, Dio ndarà realisar le so promesse. Lu el ga scoliesto Gesù Cristo come governante del so Regno e el ghe ga dato la responsabilità de tender dela Tera e dele persone. Quando Gesù l’era nela Tera, el ga guario persone malade, el ga dato de magnar a quei che i gavea fame, el ga controlà le forse dela naturesa e el ga fin ressussità i morti. (Marco 4:39; 6:41-44; Luca 4:40; Gioani 11:43, 44) Lu el ga mostrà quel che ndarà far come Rè del Regno de Dio.
Par saver de pi sora cossa che el Regno de Dio ndarà far par ti, varda el vìdeo Cossa che l’è el Regno de Dio?.
Quando le promesse dela Bìblia le ndarà realisarse?
Suito! Come savemo? La Bìblia la parla de arquante robe che le sucederia quando el Regno de Dio el saria darente de governar la Tera. (Luca 21:10, 11) Ancoi, tute le robe che la Bìblia la ga dito le ze drio suceder.
Par saver de pi, ledi el artìcolo “Quando o Reino de Deus vai governar a Terra?”
Come queste promesse le ne giuta adesso?
Un scritor dela Bìblia el ga dito che la speransa che la Bìblia la dà la ze come una “àncora par la ànima”. (Ebrei 6:19) Cossita come la àncora la tien el barco firme nte una tempesta, la speransa che la Bìblia la dà la pol giutarne a infrontar i nostri problemi. La pol protegerne de maniera emossional e mental e anca a gaver una salute meio. — 1 Tessalonissensi 5:8.
