Mi son nassesto in Saxónia, che la era nela Repùblica Democràtica dela Alemagna. Mi son stà slevà nte una fameia che la gavea tanto amor. I me genitori i me ga insegnà a esser una bona persona. Fin i me 18 ani, mi no credea in Dio e credea nel governo comunista, o sia, un governo che el insegnea che tute le persone le gavea de ricever le medèsime robe. Par causa del governo comunista, la religion no la era mia importante par quasi tuti nela Saxónia.

Me piasea questo tipo de governo parché i so governanti i volea che tute le persone le fusse tratade compagne e le gavesse le medèsime robe. Cossita, nissun saria tanto sior o poareto. Alora, mi go scominsià a giutar un grupo de gióveni che anca lori i pensea cossita. E quando mi gavea 14 ani, go scominsià a giutar nte un laoro che se catea el papel che le persone le butea via e se fea deventar novo. Le autorità dela me cità, che l’era Aue, le ghe ga piasesto tanto el me laoro e i me ga dato un prémio. Mi cognossea belche tanti polìtichi de quel governo comunista. Me parea che era drio far la roba giusta.

Nel ano 1989, el muro de Berlin l’è cascà e tanti governi comunisti dela Europa i ga perso el poder. Go anca savesto che el governo del me paese el fea robe sbaliade. Par esémpio, quei che no i apoiea el so governo no i era tratadi con giustìssia. Mi son restà tanto disgustà. Mi me domandea: ‘Ma come cossita? Lori no i dise che tuti i ga de esser tratadi compagni? Sarà che el governo comunista no’l fea quel che el insegnea?’ Son restà tanto ansioso par causa de questo.

Mi volea tanto esser un pintor e saver sonar. Mi studiea nte una scola de mùsica e volea far la Università par imparar de pi sora questo. In questa època, mi no fea pi quel che gavea imparà dei me genitori. Mi volea sol viver la vita. Par esémpio, smorosar diverse done. Ma anca cossita, mi era tanto ansioso. Quel che mi pintea mostrea che mi gavea paura del futuro. Mi era preocupà con quel che ndaria suceder nela me vita e parché che semo nassesti.

Son restà maraveià quando go catà le risposte ale me domande! Mi gavea una colega che la se ciamea Mandy e la era una Testimònia de Geovà. * Alora, un giorno, mi e altri coleghi èrino drio ciacolar sora el futuro. E la Mandy la me ga dito: “Andreas, se te vol catar le risposte ale to domande sora el futuro, te ghè de saver quel che la Bìblia la dise.”

Nel scomìnsio, mi no go credesto in quel che la ga dito. Ma anca cossita, go dessidio veder cossa che la Bìblia la dise. Mandy la me ga mostrà el capìtolo 2 de Daniel e son restà maraveià parché el parla sora arquanti governi che i ga poder fin ancoi. La me ga anca mostrà cossa che la Bìblia la dise sora el futuro. Queste le era le risposte ale me domande. Dopo, go pensà: “Come che la Bìblia la pol parlar sora tute queste robe? Sarà che questo l’è una prova che ghen’è un Dio? Se no fusse lu, chi che podaria dir quel che ndaria suceder nel futuro?”

Mandy la me ga fato cognosser Horst e Angelika, che i era Testimònie de Geovà. Lori i me ga giutà a capir la Bìblia. Suito mi era sicuro che sol le Testimònie de Geovà le insegna ale persone el nome de Dio, Geovà. (Salmo 83:⁠18; Mateo 6:⁠9) Go anca imparà sora la speransa de viver par sempre nte un paradiso. Son restà tanto contento quando go imparà che el Salmo 37:29 el dise che tuti quei che i obedisse a Dio i ndarà viver par sempre qua nela Tera.

Me ga tocà sforsarme tanto par far quel che la Bìblia la dise. Par esémpio, mi era orgolioso parché mi savea sonar e pintar ben. Alora, go bio de imparar a esser ùmile. Anca go bio de fermarme de far robe imorai. Mi son tanto grato a Geovà parché lu el vede el nostro sforso par obedirlo, el ga passiensa e el ne perdona.

Fin i me 18 ani, mi no credea in Dio e credea in quel che el governo comunista el insegnea. Ma, dopo che go scominsià a studiar la Bìblia, go perso la paura del futuro e go capio parché che Dio el ne ga fato. Nel ano 1993, me go batesà e sete ani dopo, me go maridà con una cara sorela, la Tabitha. Mi e ela doperemo el nostro tempo par giutar le altre persone a cognosser la Bìblia. E mi son tanto contento de predicar ale persone che le ga imparà da picinine a no creder in Dio e a creder nel governo comunista.

Me genitori i ze restadi tanto disgustadi quando go scominsià a studiar la Bìblia cole Testimònie de Geovà. Ma, lori i ga visto che son deventà una persona meio e, dopo de un tempo, lori i ga scominsià a leder la Bìblia e a ndar ale riunion. Mi son restà tanto contento.

Mi e la Tabitha semo pròpio felici parché femo quel che la Bìblia la dise. Par esémpio, la dise che i maridadi i ga de esser fedeli un al altro e questo ne giuta a seitar maridadi e felici. — Ebrei 13:⁠4.

Adesso mi no go pi paura del futuro e go una fameia de Testimònie de Geovà che le vive in pace, in union e che le se trata tute compagne. Questa la ze stata una roba che go sempre volesto.