Quando mi ero toseto la me fameia la era de star darente de Leipzig, nel oriente dela Alemagna, darente dele frontiere cieca e polonesa. Quando che gavea 6 ani, semo ndati via de lì par causa del laoro de me pare. Semo ndati de star prima nel Brasil e dopo nel Equador.

Con 14 ani, son stà mandà par una scola nela Alemagna ndove studiea e ero de star lì. Intanto che mi ero lì, i me genitori i era de star ntela Amèrica del Sud. Alora, go bio de imparar a far le robe mi sol. Par causa de questo, go scominsià a preocuparme sol con mi. Mi no me importea gnente con quel che le persone le pensea de mi.

Quando mi gavea 17 ani, i me genitori i ze ritornadi par la Alemagna. Nel scomìnsio, son ndato de star con lori. Ma no ero pi bon de obedir ale so règole. Con 18 ani, son ndato via de casa.

No me contentea con gnente, ero sempre drio catar un ogetivo nela vita. Son ndato in serca de diverse organisassion e arquante maniere de viver. E son rivà ala conclusion che la meio roba che mi podea far la era doperar la me vita par ndar cognosser el nostro maraveioso pianeta vanti che le persone lo rovinesse.

Go viaià de moto dela Alemagna ala Àfrica. Ma presto go bio de ritornar par la Europa par rangiar su la moto. Poco dopo, son rivà nte una praia in Portugal. Alora go dessidio de fermarme de far i viai de moto e go scominsià a viaiar de barco.

Son ndato insieme de un grupo de gióveni che i se pareciea par viaiar par el osseano Atlàntico. In quel grupo, go catà la me futura sposa, Laurie. Prima, semo ndati de barco fin ale ìsole del Caribe. Dopo se ghemo fermà un pochetin in Porto Rico e semo ritornadi par la Europa. Voleino catar un barco che ndea a vela e meterghe un motor. Questa la saria la nostra casa. Ma, dopo de tre mesi, ghemo bio de abandonar de colpo el nostro progeto parché son stà ciamà par far el servìssio militar nela Alemagna.

Go passà un ano e tre mesi nela marina dela Alemagna. Durante quel tempo, mi e Laurie se ghemo maridà e ghemo scominsià a pareciar el nostro viaio par el mondo. Poco vanti del servìssio militar, gaveino comprà un barco salva-vita par rangiarlo. Intanto che mi ero nela marina, go scominsià a rangiarlo parché el funsionesse a vela. Questa la saria la nostra casa e cossita podeino continuar la nostra aventura par el mondo. Pròpio in questo tempo, dopo de assar el servìssio militar e vanti de finir de rangiar el barco, le Testimònie de Geovà le ne ga catà e le ga scominsià a studiar la Bìblia con noantri.

Nel scomìnsio, mi no vedea che gavea de far tanti cambiamenti nela vita. Ero belche maridà de acordo cola lege e me gavea belche fermà de fumar. (Efesi 5:5) Come el nostro ogetivo l’era viaiar par el mondo, mi pensea che dedicar la nostra vita vardando e studiando la creassion de Dio l’era belche un sforso importante.

Ma, in verità, mi gavea de far cambiamenti, prinsipalmente nela persona che mi ero. Mi ero tanto orgolioso e sicuro de mi stesso, par quela, mi me consentrea sol nele me abilità e con quel che son stà bon de far. Mi pensea sol in mi.

Un giorno, go ledesto el Sermon del Monte che l’è tanto cognossesto. (Mateo, capìtoli 5-7) Nel scomìnsio, no go capio quel che Gesù el ga parlà sora esser felice. Par esémpio, lu el ga dito che le persone felice le ze quele che le ga fame e sen. (Mateo 5:6) Ma mi no ero bon de capir come che una persona che la gavea arquanti bisogni la podea esser felice. Col stùdio dela Bìblia, go capio che Gesù l’era drio parlar che tuti noantri ghemo una nessessità spiritual. Ma vanti de tuto, ghemo de ricognosser con umiltà che ghemo questa nessessità. In verità, l’è come Gesù el ga parlà: “Felici i ze quei che i ricognosse le so nessessità spirituai.” — Mateo 5:3.

Dopo de scominsiar a studiar la Bìblia nela Alemagna, ghemo cambià par la Frància e dopo par la Itàlia. Ndove che ndeino, sempre cateino le Testimònie de Geovà. Son restà maraveià col vero amor e cola union che ghen’era intrà de lore. Go visto pròpio che lore le era una sola fameia in tuto el mondo. (Gioani 13:34, 35) Col tempo, mi e Laurie semo stati batesadi come Testimònie de Geovà.

Dopo del batésimo, go seità a far cambiamenti nela persona che mi ero. Mi e Laurie ghemo dessidio viaiar de barco par la Àfrica e dopo passar par el osseano Atlàntico fin ai Stati Unidi. L’è stà lì, nel meso del mar, che son nicorto che noantri semo tanto pìcoli in comparassion col nostro grandioso Creador. In meso al mar, no se gavea tante robe de far, alora mi me go consentrà in leder la Bìblia. Son restà maraveià cole stòrie dela vita de Gesù qua nela Tera. Lu l’era perfeto, con tante capacità, ma ancora cossita mai el ga volesto ciamar la atension par lu stesso. Lu no’l se consentrea in lu stesso, ma nel so Pare nel cielo.

Pensando nel esémpio de Gesù, go visto che mi gavea de meter el Regno in primo posto nela me vita e no far le robe che mi volea par prima. (Mateo 6:33) Quando semo rivadi nei Stati Unidi, ghemo dessidio de star lì e consentrarne nela nostra adorassion che gaveino de dar a Dio.

Vanti, me fidea sol in mi, ma tante volte mi no savea se ero drio far le meio dessision. Ma ancoi go catà un guida che no’l sbàlia mai. (Isaia 48:17, 18) Adesso go un ogetivo nela vita: adorar a Geovà e giutar altre persone a imparar sora lu.

Mi e Laurie ghemo fato pi forte el nostro matrimònio par meter in pràtica i consili dela Bìblia. E ghemo bio una benedission de Geovà che el ne ga dato una bela fiola che la cognosse e la ama Geovà.

Questo no vol dir che la nostra vita la ze stata sempre fàcile. Ma, col aiuto de Dio, semo dessididi a no desister dela nostra adorassion a lu e mai assar de fidarse in Geovà. — Proverbi 3:5, 6.