Parché dedicarse a Geovà?

“Questa note l’è vegnesto un àngelo del Dio de chi mi son e a chi mi dao adorassion.” — ATI 27:23.

1. Cossa quei che i se ga batesà i ga belche fato? Che domande l’è importante pensarghe sora?

 “LA PRIMA domanda che quei che i vol batesarse i ga de risponder nel fin del discorso del batésimo la ze: “Te sì ciamà gramo dei to pecati, te sì dedicà a Geovà, e te ghè acetà che la maniera de Geovà salvar l’è par meso de Gesù Cristo?” Parché i veri cristiani i ga de dedicarse a Geovà? Che benefissi ghemo se semo dedicadi a Dio? Parché che no se pol adorar a Dio de una maniera che lu el aceta se no semo dedicadi a lu? Par saver le risposte, prima ghemo de saver cossa ze la dedicassion.

2. Cossa vol dir dedicarse a Geovà?

² Cossa vol dir dedicarse a Dio? Nte una ocasion pericolosa che el apòstolo Paolo l’era nte una barca insieme a tante persone, lu el ga dito che ‘l’era de Geovà Dio’. (Ledi Ati 27:22-24.) Tuti i veri cristiani i ze de Geovà. Ma quasi tute le persone del mondo le ze “soto el poder del Perverso.” (1 Gioani 5:19) Par esser de Geovà, un cristiano el ga de far una orassion par dir a Dio che el vol dedicar la so vita a lu. Questa dedicassion la ze una promessa che cada persona la ga de far vanti de batesarse.

3. Cossa che el batésimo de Gesù el ga mostrà, e come che i so seghidori i pol far compagno el so esémpio?

³ Gesù el ne ga dato un bel esémpio quando el ga scoliesto dedicar la so vita a Dio. Lu l’è nassesto in Israel, una nassion dedicada a Dio. Ma nel giorno che el se ga batesà, lu el ga fato de pi de quel che la Lege la parlea. La Bìblia la mostra cossa che lu el ga dito: “Mi son vegnesto par far la to volontà, ò Dio.” (Ebr. 10:7; Luc. 3:21) Quando Gesù el se ga batesà, lu el ga mostrà a Dio che el volea far la so volontà. I so seghidori i fà compagno a lu quando i se batesa. Ma in questa situassion, el batésimo in àqua mostra a tuti che lori i ga belche fato una dedicassion a Dio par meso de una orassion.

Come che la dedicassion la ne benefissia?

4. Cossa che podemo imparar dela amicìssia de Davi e Gionatan?

⁴ La dedicassion cristiana la ze tanto sèria. La ze de pi che sol un compromisso. Ma come la ne benefissia? Par esémpio, vedemo come la ze una amicìssia. Par gaver un amigo, te ghè de ver interesse par la persona. Una dele pi bele amicìssia che ghen’è nela Bìblia la ze quela de Davi e Gionatan. Lori i ga fin fato un acordo de lealtà. (Ledi 1 Samuel 17:57; 18:1, 3.) L’è vera che l’è fadiga catar questo tipo de amicìssia nel mondo ancoi. Ma quando i amighi i ga una obrigassion un colaltro, la amicìssia la resta pi forte. — Pro. 17:17; 18:24.

5. Se un schiavo el volesse laorar par sempre par el so paron, cossa che el podaria far?

⁵ La Lege che Dio el ga dato a Israel la parla de nantro tipo de relassion che la benefissiea la persona. Par esémpio, se un schiavo el volesse laorar par sempre par el so paron, el podaria far un acordo con lu. La Lege la disea: “Ma, se el schiavo el seita a dirghe: ‘Mi amo el me paron, me sposa e i me fioi. Mi no vui esser libertà’, el so paron el ga de menarlo davanti el vero Dio. Alora, lo farà esser contra la porta o nela banda dela porta, e el so paron el va sbusar la so récia, e lu el sarà el so schiavo par tuta la vita.” — Éso. 21:5, 6.

6, 7. (a) Come che el compromisso el benefissia le persone? (b) Cossa che questo ne insegna sora la nostra amicìssia con Geovà?

⁶ El matrimònio l’è un dei pi grandi compromissi che una persona la pol gaver. L’è un compromisso che se ga con una persona e nò con un contrato. Due persone che le ze de star insieme ma no le ze maridade, mai le podarà gaver una vera sicuressa, manco ancora i so fioi. Invesse, quei che i ze maridadi i ga boni motivi par sforsarse de darghene fora cole so dificoltà con amor. — Mat. 19:5, 6; 1 Cor. 13:7, 8; Ebr. 13:4.

⁷ Nei tempi bìblichi, le persone le se benefissiea quando le gavea contrati par far negossi e laorar. (Mat. 20:1, 2, 8) Anca ancoi l’è cossita. Par esémpio, quando scominsiemo a laorar nte una empresa o vendemo o compremo una roba, noantri femo un contrato. Alora, se un compromisso el assa la amicìssia e el matrimònio pi forti e el laoro pi sicuro, gavaremo ancora de pi benefissi se dedichemo la nostra vita a Geovà. Vedemo adesso come le persone del passà le se ga benefissià parché le era dedicade a Geovà e quanto importante la so dedicassion la ze par lore.

Come che la dedicassion a Dio la ga benefissià Israel?

8. Cossa che volea dir par la nassion de Israel esser dedicada a Dio?

⁸ Israel la ze deventada una nassion dedicada quando la ga fato una promessa a Dio. Geovà el ga ciamà la nassion par ndar darente del monte Sinai, e el ghe ga dito: “Se valtri obedì ala me voce de maniera fedele e obedì al me acordo, sicuro che valtri deventaré el me pòpolo spessial intrà tuti i pòpoli.” Tuti del pòpolo i ga rispondesto: “Semo qua par far tuto quel che Geovà el ga mandà.” (Éso. 19:4-8) La dedicassion de Israel la era pi importante che sol gaver una responsabilità de far una roba, la volea dir che i era de Geovà e lu li tratea come un “pòpolo spessial”.

9. Come che Israel la se ga benefissià parché la era una nassion dedicada a Dio?

⁹ Esser el pòpolo spessial de Geovà ghe dea tanti benefissi ai israeliti. Lu l’era leal e li tendea come un pare amoroso el tende del so fiol. Geovà el ga dito a Israel: “Sarà che una dona la pol desmentegarse del so bambin, e no gaver compassion par el fiol che ela la ze drio spetar? Anca se queste done le se desmenteghesse, mi mai me desmentegaria de ti.” (Isa. 49:15) Geovà ghe ga dato la Lege, i profeti par incoraiarli e la protession dei àngeli. Un salmista el ga scrito: ‘Geovà el anunsia la so Parola a Giacò, le so lege a Israel. Lu no’l ga fato cossita con nissuna altra nassion’. (Sal. 147:19, 20; ledi Salmo 34:7, 19; 48:14.) Cossita come Dio el ga tendesto del so pòpolo spessial nel passà, lu el tenderà de quei che i dedica la so vita a lu ancoi.

Parché ghemo de dedicarse a Dio?

10, 11. Sarà che semo nassesti nela fameia de Dio? Spiega.

¹⁰ Arquanti, quando i pensa sora la dedicassion e el batésimo, fursi i se domanda: ‘Parché no posso adorar a Dio sensa dedicarme a lu?’ Noantri no semo nassesti nela fameia de Dio par causa del pecato de Adon. (Rom. 3:23; 5:12) Par quela, dedicarne a Dio la ze una roba tanto importante se volemo far parte dela so fameia universal. Vedemo parché.

¹¹ Nissun de noantri ga un pare che el podaria darne la vita come la gavaria de esser, o sia, perfeta. (1 Tim. 6:19) Noantri no semo nassesti come fioi de Dio parché, quando Adon e Eva i ga pecà, le persone le ze state spartide de so amoroso Pare e Creador. (Vedi Deuteronómio 32:5.) De là avanti, le persone le vive spartide de Dio, fora dela So fameia universal.

12. (a) Come che persone imperfete le pol deventar parte dela fameia de Dio? (b) Che robe ghemo de far vanti del batésimo?

¹² Cada un de noantri pol domandar a Dio che el ne acete nela so fameia. a Come questo l’è possìbile se semo pecadori? El apòstolo Paolo el ga scrito: ‘Èrino nemighi de Dio, ma par meso dela morte del so Fiol, semo deventadi so amighi nantra volta.’ (Rom. 5:10) Se volemo che Dio el ne acete, nel batésimo, ghemo de domandarghe una bona cossiensa. (1 Ped. 3:21) Vanti del batésimo, ghemo de far arquante robe. Par esémpio, ghemo de cognosser a Dio, imparar a fidarse in lu, ciamarse grami dei nostri sbali e cambiar la maniera de viver. (Gioani 17:3; Ati 3:19; Ebr. 11:6) E, prima che Dio el ne acete nela so fameia, ghen’è altra roba de far. Cossa ze?

13. Parché che la persona la ga de dedicar la so vita a Dio vanti de far parte dela so fameia de adoradori?

¹³ Quando una persona la vol far parte dela fameia de servi de Dio, bisogna che la fae una promessa a Geovà. Ma parché? Imagina un pare che ghe vol ben a un gióveno che l’è òrfano e el vol adotarlo parché el fae parte dela so fameia. El pare l’è cognossesto come un brao omo. Ma prima de acetar che el gióveno el fae parte dela so fameia, lu el speta che el ghe fae una promessa. Lu el dise: “Prima che te aceto come me fiol, go de saver se ti te vè amarme e rispetarme come un pare.” El omo sol lo acetarà nela so fameia se el gióveno el fà quela promessa. Dela stessa maniera, Geovà sol ne aceta nela so fameia se femo una promessa de dedicar la nostra vita a lu. La Bìblia la dise: “Presenté el vostro corpo come un sacrifìssio vivo, santo e che ghe piase a Dio”.— Rom. 12:1.

La dedicassion la ze una dimostrassion de amor e fede

14. Parché che la dedicassion la ze una dimostrassion de amor?

¹⁴ Quando dedichemo la nostra vita a Geovà, mostremo che lo amemo. La dedicassion la ze come un matrimònio. Un sposo cristiano el mostra amor ala so sposa quando el promete esser leal a ela no importa quel che suceda. Questa la ze una responsabilità con una persona, no l’è qualche promessa. Lu el capisse che no’l pol ndar de star insieme cola so sposa se no’l fà el voto de matrimònio. Dela medèsima maneira, noantri no podemo gaver tuti i benefissi de far parte dela fameia de Geovà se no dedichemo la nostra vita a lu. Par quela, dedichemo la nostra vita a Dio e, stesso che semo imperfeti, volemo esser soi e esser leai a lu no importa quel che suceda. — Mat. 22:37.

15. Parché che la dedicassion la ze una dimostrassion de fede?

¹⁵ Dedicar la nostra vita a Dio la ze anca una dimostrassion de fede. Parché? Parché la nostra fede in Dio la ne fà esser sicuri che rivarse darente de lu l’è una roba importante par noantri. (Sal. 73:28) Dele volte sarà fadiga far le robe come Dio el ne domanda de far, ma stesso cossita, se fidemo nela so promessa de giutarne. (Fil. 2:15; 4:13) Savemo che semo imperfeti, ma se fidemo che Geovà el ne perdonarà quando femo qualche sbàlio. (Ledi Salmo 103:13, 14; Romani 7:21-25.) Ghemo fede che Dio el benedirà la nostra lealtà. — Giò 27:5.

Dedicarse a Dio ne dà felicità

16, 17. Parché dedicarse a Geovà ne dà felicità?

¹⁶ Quando dedichemo la nostra vita a Geovà, scominsiemo a far de pi par i altri e semo pi felici. Gesù el ga dito una verità importante: “Ghen’è de pi felicità in dar che in ricever.” (Ati 20:35) Gesù el restea pròpio felice intanto che el fea la predicassion ntela tera. Lu el fea tanto par giutar i altri a catar la strada par la vita. El restea fin sensa riposar e sensa magnar. (Gioani 4:34) Gesù el ghe piasea de assar el so Pare contento. Lu el ga dito: “Mi sempre fao quel che ghe piase a lu.” — Gioani 8:29; Pro. 27:11.

¹⁷ Alora, Gesù el ga insegnà ai so seghidori come che lori i podaria gaver una vita felice. Lu el ga dito: ‘Se qualchedun el vol esser me seghidor, no’l ga pi de viver par si stesso.’ (Mat. 16:24) Se femo cossita, saremo ancora pi amighi de Geovà. Sicuro che lu l’è la meio persona par tender de noantri con amor.

18. Parché viver de acordo con quel che ghemo prometesto a Geovà ne dà pi felicità che se gavéssino dedicà la nostra vita a qualche roba o persona?

¹⁸ Se semo dedicadi a Geovà e vivemo de acordo con quel che ghemo prometesto a lu, gavaremo ancora de pi felicità che se gavéssino dedicà la nostra vita a qualche roba o persona. Par esémpio, tanti i va in serca de imuciar su capital ma no i ze boni de gaver la vera felicità. Ma quei che i dedica la so vita a Geovà i ze boni de catarla. (Mat. 6:24) Lori i resta contenti de laorar insieme con un Dio che ghe dà valor a quel che i fà. (1 Cor. 3:9) Geovà el ghe ga prometesto farli deventar gióveni nantra volta. Cossita, Dio el podarà tender de lori par sempre. — Giò 33:25; ledi Ebrei 6:10.

19. Che privilègio i ga quei che i ze dedicadi a Dio?

¹⁹ Dedicar la nostra vita a Geovà ne fà gaver una forte amicìssia con lu. La Bìblia la dise: “Rivé darente de Dio e lu el rivarà darente de valtri.” (Tia. 4:8; Sal. 25:14) Nel pròssimo artìcolo, ndaremo veder parché che podemo esser sicuri che dedicar la nostra vita a Geovà l’è la meio roba.

[Nota]

Come che te risponderissi?

• Cossa vol dir dedicar la nostra vita a Dio?

• Che benefissi ghemo se semo dedicadi a Dio?

• Parché che i cristiani i ga de dedicarse a Geovà?

[Domande del Stùdio]

[Stampa]

Viver de acordo cola nostra dedicassion ne dà vera felicità