Naho nyamulemalema u tshi kona u vhona, vhunzhi hayo i shumisa echolocation u itela u ḓivha zwine zwa khou itea u mona nayo. Zwenezwi zwi amba uri nyamulemalema u ḓivha uri tshithu tshi vhukule vhungafhani nga u vhalela uri zwi dzhia tshifhinga tshingafhani uri muungo wa tshenetsho tshithu u vhuye khawo. Sa tsumbo, miṅwe minyamulemalema i a kona u ḓivha phambano vhukati ha lunyunyu na tshikhokhonono tshine tsha pfi beetle nga luvhilo lune tshenetsho tshikhokhonono tsha fhufhisa ngayo phapha dzatsho.

 Humbulani nga ha hezwi: Vhunzhi ha minyamulemalema i shumisa mikulo yayo u itela u bvisa muungo nga mulomoni kana nga ningoni yayo. U shumisa nḓevhe dzawo khulwane u itela u pfa muungo une wa khou vhuya khawo u tshi bva kha tshiṅwe tshithu. Wonoyo muungo u ita uri nyamulemalema u kone u ḓivha zwithu zwi re tsini nawo. Nyamulemalema u a kona u ḓivha uri tshenetsho tshithu tshi nga gai na uri tshi vhukule vhungafhani naho hu na miṅwe minyamulemalema ine ya khou ita phosho.

 Nyamulemalema u tea u shumisa echolocation uri u kone u fara tshikhokhonono. Nyamulemalema u tea u thetshelesa vhukuma muungo wa tshenetsho tshikhokhonono uri u kone u ḓivha uri tshi vhukule vhungafhani uri u kone u tshi fara. Vhaṅwe vhaṱoḓisisi vha amba uri a zwi konadzei uri nyamulemalema u ite zwenezwo. Fhedzi ṱhoḓisiso dze dza itiwa dzi sumbedza uri nyamulemalema u a kona u vhalela uri tshikhokhonono tshine wa khou ṱoḓa u tshi fara tshi vhukule vhungafhani, zwa ita uri u kone u tshi fara.

 Vhaṱoḓisisi vho ita thonga ine ya shumisa echolocation u itela u thusa vhathu vha sa vhoni uri vha kone u ḓivha zwine zwa khou itea tsini navho na uri vha si thulane na zwithu zwine zwa vha zwi nṱha zwine zwa nga vha vhaisa ṱhoho, sa tavhi ḽa muri. Vho Brian Hoyle na Vho Dean Waters vhe vha ita thonga ine ya vhidzwa Batcane vho ri: “Tshithu tsho ri thusaho u ita yeneyi thonga ndi nga u ḓivha nga ha vhukoni vhune nyamulemalema wa vha naho ha u shumisa echolocation.”

 Inwi ni zwi vhona hani? Naa vhukoni ha nyamulemalema ha u shumisa echolocation ho sokou tou bvelela kana ho tou sikwa?