Gesù el ga insegnà che ghemo de viver in pace con tuti. Ma el ga anca dito ai so apòstoli: ‘No sté pensar che son vegnesto portar pace ala tera; son vegnesto portar nò la pace, ma la spada. Parché son vegnesto spartir el omo del so pare, la fiola dela so mare, e la nora dela so sòcera.’ (Mat. 10:34, 35) Cossa che Gesù el ga volesto dir con queste parole?

Gesù no’l volea spartir le fameie, ma lu el savea che questo podaria suceder par via de quel che el insegnea. Alora, quei che i dessidisse deventar dissìpoli de Gesù e batesarse i gavaria de saver che la so fameia la podaria ndarghe contra e proar intrigarli de ndar drio a Gesù.

La Bìblia la dise che ghemo de star in pace con tuti. (Rom. 12:18) Ma quel che Gesù el ga insegnà pol deventar come una “una spada” par le fameie. Come cossita? Questo pol suceder quando qualchedun nela fameia el deventa un dissìpolo de Gesù, ma quei altri no i ze de acordo o i ghe vien contra. Podemo dir che queste persone le pol deventar come nemighe par quel che el vol servir a Geovà. — Mat. 10:36.

Arquanti fradei i serve a Geovà lori soli nela fameia e i infronta tante dificoltà par via de questo. Pol esser che lori i gàpia de provar che i ama de pi a Geovà e a Gesù che qualche altra persona. Par esémpio, quando le persone dela fameia le vol che el fradel el fae selebrassion che le ze sbaliade. Quando questo sucede, lu el gavarà de scòlier se el vol contentar a Dio o la fameia. Ma lu el ga de ricordarse che Gesù el ga dito che quel che el ama de pi el so pare e so mare che a lu no’l mèrita esser so dissìpolo. (Mat. 10:37) Sarà che Gesù el ga volesto dir che i so dissìpoli no i podaria pi amar la so fameia? Nò. Lu l’era drio insegnarghe che i gavaria de amar de pi a Geovà e a lu. Alora, seitaremo a amar la nostra fameia. Ma ghemo de ricordarse che ndaremo amar a Geovà de pi che qualche altra persona.

Sicuro che ndaremo sofrir tanto se la nostra fameia la ne vien contra. Ma ghemo de ricordarse che Gesù el ga dito che quel che no’l vol portar el so pal de tortura e ndarghe drio no’l mèrita esser so dissìpolo. (Mat. 10:38) Alora noantri belche savemo che quei dela nostra fameia i pol vegnerne contra. Ma noantri anca savemo che, se seitemo a esser un bon esémpio, lori i podarà cambiar e voler imparar sora Geovà. — 1 Pie. 3:1, 2.