I me genitori i ga imparà la verità nela dècada de 1920, vanti de maridarse. La nostra fameia la era de star nela Inglatera e mi son nassesto nel scomìnsio del ano de 1939. Noantri ndéino ale riunion e me piasea tanto dela Scola del Ministero Teocràtico. Me penso ancora del me primo discorso parché me ga tocà ndar su nte una cassa e cossita esser bon de veder a tuti. In quela època, mi gavea sol sei ani e go sentio tanta vergogna de parlar davanti dei altri.

Par giutarme nela predicassion, el me pare el ga scrito cola màchina quel che mi gavaria de mostrar ale persone. Mi gavea sol oto ani quando go parlà mi sol con una persona nela predicassion. El paron dela casa l’è vegnesto, el ga ledesto quel che el me pare el gavea scrito e el ga anca acetà el libro “Seja Deus Verdadeiro”. Mi son restà tanto contento e son ndato de carera par parlar al me pare. A mi me piasea tanto la predicassion e le riunion. Questo el me giutea a gaver voia de far ancora de pi par Geovà.

Nantra roba che me ga giutà a amar la verità la ze stata La Sentinela. Noantri la ricevéino casa e quando la rivea, mi suito la ledea tuta. Cada volta mi me fidea de pi in Geovà e go dessidio dedicar la me vita a lu.

Nel ano de 1950 mi e i me genitori semo ndati ala assemblea “Aumento da Teocracia”, in Nova York. Nela dòbia, 3 de agosto, ghen’era el tema “El giorno dei missionari”. El fradel Carey Barber, che el ga fato parte del Corpo Governante, el ga fato el discorso del batésimo. Quando lu el ga fato le due domande par quei che i ndaria batesarse,  mi son levà su e go dito: “Si!” Mi gavea sol 11 ani, ma mi savea che batesarse l’era una roba tanto importante. Mi gavea paura de ndar rento dela àqua parché mi no savea nadar. Alora, el me zio l’è ndato insieme e el me ga dito par restar tranquilo. El batésimo l’è stato pròpio svelto parché no go fato gnanca ora pestar in tera e nantro fradel el me ga giutà a ndar fora dela pissina. De quel giorno avanti Geovà el ga seità giutarme a saver cossa far.

Quando go finio la scola, mi volea tanto esser pioniero, ma i me maestri i seitea dir che mi gavea de far la università. Par causa de quel che lori i ga parlà, mi go scominsià a farla. Ma suito go visto che no ghen’era come servir a Geovà e anca far la università. Alora, mi go pregà a Geovà sora questo e me go fermà de farla. Mi go scrito una carta ai me maestri par spiegar parché che mi gavea fato questo e me go fermà de studiar vanti de finir el primo ano. Alora, mi me go fidà del tuto in Geovà e suito go scominsià a laorar come pioniero.

Mi go scominsià a laorar come pioniero in lùlio de 1957, nela cità de Wellingborough. Mi go domandà se el Betel de Londres el podaria mandar un pioniero pi speriente par giutarme nel laoro. Lori i ga mandà el fradel Bert Vaisey. Lu el me ga insegnà tante robe. Par esémpio, lu el me ga giutà a doperar ben el me tempo nela predicassion. Nela nostra congregassion ghen’era sol oto predicadori, che i era mi, Bert e sei sorele de pi età. Alora, mi gavea de pareciarme tanto par le riunion. L’è stato bel parché questo me ga giutà a fidarme ancora de pi in Geovà e a parlar dela me fede.

Quando son stato ciamà par servir nel esèrsito, mi no go acetà, alora i me ga metesto nela preson par poco tempo. Poco dopo, go cognossesto una pioniera spessial de nome Barbara, e se ghemo maridà in 1959. Noantri voléino laorar ndove che ghen’era de pi bisogno. La nostra prima designassion la ze stata nel noroeste dela Inglatera in Lancashire. Alora, in genaro de 1961, son stato convidà par far la Scola del Ministero del Regno de un mese, nel Betel de Londres. Ma son restà maraveià quando go savesto che ndaria laorar come superintendente. Alora, un superintendente speriente dela cità de Birmingham, el ga giutà mi e la Barbara nela nova designassion. Cossita èrino pareciadi par laorar in Lancashire e Cheshire.

Nel mese de agosto de 1962, quando èrino de fèrie, ghemo ricevesto una carta de Betel. Nela carta, ghen’era due petission par far la Scola de Gileade. Alora, mi e Barbara ghemo pregà a Geovà, ghemo fato le petission e suito le ghemo mandà a Betel. Dopo de sinque mesi, noantri èrino belche drio ndar a Brooklyn,  Nova York, par far  la scola de nùmero 38. In quei diese mesi noantri ghemo studià tanto la Bìblia.

La Scola de Gileade la ne ga insegnà sora la Bìblia, sora la organisassion, ma anca sora i fradei e sorele de tuto el mondo. Mi e Barbara gavéino sol vinte e pochi ani, e ghemo imparà tanto coi altri fradei. Anca go bio la oportunità de laorar tuti i giorni col fradel Fred Rusk, che l’era un dei fradei che i ne insegnea nela scola. Una roba tanto importante che lu el me ga insegnà la ze stata che, quando noantri demo consili a qualchedun, questo consìlio el ga de esser dela Bìblia. Nela Scola de Gileade, noantri ghemo bio la oportunità de scoltar i discorsi dei fradei Nathan Knorr, Frederick Franz e Karl Klein. Ne ga piasesto tanto imparar sora el esémpio del fradel Alexander Macmillan, che l’era tanto ùmile. Lu e el ga spiegà che Geovà el ga tendesto tanto del so pòpolo intrà i ani de 1914 e 1919!

Nel fin dela scola, el fradel Knorr el ga dito che noantri ndarìano servir in Burundi, nela Àfrica. Suito semo ndati nela biblioteca de Betel par veder nel Anuàrio quanti predicadori ghen’era in quel posto. Noantri semo restadi spaventadi parché no ghemo catà gnente sora Burundi. Sarìano i primi a predicar in quel posto che savéino poco e gnente. Semo restadi tanto ansiosi. Alora, noantri ghemo pregà tanto a Geovà e lu el ne ga giutà a restar pi tranquili.

Nela nova designassion, el tempo, la cultura e la léngua i era tanto difarenti par noantri. Noantri ghemo bio de imparar el francese e l’è stato anca fadiga catar un posto par ndar de star. Dopo de due giorni che semo rivadi a Burundi, Harry Arnott, che l’è un fradel che el ga fato Gileade con noantri, el ne ga visità. Lu l’era drio ndar ala Zàmbia e el ne ga giutà a catar un posto par ndar de star, che pi tardi l’è stato doperà anca par altri missionari. Ma poco tempo dopo, ghemo scominsià a infrontar oposission dele autorità, che no le cognossea le Testimònie de Geovà. Noantri èrino drio piaserghe tanto de laorar lì, ma le autorità le ne ga dito che gavarìano de ndar via parché no gavéino una autorisassion de laoro.  Alora, ne ga tocà ndar via par nantro paese, che l’è stato Uganda.

Semo restadi preocupadi de ndar ala Uganda sensa la autorisassion, ma semo restadi manco ansiosi parché se ghemo fidà in Geovà. Alora, un fradel del Canadà, che l’era nel paese el ga parlà cole autorità par assarne restar arquanti mesi nel paese e questo ne ga giutà a gaver la autorisassion. Questo el ne ga mostrà che Geovà l’era drio giutarne.

Le robe in Uganda l’era tanto difarente de Burundi. El laoro de predicassion l’era belche fato in Uganda, anca se ghen’era sol 28 predicadori. Nel teritòrio, ghen’era persone che le parlea inglese. Ma suito se ghemo nicorti che gavéino de imparar al manco una dele léngue dei indi, par giutarli a capir la verità. Ghemo scominsià a predicar nela cità de Kampala, ndove i parlea luganda. L’è stato fadiga imparar a parlar ben la léngua, ma ne ga giutà tanto a predicar meio. Noantri ghemo scominsià a capir quel che i nostri studianti i gavea de bisogno e lori i ga scominsià a fidarse in noantri e a parlar sora quel che lori i sentia.

Semo restadi ancora pi contenti quando ghemo bio el privilègio de laorar come superintendente in quel paese. El Betel del Chénia el ne ga orientà a veder ndove ghen’era bisogno de pionieri spessiai. Le persone le ne ga sempre ricevesto tanto ben, le ga fin parecià de magnar par noantri, anca che no le cognossesse le Testimònie de Geovà.

Dopo go fato anca nantro viaio. Mi son ndato via de Kampala e go viaià due giorni fin rivar ala cità de Mombassa, nel Chénia. Là mi go ciapà un barco e son ndato fin le ìsole de Seychelles, nel osseano ìndico. Intrà i ani de 1965 e 1972, anca la Barbara la ze ndata insieme con mi. Là, i due predicadori i ze deventadi un grupo e dopo una bela congregassion. Dopo, ghemo fato vìsite anca ai fradei nela Eritrea, nela Etiòpia e Sudon.

La situassion in Uganda la ga cambià suito parché i militari i volea tor el governo. Questo ne ga fato tribolar par ani. Quel che l’era drio suceder ne ga fato ricordar dele parole de Gesù de dar a César quel che l’è de César. (Mar. 12:17) I militari i ga volesto che tuti i stranieri in Uganda i fesse un registro nela delegassia pi darente dela so casa. Suito ghemo obedio questa lege. Arquanti giorni dopo, mi e nantro missionàrio semo restadi ansiosi parché la polìssia de Kampala la ne ga fermà. Lori i ga dito che èrino drio scuriosar, par dopo far qualcossa contra lori. Lori i ne ga menà fin la delegassia pi darente e là ghemo spiegà che èrino missionari e no voléino farghe gnente de mal. Noantri ghemo dito che gavéino el registro ma la polìssia no la volea scoltarne. Alora, i ne ga menà fin nantra delegassia, che la era pi darente de ndove èrino de star, e un dei polissiai el ne cognossea. Come lu el savea che gavéino el registro, el ga mandà che i polissiai i ne assesse ndar via. Cossita semo restadi pi tranquili.

In quela època, i militari i fermea a tuti quei che i passea par le strade. Quela situassion la era pròpio bruta, parché arquante volte lori i era ciuchi. Quando questo sucedea,  noantri preghéino tanto a Geovà e lu el ne dea pace. Par fin, èrino boni de ndar avanti sensa problemi. Ma, nel ano de 1973, i ghe ga tocà a tuti missionari ndar via de Uganda.

Nantra volta ghemo cambià de designassion. Semo stati designadi par la Costa del Marfin, nel oeste dela Àfrica. Le robe le ga cambià tanto parché ghemo bio de tornar a parlar francese e anca de star insieme de missionari de diverse culture. Nantra volta, ghemo visto Geovà benedir el laoro de predicassion parché le persone ùmile suito le acetea le bone notìssie. Noantri èrino nela strada giusta parché se ghemo fidà in Geovà.

De colpo ghemo savesto che la Barbara la gavea un càncaro e semo tornadi arquante volte ala Europa par causa dela so salute. Ma nel ano de 1983, semo restadi tanto disgustadi parché no sarìano pi boni de seitar a servir nela Àfrica.

Quando èrino nel Betel de Londres, la Barbara la ze restada pedo dela so malatia e la ze morta. La fameia de Betel me ga incoraià tanto e un casal el me ga giutà a infrontar quela bruta situassion e a seitar fidarme in Geovà. Dopo de un tempo, mi go cognossesto Ann, una sorela che la amea tanto a Geovà. Ela era una commuter nel Betel e la gavea belche servio come pioniera spessial. Noantri se ghemo maridà in 1989 e servimo nel Betel fin ancoi.

De1995 a 2018, ghemo bio la alegria de laorar come rapresentanti dela Sede Mondial in 60 paesi. Mi go visto che Geovà el benedisse tuti i so servi, in tuti i paesi, no importa quel che sucede con lori.

Nel ano de 2017, go bio la oportunità de tornar ala Àfrica. Son restà tanto contento de farghe veder ala Ann come che l’è Burundi. Noantri semo restadi contenti de veder che tante persone le ga imparà la verità. Nel medèsimo posto che mi predichea de casa in casa nel ano de 1964, ancoi ghen’è un Betel e ghen’è de pi de 15.500 predicadori nel paese.

Quando go savesto ndove che mi ndaria far le vìsite nel ano de 2018, son restà ancora pi contento, parché ndaria visitar la Costa del Marfin. Quando mi son rivà in Abidjan, che l’era la capital, l’era come se mi fusse casa. Quando son rivà nel Betel, mi go visto el nome Sossou nei nùmeri de telèfoni e mi go pensà che l’era un fradel che mi cognossea. El fradel Sossou el gavea laorà come superintendente dela cità quando mi era nela cità de Abidjan. Ma dopo, mi go savesto che no l’era lu, l’era el so fiol.

Mi son sicuro che Geovà sempre el fà quel che el promete. Mi go anca visto che, se quando infrontemo dificoltà se fidemo in Geovà, lu el mostra la strada giusta. Alora, l’è questo che mi vui far: Seitar a caminar nela strada giusta, parché questa strada la ndarà menarne al novo mondo de Dio e ndaremo viver par sempre. — Pro. 4:18.