Ani indrio, el pupà e la mama i era i primi a parlar coi so fioi sora sesso. Lori i podea spiegar el assunto un pochetin ala volta, de acordo cola età e de acordo con quel che i so fioi i ghe ocorea.

Ma adesso, tuto l’è difarente. El libro O Efeito Lolita el dise: “Cada volta pi bonora nela vita, i tosatei i vede assunti sora sesso. El ràdio, la internet e la television i mostra cada volta de pi queste robe.” Sarà che questo li giuta o li intriga?

Ghen’è assunti de sesso par tute le bande. Deborah Roffman che la ga scrito el libro Fale Comigo Primeiro a la dise: “In tuti posti ghen’è ritrati e assunti sora sesso: in ciàcole, propagande, filmi, libri, mùsiche, television, reviste, videogames, outdoors, telèfoni e computadori. Par quela, sensa nicorderse, i gióveni e fin i tosatei i crede che el sesso . . . l’è la roba pi importante dela vita.”

Le propagande le ga tanta colpa. Quei che i fà propagande e i vendedori i fà de tuto par vender ai tosatei robe par vestirse sensuai, cossita i tosatei i ga una granda preocupassion de come le persone li vede. El libro A Infância Perdida b el parla che quei che i fà propagande i sa che i tosatei no i ze pronti par capir i so sentimenti. El libro el dise: “I ritrati e cose de sesso no i ga la intension che i tosatei i fae sesso, ma si farli comprar e guastar soldi.”

No basta sol spiegar. Ghen’è difarensa intrà saver guidar un auto e esser un bon motorista. Dela stessa maniera, i fioi i ghe ocore de pi che sol saver quel che l’è sesso, ma anca i ghe ocore doperar quel che i sa par far bone dessision.

El pi importante: Te toca trenar i to fioi par che lori i sàpia “la difarensa tanto del giusto come del sbalià.” — Ebrei 5:14.

La responsabilità la ze toa. Parlar coi fioi sora sesso pol esser una roba che no la par giusta, ma ze responsabilità del pupà e dela mama. — Consìlio dela Bìblia: Proverbi 22:6.

Parla un pochetin ala volta. Invesse de parlar de un colpo sol, te pol parlar col to fiol intanto che valtri si drio far qualche laoro in casa, o quando si ntel auto drio viaiar. Par capir quel che to fiol el pensa, fà domande par saver la so opinion. Proa imaginar che ti e to fiol sì drio veder una propaganda con un ritrato sensual. Invesse de domandar al to fiol se lu el ghe piase de quel ritrato, te pol domandar: “Parché che te cati che lori i dopera questo ritrato par far le persone comprar?” Dopo che te scolti la risposta del to fiol, te pol domandar: “Cossa che te pensi sora questo assunto?” — Consìlio dela Bìblia: Deuteronómio 6:6, 7.

Parla de acordo cola età. Vanti del to fiol ndar ala scola te pol insegnar i nomi giusti dei òrgani genitai. Anca te pol parlar come che lu el pol protegerse dele persone che ghe piase far sesso coi tosatei. Col tempo, te pol spiegar come che lu l’è nassesto. Vanti dela pubertà, che l’è quando el corpo del tosatel el càmbia e l’è pronto par gaver fioi, lu el ghe ocore saver de arquante robe. Par esémpio, che ghen’è un tempo giusto par scominsiar a gaver relassion sessuai e che gavarà cambiamenti nel so corpo.

Insegna le règole. Ancora quando i ze cei, insegna ai to fioi sora la onestità, responsabilità e rispeto. Questo el te giutarà tanto quando te ndarè parlar con lori sora sesso. Anca spiega quel che te cati giusto e sbalià. Se te cati che far sesso vanti de maridarse l’è sbalià, parla ai to fioi de maniera ciara. Te pol spiegar parché che l’è sbalià e el bruto risultà de farlo. El libro Uma Longa Conversa Não Basta c el dise: “Quando i fioi i sa che el so pupà e la so mama no i ze de acordo de far sesso vanti de maridarse, sarà pi fadiga che lori i lo fae.”

Daghe el esémpio. Fà quel che ti te insegni. Par esémpio, te ridi de frotole sporche? Le to robe de vestir le ze sensuai? Te ghè el costume de pacherar? Se te fè queste cose sarà pi fadiga giutar i to fioi a far quel che l’è giusto. — Consìlio dela Bìblia: Romani 2:21.

No stà parlar de maniera negativa sora el sesso. El sesso l’è un presente de Dio. El pol dar tanta alegria quando l’è fato nela ora giusta — dopo de maridarse. (Proverbi 5:18, 19) Spiega al to fiol che col tempo, lu el podarà doperar questo presente sensa preocuparse coi problemi che vien fora de far sesso vanti de maridarse. — 1 Timòteo 1:18, 19.