CAPÌTOLO 25

Come posso vinser el bruto costume dela masturbassion?

“Go scominsià a masturbarme quando gavea 8 ani. Dopo, go imparà quel che Dio el pensa e, de quel momento in avanti, quando sucedea nantra volta me sentia tanto mal. Go pensà: ‘Dio mai el me volerà ben.’” — Luiz.

QUANDO se scominsia esser tosi le voie sessuai le deventa cossita forti che tanti i casca nel bruto costume dela masturbassion. a Ghen sarà de quei che i te dise che no l’è un problema, che no fa mal a nissuni. Invesse ghen’è boni motivi par no cascar in questo bruto costume. Varda cossa el apòstolo Paolo ne ga scrito: “Gavé de far morir le parte del vostro corpo . . . sora la . . . passion sensa controlo.” (Colossensi 3:5) L’è sicuro che la masturbassion no fà gaver manco voie sessuai, invesse ghe ne fà vegner fora ancora de pi e fà suceder anca altre robe:

● Fà vegner fora egoismo parché la persona pensa sol nel so piaser.

● Fà deventar la dona par el omo e el omo par la dona come se i fusse sol una roba par cavarse via le voie sessuai.

● Fà che un el pense sol in lu, e pol farghe vegner fora problemi anca nel matrimònio, parché no’l sarà mai contento cole so relassion sessuai.

Alora l’è meio imparar a controlarse invesse che mastubarse par cavarse via le voie sessuai. (1 Tessalonissensi 4:4, 5) Come te pol controlarte? La Bìblia dà un consìlio de maniera ciara: no meterte in situassion che podaria farte vegner voie. (Proverbi 5:8, 9) Ma cossa far se te sì belche cascà nel bruto costume dela masturbassion? Fursi te ghè proà fermarte ma no te sì stà bon. La roba pi fàcile saria dir che no te sì bon e pensar che mai te podarè viver come Dio el vol. Un toso che ga nome Pedro el dise: “Me sentia tanto in colpa. Quando ghe caschea nantra volta, pensea che no podea far gnente par risolver quel che gavea fato, no era gnanca bon de pregar”.

Se te te senti cossita no stà desanimarte, no te sì sensa speransa. Gióveni e anca pi grandi i ze stati boni de vinser questo bruto costume!

Come infrontar el sentimento de colpa

Come ghemo visto, l’è tanto normal che quei che se masturba i se sinta in colpa o, come dise 2 Corinti 7:11, i gàpia tristessa. Questo sentimento de colpa el va anca ben, parché el pol darte la forsa de assar questo bruto costume, ma se te te senti massa in colpa no va ben, parché te pol desanimarte tanto che te perderè la forsa de lotar contra questo bruto costume. — Proverbi 24:10.

Alora, te ghè de pensar de maniera giusta. La masturbassion la ze una sporchìssia. La te fà deventar “schiavo de voie e piaseri” e la te mena a far e pensar le robe de maniera sbaliada. (Tito 3:3) Ma no l’è una forma grave de imoralità sessual. (Giuda 7) No stà pensar che se te te masturbi te ghè fato un pecato che no pol esser perdonà. La roba importante l’è che te seiti sforsarte par controlar le to voie e no renderte mai.

No stà desanimarte massa se te sucede natra volta de sbaliar. Ricordate quel che dise Proverbi 24:16: “Anca se el giusto el casca sete volte, el se levarà su. Ma i rugni i ndarà cascar quando sucede robe brute.” Se te fè un sbàlio no vol dir che te sì una persona rugna. Alora, no stà fermarte de lotar. Invesse pensa parché te sì cascà nela tentassion e come te pol evitar che te suceda nantra volta.

Tote el tempo par pensarghe sora el amor e la misericòrdia de Dio. Varda nel Salmo cossa che Davi, che anca lu el ga fato i so sbali, el ga scrito: “Cossita come el pare l’è misericordioso coi so fioi, Geovà l’è misericordioso con quei che i lo teme. Parché lu el cognosse ben come semo stati fati, el se ricorda che semo polver.” (Salmo 103:13, 14) Geovà el se ricorda che semo imperfeti e lu l’è sempre “pronto par perdonar”. (Salmo 86:5) Ma Geovà el ga caro che te te sforsi par cambiar. Vedemo adesso arquante idee che pol giutarte a assar questo bruto costume.

Stà atento a come te doperi el to tempo lìbero. Te vedi programi, filmi o te vedi pàgine de internet che te fà vegner fora voie sessuai? Un scritor dei salmi el ga domandà a Dio nte una orassion che lo giutesse a no vardar quel che no serve par gnente. — Salmo 119:37.

Fà sforso par pensar in altre robe. Te pol far quel che dise un fradel de nome William: “Vanti de dormir ledi qualcossa relassionà cola Bìblia. L’è tanto importante che le ùltime idee del di le sìpia de acordo con Dio e cola Bìblia.” — Filipensi 4:8.

Parla con qualchedun del to problema. Anca se te ghè tanta vergogna, parlaghe a qualchedun del to problema, parché te giutarà a assar questo bruto costume. Un toso che ga nome David el ga fato pròpio cossita: “Gavea dessidio de dirghelo a me pupà e mai me desmentegarò dele so parole. Quando el ga visto quanto l’era difìcile dirghelo el me ga fato un soriso e el me ga dito: ‘Son tanto orgolioso de ti’. Gnente gavaria podesto animarme de pi. Cossita go dessidio de far de tuto par cambiar.”

“El me ga mostrà arquanti testi par giutarme a no sentirme massa mal ma dopo el me ga ledesto altri testi par esser sicuro che capisse ben che l’era un problema serio. Dopo el me ga dito de lì avanti de no cascar pi nela masturbassion e che gavarissino parlà ancora. E che se me sucedesse de cascar ancora nel problema de no star massa mal, invesse de esser dessidio de resister par un periodo de tempo ancora pi longo.” Cossa galo capio David? “Gaver qualchedun che sa del to problema e el vol giutarte l’è stà la meio roba.”

[Nota]

TESTO PRINSIPAL

“Scampa via dele voie che i gióveni i ga, ma sfòrsate par gaver la giustìssia, la fede, el amor e la pace, insieme a quei che i se fida nel Signor con un cuor puro.” — 2 Timòteo 2:22.

UNA IDEA

Prega Geovà Dio vanti che la voia la devente massa forte. Domandaghe che el te dae “el poder pi grando del normal” par resister. — 2 Corinti 4:7.

SAVÉITO QUESTO?

Assar che le voie sessuai le te controle l’è la roba pi fàcile, ma un che l’è mauro el gavarà la forsa de controlarse, ancora de pi quando nissuni i lo vede.

COSSA NDARÒ FAR

Cossa che posso far par impienir la mente de robe pure e nete?

Cossa che farò par no cascar nantra volta quando riva una tentassion?

Cossa che vui domandarghe a me pare o me mare sora questa roba?

COSSA PÉNSITO?

● Parché che l’è una roba bona ricordarse che Geovà l’è “pronto par perdonar”? — Salmo 86:5.

● Dio el ga creà le voie sessuai e el sa che le ze forte. Se el te domanda de controlarle l’è parché el crede che te pol farlo, mia vera?

[Comentàrio]

“De quando go vinsesto questo problema, go una cossiensa neta davanti de Geovà, e ze una roba che no cambiaria par gnente al mondo!” — Sarah

[Stampa]

Se te caschi nte una carera, no te ocore tornar al scomìnsio. Come anca col problema dela masturbassion, se te sucede nantra volta no vol dir che te ghè fato tuti i sforsi par gnente